Degenmen, kez kelgen saiasi ózgeris, memlekettik reformalar bir kúnde jasala salmaidy. Qazaq ondaidy «Batpandap kirgen aýrý mysqaldap shyǵady» dep meńzegen. «Máskeý bir kúnde salynǵan joq» degen de támsil bar.
Munyń bárin nege aityp otyrmyz?
Alystan oraǵytpai týrasyna kóshsek. Jańa Qazaqstannyń alǵy sharttary jasala bastady qazir. Mysaly, keshe ǵana Elorda ataýyn Astana dep ózgertý týraly zań jobasyn qos palata qos qoldap qoldady.
Qala ataýyn Astana dep ózgertý «Konstitýtsiiaǵa ózgerister men tolyqtyrýlar engizý týraly» zań jobasyna engizilgen bolatyn. Májilis pen Senattyń batasynan keiin, Prezident jarlyqqa qol qoisa, elordanyń ataýy – Astana bolmaq.
Biz kútken ózgerister Astana atynan bastalýy kerek edi. Bastaldy.
Astana qalasynyń aty Nur-Nusultan bolyp ózgergende, halyq ishtei de, ashyq ta qarsylyq bildirgen bolatyn. Bul reformany eshkim quptaǵan joq ol kezde. Bilik ózi ǵana sheshti.
Aqordaǵa jaqyn júrgender men ákim-qara, ministr, depýtattar ǵana qos qoldap qoldaǵan shyǵar. Al qarapaiym halyq adam atymen qalany ataýdyń óreskel qate ekenin eskertti. Sol kezde búkil áleýmettik jeli qarsylyq únge tolyp ketkenin jasyrmaimyz. Biraq qarashanyń daýysy eskerilgen joq.
Sóitip, 1998 jyldan beri «Astana» atyn brendke ainaldyrý úshin ketken qarjy, jumsalǵan ýaqyt – bári esil eńbek bolyp qaldy.
Endi sonyń orny tolyp otyr. Ólgen tirildi, óshken jandy degen osy. «Astana» brend dedik qoi. Álemdik brend! Mysaly, kezinde «Astana» fýtbol klýby boldy. «Astana» velokomandasynyń ózi Qazaqstan atyn biraz jerge tanytty. EKSPO kezinde de Astana aty búkil álemdi sharlap ketti.
Sheteldikter Qazaqstan dep emes, Astana úshin keletin jaǵdai ornaǵan. Sol brendten aiyrylyp qalǵan edik. «Qaitqan malda bereke bar».
Qala aty ózgerse, brend qalyptastyrýdyń bárin basynan bastamaimyz, tek jalǵastyramyz. Qarjy únemdeledi. Ýaqyttan utamyz. Bul bir.
Ekinshiden, Astana atyn qaitarsaq, onomastikalyq infraqurylymdy birden jańartpaimyz.
Mysaly, belgiler men jolnusqaýlyqtar, mańdaishalar men baǵyt silteitin taqtaishalardy, mekeme ataýlaryn, is-qaǵazdar men qujattardy birden aýystyrmaimyz. Ýaqyty kelgen kezde óz retimen jańartyp otyramyz. Bul jaǵynan da aqsha únemdeýge bolady degen sóz. Onyń ústine, burynǵy Astana ataýymen saqtalǵan qujattar men nusqaýlyqtar áli bar. Ony da paidalana berýge bolady.
Sheteldikter Nur-Sultan degennen góri, Astana ataýynyń tilge jeńil, júrekke jyly, este saqtaýǵa ońai ekenin aitady. Onysy ras, kez kelgen sheteldik qinalmai aita alady, jazýǵa da qolaidy. Qazaqsha dybystar joq.
Qazaqstandyq qoǵamdyq damý institýtynyń sarapshysy, Bóketov atyndaǵy Qaraǵandy ýniversitetiniń oqytýshysy Eldos Táńirbergenulynyń aitýynsha, Astana ataýynyń qaita jańǵyrýy – bul halyqtyń talaby.
«Jańa Qazaqstan – bul memlekettik jańǵyrý, saiasi reforma. Al Astana ataýynyń qaita oralýy sol reformanyń bir tarmaǵy ǵana. Jańarý, jańǵyrý degender osyndai tarmaqtardan bastaý alady. Sondyqtan, menińshe, bul kúndi tarihi jańǵyrý retinde qabyldaǵan durys.
Kóptegen adamdar Astana ataýynyń qaita jańǵyrýyn salqynqandy qabyldap jatqan siiaqty. Jasyrtatyny joq, qaibir jyly Astana qalasynyń aty Nur-Sultan bolyp ózgergende, halyq óz pikirlerin bildirdi. Munyń durys emes ekenin aitty. Biraq qala aty báribir aýysty. Endi Elorda ataýyn qaitarǵanda qýanyp jatqandar kóp. Sol qýanysh kóp bolsyn. Bul konstitýtsiialyq ózgeris. Bizge óz Konstitýtsiiasyn qorǵai alatyn, óz taǵdyryna ózi jaýap beretin qoǵam kerek!» degen oiyn bildirdi spikerimiz.
Bir jaǵynan Astana ataýynyń qaita jańǵyrýy bilik pen buqara arasynda úndestik bar ekenin kórsetedi.
Buryn aittyń ne, jazdyń ne, eshkim eshnársege pysqyrmaityn. Qazir estip qana qoimaidy, naqty sheshimder qabyldaidy. «Halyq únine qulaq asatyn» memleket tujyrymdamasy degen sol. Astana ataýy sonyń bir dáleli.
https://dalanews.kz/bilim/81355-qazuu-de-studentter-qataryna-qabyld
