Aldyńǵy joly aitqam, suraqtar bolsa jaýap beremin dep, solarǵa qysqasha jaýap bereiin;
1. Nege is orys tilinde, interviý qazaqsha ǵoi?
- Interviý qazaq tilinde bolǵandyǵy sebepti, mende shaǵymdy qazaq tilinde bergem, biraq QR ÁQBtK-nyń 744 baby, 1 bóligine sáikes, quqyq buzýshy qai tilde jaýap berse, is sol tilde júredi. Abilov ózine yńǵaily orys tilin tańdady.
2. Abilov prezidentikke kandidat retinde tússe, bul is oǵan kedergi bolmai ma?
- Joq, qoldanystaǵy Konstitýtsiianyń 41 baby, «Sailaý týraly» Konstitýtsiialyq zańnyń 4 babynda ondai shekteýler qarastyrylmaǵan.
3. Bul bolashaqta sóz bostandyǵyna shekteý qoiýǵa ákep soqpai ma?
- Sóz bostandyǵy – ol sóz iesiniń barlyq jaýapkershilikten bosatylýy degendi bildirmeidi. Jala japqany, adamnyń ar-ujdany, abyroiyna tiiskeni, mazaq qylǵany úshin jaýapkershilik álemniń barlyq damyǵan elderiniń zańdarynda qarastyrylǵan. Oǵan zamanaýi zańdarymyzdyń jáne demokratiianyń bastaýy dep tanylǵan Frantsýz Revoliýtsiiasynan bastap shyqqan barlyq uly eńbekter men traktattardy oqysańyz da ońai kóz jetkizesiz.
4. Endi Sizge til tigizgen barlyq adammen osylai sottasa beresiz be?
- Joq árine, adamdar minezine bailanysty jetekshi jáne jetekke erýshi bolyp eki tipke bólinedi (vedomye i vedýshie). Jetekke eretinder kópshilikti quraidy. Olar ózdiginen izdenbeidi, bas qatyrmaidy, belgili tulǵalar basqalar týraly ne aitsa, sony sol qalpynda qabyldaidy. Sondyqtanda ol tiptegi adamdardyń sózin kóńilge alyp keregi joq.
Al Bolat Abilov bolsa – ol qoǵamdyq-saiasi ortada pikir qalyptastyra alatyn, jetekshi rólge ie adam.
Osyndai tulǵalar kópshilikke qarata aitqan sózderine nazar aýdarsa, el aldyndaǵy jaýapkershiligin sezinse degen oi meniki. Ekinshi maqsatym – osyndai sózge qalǵan, ar-namysy taptalǵan azamattar bolsa, jelide bosqa sóz shyǵyn qylmai, zań júzinde óz quqyqtaryn qorǵasa. Ol úshin ákimshilik, azamattyq, qylmystyq zańnamada qandai jaýapkershilik túrleri qarastyrylǵan, olardy qalai qoldanýǵa bolady, bárin táptishtep jazyp shyqtym. Ár adam tanysyp, ózine keregin paidalanýyna bolady.
Budan basqa, mánsizdeý, qyńyr-qisyq suraqtarda, ártúrli pikirlerde boldy, olardy jazyp bul jerdi urys alańyna ainaldyrý maqsatym joq. Sonymen bul tema ázirge támam!
Jelide, qoǵam arasynda, áleýmettik, saiasi ortada bir-birimizdiń arymyzdy taptamai, jeke basqa tiispei mádenietti túrde pikir talastyryp úireneiik. Abaisha aitqanda, sóz túzelmei, el túzelmeitinin este saqtaiyq!
Abzal Quspan
