Áleýmettik jelilerde tikeleı efırde taratý arqyly ótken ashyq pikirtalas barysynda sarapshylar, qoǵam qaıratkerleri, Májilis depýtattary el Prezıdenti usynǵan reformalarǵa qatysty óz pikirlerin ortaǵa saldy.
Otyrysqa qatysqan QR Memlekettik hatshysy Erlan Qarın bul termın bılik ınstıtýttary arasynda neǵurlym tıimdi teńgerim jasaıtyn memlekettik basqarý modeliniń ózgerýin beıneleıtinin atap ótti.
– «Jańa Qazaqstan» – bul mańyzdy qoǵamdyq transformasıany júzege asyratyn keń aýqymdy ıdeologema bolsa, «Ekinshi Respýblıka» – bul memlekettik modeldi ózgertý. Iaǵnı, birinshi jaǵdaıda qundylyqtar deńgeıinde, al ekinshi jaǵdaıda – bul ınstıtýsıonaldyq, quqyqtyq deńgeıde júzege asatyn ózgerister.16 naýryzdaǵy Joldaýda Prezıdent naqty jańa saıası bastamalardy jarıa etkenin jáne olardy júzege asyrý is júzinde bastalyp ketkenin eskersek, «Ekinshi respýblıkaǵa» kóshý jaqyn arada oryn alady dep aıtýǵa bolady, – dedi Erlan Qarın.
Memlekettik hatshy Prezıdenttiń jańa bastamalary búkil saıası júıeni jańǵyrtyp, qaıta bastaýdy bildiretinin atap ótti. Jańa zańdar qabyldanyp, Konstıtýsıaǵa ózgerister engizilgennen keıin is júzinde osy jyldyń ózinde Qazaqstanda memlekettik basqarýdyń jańa modeline kóshý júzege asyrylady. Ol tejemelik ári tepe-teńdik júıesin ınstıtýsıonaldyq turǵydan kúsheıtip, jańa saıası mádenıettiń qalyptasýyna yqpal etedi.
Óz kezeginde «AMANAT» partıasynyń Atqarýshy hatshysy Ashat Oralov elimizde saıası júıeni transformasıalaý partıany jańǵyrtýdan bastalǵanyn atap ótti.
– Zańnamany lıberalızasıalaýdy, jańa partıalardy tirkeý resimderiniń jeńildetilýin eskersek, elimizdiń partıalyq-saıası alańyna jańa uıymdardyń keletinin túsiný qıyn emes. Bul jaǵdaı – bizdiń partıamyz úshin óziniń uzaq merzimdi, jaýapty kóshbasshylyqqa jáne básekelestikke daıyn ekenin dáleldeý múmkindigi. Osy alańdaǵy kezdesý «AMANAT» syndarly dıalog aıasynda Qazaqstandy damytý boıynsha naqty ıdeıalar men usynystar ázirlenetin saıası mádenıetti arttyrýǵa barynsha yqpal etetinin kórsetedi, – dep atap ótti Ashat Oralov.
«Álternatıv» ózekti zertteýler ortalyǵynyń dırektory Andreı Chebotarevtiń aıtýynsha, «respýblıka» árkez saılaý jolymen qalyptasatyn memlekettik bılik júıesin aıqyndap keldi.
– Biz Qasym-Jomart Toqaevtyń prezıdenttik kezeńinde saılaý júıesi qanshalyqty qarqyndy reformalanyp jatqanyn kórip otyrmyz. Aldymen aýyl ákimderin saılaý ınstıtýty engizildi. Keıin aýdan ákimderi saılanady. Saılaý prosesine majorıtarlyq júıeniń elementterin qaıtarý jumysy júrip jatyr. Bul da jańashyldyqtyń, jaqsylyqtyń nyshany. Bul tek ıdeologıanyń nemese uǵymdardyń ózgerýi ǵana emes, anyǵynda bul alǵa jyljýdyń, damýdyń aıǵaǵy, – dep tolyqtyrdy Andreı Chebotarev.
Májilis depýtaty Aıdos Sarymnyń pikirinshe, búginde qazaqstandyqtar Konstıtýsıa ǵana emes, memlekettik basqarý júıesi de ózgerip jatqan tarıhı kezeńde ómir súrip jatyr.
– Biz memlekettiliktiń burynǵy formatynan bas tartpaımyz. Alaıda oǵan qaıtyp oralmaıtynymyzdy da túsingen jón. Jasyratyny joq, el azamattarynyń basym kópshiligi ózge memleketterdiń, qaısybir ýtopıalardyń sezimimen ómir súredi. Qazir óz keńistigimizge oralyp, óz kún tártibimizben ómir súrýdi úırený mańyzdy, – dedi depýtat.
Kezdesý barysynda Eýrazıalyq ıntegrasıa ınstıtýtynyń dırektory Orazǵalı Selteev, Eýropalyq quqyq jáne adam quqyqtary ınstıtýtynyń dırektory, profesor Marat Báshimov óz pikirlerimen bólisti. Zaldaǵy qatysýshylar ǵana emes, onlaın-kórermender de suraqtaryn qoıdy.
Esterińizge sala keteıik, «TALQYLAU» dıalog alańyn qurý bastamasy «AMANAT» partıasynyń 1 naýryzda ótken kezekten tys Sezinde partıalyq transformasıa baǵdarlamasy tarmaqtarynyń biri retinde kóterilgen bolatyn. Aldaǵy ýaqytta «TALQYLAU» otyrystary túrli formatta uıymdastyrylyp, onda pikirtalas, podkasttar jazý, debattar qolǵa alynady. Alańda sarapshylar, depýtattar, memlekettik organdar men ÚEU ókilderi azamattardy tolǵandyratyn ózekti máselelerdi sheshý jónide usynystar ázirleý úshin turaqty túrde kezdesip otyrady.
