Qazaqstan men Belarýs kompaniialary arasynda jalpy quny 100 mln dollardan asatyn kelisimsharttar jasaldy. Bul týraly Saýda jáne integratsiia ministri Arman Shaqqaliev málimdedi, dep habarlaidy dalanews.kz.
Ministrdiń aitýynsha, Qazaqstan Premer-ministri Oljas Bektenovtiń Minsk qalasyna jasaǵan resmi sapary aiasynda eki el arasyndaǵy saýda-ekonomikalyq yntymaqtastyqty nyǵaitý máseleleri talqylanǵan.
«2025 jyldyń qorytyndysy boiynsha Qazaqstan men Belarýs arasyndaǵy taýar ainalymy shamamen 1,2 mlrd dollardy qurady. Biylǵy jeti aidyń nátijesinde eksport kólemi 35 paiyzdan astam ósti. Premer-ministrdiń sapary barysynda quny 100 mln dollardan asatyn kelisimderge qol qoiyldy. Onyń ishinde ónerkásiptik kooperatsiia jobalary men Belarýske avtokólik jetkizý týraly kelisimder bar. Sondai-aq ónerkásiptik áriptestik pen agroónerkásiptik ónimderdi ózara jetkizýge erekshe nazar aýdaryldy», – dedi Arman Shaqqaliev.
Atap aitqanda, «Hyundai Trans Auto» JShS Belarýstiń «Er Si Em» kompaniiasyna 2027–2028 jyldary 790 birlik kommertsiialyq tehnika jetkizedi. Kelisimsharttyń quny keminde 30 mln dollardy quraidy.
Saýda jáne integratsiia ministrliginiń málimetinshe, qazaqstandyq avtokólik óndirýshileriniń Belarýs naryǵyndaǵy rastalǵan eksporttyq áleýeti jylyna 4,5 myń tehnikaǵa deiin jetedi. Budan bólek, taraptar Belarýske qazaqstandyq sýsyndar men basqa da ónimderdi jetkizý jóninde kelisimge kelgen.
Vedomstvonyń málimetinshe, eki el arasyndaǵy yntymaqtastyqtyń negizgi baǵyttarynyń biri ónerkásiptik kooperatsiiany damytý jáne ózara taýar jetkizý kólemin arttyrý bolyp qala beredi.
