Partiianyń kezekten tys HHII-shi Sezinde Prezident, partiia Tóraǵasy Qasym-Jomart Toqaev partiiany túbegeili qaita jańǵyrtýdyń maqsat-mindetterin aiqyndap, «AMANAT» partiiasynyń memlekettiń táýelsizdigi men eldiń birligi úshin qyzmet etetinine zor senim bildirdi.
Osy oraida keńes otyrysyn ashqan partiia Atqarýshy hatshysy Ashat Oralov sońǵy eki aida qoǵamda, partiia qurylysynda úlken ózgerister oryn alyp, Jańa Qazaqstan qurý jolyndaǵy transformatsiianyń partiiadan bastalǵanyn aitty.
Ol halyqpen keri bailanysty jetildirý maqsatynda qurylymy qaita jasaqtalǵan partiia janyndaǵy qoǵamdyq keńesterdiń jumysyndaǵy ózgeristerge toqtaldy. Onyń aitýynsha, «AMANAT» partiiasy biyl ulttyq mádeniet pen ónerdi qoldaýda birneshe is-sharany qolǵa alady. Sonyń biri – aitys.
– Dástúrli «Altyn dombyra» aqyndar aitysynan bólek biyl «Babalar amanaty» aitysyn da uiymdastyrýdy usynamyz. Partiia árdaiym halyqtyń sózin sóileitin sóz zergerlerin qoldaidy. Budan bólek, biyl elimiz ult ustazy Ahmet Baitursynulynyń 150 jyldyǵy, Muhtar Áýezovtyń 125 jyldyǵy jáne Ǵabit Músirepovtiń týǵanyna 120 jyl sekildi aitýly datalardy atap ótedi. Osy mereitoilardy atap ótýge partiia jan-jaqty qoldaý kórsetedi, – dedi Ashat Oralov.
Keńes otyrysynda sóz alǵan Mádeniet jáne sport ministri Dáýren Abaev Prezident Joldaýynda aitylǵan mádeni muralarymyz ben tarihymyzdy tanýǵa qatysty qoiylǵan mindetterge sáikes, ministrliktiń qolǵa alǵan aýqymdy jumystaryna toqtaldy.
– Kitap shyǵarý isin odan ári damytý úshin jas qalamgerlerdi qoldaý asa mańyzdy. Osy rette 2023 jyldan bastap jas qazaqstandyq jazýshylar men aqyndar úshin arnaiy Prezidenttik ádebi syilyq taǵaiyndalady. Qazir tiisti memlekettik organdarmen Jarlyq jobasy ázirlenýde. Oǵan qosa biyl ministrlik «Úzdik balalar shyǵarmasy», «Jyldyń úzdik kitaby», «Jas qalamger» atty konkýrs-jobalardy júzege asyrýdy kózdep otyr, – dedi ministr.
Keńestiń jańa tóraǵasy, Májilis depýtaty Amanjol Áltai jańa quramdaǵy «Miras»-tyń jumysyna sáttilik tilei otyryp, azamattyq qoǵam qalyptastyrý men mádeniet salalaryn damytýdaǵy qordalanǵan máselelerdi birigip talqylaý, naqty usynystar aitý ortaq maqsat ekenin jetkizdi.
Bul rette «Qazaq media qaýymdastyǵy» zańdy tulǵalar birlestigi basqarý keńesiniń tóraǵasy Erbol Azanbek qazaqtildi aqparat quraldary ushyrasatyn túiindi máselelerge toqtaldy. Onyń aitýynsha, búginde qazaq tilindegi saittardyń iri jarnamalar tapsyrysyna qoly jetpeidi. Qarjy tapshylyǵynyń saldarynan bilikti maman jaldai almaidy, sáikesinshe bilikti mamansyz sapaly kontent óndirý taǵy qiyndyq týǵyzady.
– Memleket jáne áleýmettik jaýapkershilik sheńberinde biznes osy máselege nazar aýdarsa. Memlekettik tapsyrystan bólek, túrli taqyryptaǵy granttyq jobalar jasalyp, jekelegen jýrnalister, redaktsiialar konkýrs negizinde granttardy utyp alý arqyly kontent jasaý múmkindigine ie bolar edi, – dedi Erbol Azanbek.
Óz kezeginde, Aqparat jáne qoǵamdyq damý ministri Asqar Omarov BAQ salasyn quqyqtyq retteýdi jetildirý, aqparat salasy qyzmetkerleriniń kásibiligin nyǵaitý, otandyq BAQ-tyń básekege qabilettiligin odan ári damytý baǵytynda qolǵa alynǵan isterge toqtaldy.
– Osy salada memlekettik retteýdiń tiimdi tetigin qurý maqsatynda zań jobasyn ázirleý jumysy bastaldy. Biz usynystar jinap, sarapshylarmen birlese otyryp zańnamany jetildirý tetikteri boiynsha kontseptsiia ázirleimiz. Ol úshin BAQ, azamattyq qoǵam, ÚEU ókilderin, qoǵam qairatkerleri jáne basqa da múddeli uiymdardyń basyn qosyp, arnaiy jumys toby qurylýda, – dedi ministr.
«Habar» Agenttigi» aktsionerlik qoǵamynyń Basqarma tóraǵasy Berik Ýáli Memleket basshysy Q.K.Toqaevtyń «Jańa Qazaqstan: Jańarý men jańǵyrý» atty Qazaqstan halqyna Joldaýynyń máni de mańyzy da airyqsha ekenin aitty.
– Memleket basshysynyń Joldaýynda aiqyndalǵan reformalardy júzege asyrý kezeńinde BAQ salasynyń jaýapkershiligi, áleýmettik, kásibi áleýeti óte zor bolmaq. Jańa Qazaqstandy qurý jolynda elimizdiń basty arnasy bel sheship kirisip, ideologiialyq turǵyda jumys isteidi. Prezidenttiń bastamalaryn bizdiń arnalarymyz aldaǵy ýaqytta da halyqqa keńinen nasihattap, jetkizýge qashanda daiyn, – dedi.
Sondai-aq, keńeste «mecenat.kz» jobasynyń ázirleýshileri qazaq qalamgerleriniń shyǵarmalaryna arnaiy báige jariialaityny aityldy. Olar júzden júirik shyqqan jazýshynyń shyǵarmalaryn jeke kitap etip jariialap, jeńimpaz shyǵarmanyń avtoryna ómiriniń sońyna deiin ai saiyn 500 dollar kóleminde syiaqy berýge nietti. Jobany ázirleýshi toptyń múshesi, telejýrnalist Áigerim Aǵyltaeva ulttyq ádebiettiń damýyna odan ári úles qosý, ádebiette jańa esimderdi tanytý, úzdik romandardy oqyrmanǵa usynyp, roman jazýdy ilgeriletý maqsatynda qolǵa alynǵan jobaǵa Freedom Holding Gorp. investitsiialyq tobynyń negizin qalaýshy, belgili qarjyger Timýr Týrlov qarjylai qoldaý kórsetetinin jetkizdi.
