پارتيانىڭ كەزەكتەن تىس ءححىى-شى سەزىندە پرەزيدەنت، پارتيا ءتوراعاسى قاسىم-جومارت توقايەۆ پارتيانى تۇبەگەيلى قايتا جاڭعىرتۋدىڭ ماقسات-مىندەتتەرىن ايقىنداپ، «AMANAT» پارتياسىنىڭ مەملەكەتتىڭ تاۋەلسىزدىگى مەن ەلدىڭ بىرلىگى ءۇشىن قىزمەت ەتەتىنىنە زور سەنىم ءبىلدىردى.
وسى ورايدا كەڭەس وتىرىسىن اشقان پارتيا اتقارۋشى حاتشىسى اسحات ورالوۆ سوڭعى ەكى ايدا قوعامدا، پارتيا قۇرىلىسىندا ۇلكەن وزگەرىستەر ورىن الىپ، جاڭا قازاقستان قۇرۋ جولىنداعى ترانسفورماسيانىڭ پارتيادان باستالعانىن ايتتى.
ول حالىقپەن كەرى بايلانىستى جەتىلدىرۋ ماقساتىندا قۇرىلىمى قايتا جاساقتالعان پارتيا جانىنداعى قوعامدىق كەڭەستەردىڭ جۇمىسىنداعى وزگەرىستەرگە توقتالدى. ونىڭ ايتۋىنشا، «AMANAT» پارتياسى بيىل ۇلتتىق مادەنيەت پەن ونەردى قولداۋدا بىرنەشە ءىس-شارانى قولعا الادى. سونىڭ ءبىرى – ايتىس.
– ءداستۇرلى «التىن دومبىرا» اقىندار ايتىسىنان بولەك بيىل «بابالار اماناتى» ايتىسىن دا ۇيىمداستىرۋدى ۇسىنامىز. پارتيا ءاردايىم حالىقتىڭ ءسوزىن سويلەيتىن ءسوز زەرگەرلەرىن قولدايدى. بۇدان بولەك، بيىل ەلىمىز ۇلت ۇستازى احمەت بايتۇرسىن ۇلىنىڭ 150 جىلدىعى، مۇحتار اۋەزوۆتىڭ 125 جىلدىعى جانە عابيت مۇسىرەپوۆتىڭ تۋعانىنا 120 جىل سەكىلدى ايتۋلى داتالاردى اتاپ وتەدى. وسى مەرەيتويلاردى اتاپ وتۋگە پارتيا جان-جاقتى قولداۋ كورسەتەدى، – دەدى اسحات ورالوۆ.
كەڭەس وتىرىسىندا ءسوز العان مادەنيەت جانە سپورت ءمينيسترى داۋرەن ابايەۆ پرەزيدەنت جولداۋىندا ايتىلعان مادەني مۇرالارىمىز بەن تاريحىمىزدى تانۋعا قاتىستى قويىلعان مىندەتتەرگە سايكەس، مينيسترلىكتىڭ قولعا العان اۋقىمدى جۇمىستارىنا توقتالدى.
– كىتاپ شىعارۋ ءىسىن ودان ءارى دامىتۋ ءۇشىن جاس قالامگەرلەردى قولداۋ اسا ماڭىزدى. وسى رەتتە 2023 جىلدان باستاپ جاس قازاقستاندىق جازۋشىلار مەن اقىندار ءۇشىن ارنايى پرەزيدەنتتىك ادەبي سىيلىق تاعايىندالادى. ءقازىر ءتيىستى مەملەكەتتىك ورگاندارمەن جارلىق جوباسى ازىرلەنۋدە. وعان قوسا بيىل مينيسترلىك «ۇزدىك بالالار شىعارماسى»، «جىلدىڭ ۇزدىك كىتابى»، «جاس قالامگەر» اتتى كونكۋرس-جوبالاردى جۇزەگە اسىرۋدى كوزدەپ وتىر، – دەدى مينيستر.
كەڭەستىڭ جاڭا ءتوراعاسى، ءماجىلىس دەپۋتاتى امانجول ءالتاي جاڭا قۇرامداعى «Miras»-تىڭ جۇمىسىنا ساتتىلىك تىلەي وتىرىپ، ازاماتتىق قوعام قالىپتاستىرۋ مەن مادەنيەت سالالارىن دامىتۋداعى قوردالانعان ماسەلەلەردى بىرىگىپ تالقىلاۋ، ناقتى ۇسىنىستار ايتۋ ورتاق ماقسات ەكەنىن جەتكىزدى.
– پرەزيدەنتىمىز قاسىم-جومارت توقايەۆتىڭ «جاڭا قازاقستان: جاڭارۋ مەن جاڭعىرۋ» اتتى قازاقستان حالقىنا جولداۋىندا ازاماتتىق قوعام ينستيتۋتتارى مەن ب ا ق وكىلدەرىنىڭ ءرولىن ارتتىرۋعا باسا نازار اۋدارعان بولاتىن. بۇگىنگى ءبىزدىڭ تالقىلاۋ الاڭىمىز وسى تاقىرىپقا باعىتتالادى. الەمدىك كەڭىستىكتە اقپاراتتىق شابۋىل ءورشىپ تۇرعان بۇگىنگى كۇردەلى كەزەڭدە ەلىمىزدىڭ اقپاراتتىق كەڭىستىگىن نىعايتۋ – نەگىزگى ستراتەگيالىق ماقساتىمىزدىڭ ءبىرى. بۇل تۇرعىدا پرەزيدەنت جولداۋىندا ەسكەرتىلگەندەي، قوعامىمىزدى ىدىراتۋ ءۇشىن سىرتتان بەرىلەتىن تاپسىرمالارمەن جۇمىس ىستەۋدەن، كولەڭكەلى قالاماقى ءۇشىن ساياسي كلانداردىڭ باسقا دا توپتاردىڭ ساياساتىنا اربالىپ قالۋدان ساق بولۋىمىز كەرەك. باسەكەگە قابىلەتتى جانە ەركىن، مىقتى ب ا ق قالىپتاستىرۋ ءۇشىن نە ىستەمەك كەرەك؟ – دەگەن ويدى ورتاعا تاستادى.
بۇل رەتتە «قازاق مەديا قاۋىمداستىعى» زاڭدى تۇلعالار بىرلەستىگى باسقارۋ كەڭەسىنىڭ ءتوراعاسى ەربول ازانبەك ءقازاقتىلدى اقپارات قۇرالدارى ۇشىراساتىن ءتۇيىندى ماسەلەلەرگە توقتالدى. ونىڭ ايتۋىنشا، بۇگىندە قازاق تىلىندەگى سايتتاردىڭ ءىرى جارنامالار تاپسىرىسىنا قولى جەتپەيدى. قارجى تاپشىلىعىنىڭ سالدارىنان بىلىكتى مامان جالداي المايدى، سايكەسىنشە بىلىكتى مامانسىز ساپالى كونتەنت ءوندىرۋ تاعى قيىندىق تۋعىزادى.
– مەملەكەت جانە الەۋمەتتىك جاۋاپكەرشىلىك شەڭبەرىندە بيزنەس وسى ماسەلەگە نازار اۋدارسا. مەملەكەتتىك تاپسىرىستان بولەك، ءتۇرلى تاقىرىپتاعى گرانتتىق جوبالار جاسالىپ، جەكەلەگەن جۋرناليستەر، رەداكسيالار كونكۋرس نەگىزىندە گرانتتاردى ۇتىپ الۋ ارقىلى كونتەنت جاساۋ مۇمكىندىگىنە يە بولار ەدى، – دەدى ەربول ازانبەك.
ءوز كەزەگىندە، اقپارات جانە قوعامدىق دامۋ ءمينيسترى اسقار وماروۆ ب ا ق سالاسىن قۇقىقتىق رەتتەۋدى جەتىلدىرۋ، اقپارات سالاسى قىزمەتكەرلەرىنىڭ كاسىبيلىگىن نىعايتۋ، وتاندىق باق-تىڭ باسەكەگە قابىلەتتىلىگىن ودان ءارى دامىتۋ باعىتىندا قولعا الىنعان ىستەرگە توقتالدى.
– وسى سالادا مەملەكەتتىك رەتتەۋدىڭ ءتيىمدى تەتىگىن قۇرۋ ماقساتىندا زاڭ جوباسىن ازىرلەۋ جۇمىسى باستالدى. ءبىز ۇسىنىستار جيناپ، ساراپشىلارمەن بىرلەسە وتىرىپ زاڭنامانى جەتىلدىرۋ تەتىكتەرى بويىنشا كونسەپسيا ازىرلەيمىز. ول ءۇشىن ب ا ق، ازاماتتىق قوعام، ۇەۇ وكىلدەرىن، قوعام قايراتكەرلەرى جانە باسقا دا مۇددەلى ۇيىمداردىڭ باسىن قوسىپ، ارنايى جۇمىس توبى قۇرىلۋدا، – دەدى مينيستر.
«حابار» اگەنتتىگى» اكسيونەرلىك قوعامىنىڭ باسقارما ءتوراعاسى بەرىك ءۋالي مەملەكەت باسشىسى ق.ك.توقايەۆتىڭ «جاڭا قازاقستان: جاڭارۋ مەن جاڭعىرۋ» اتتى قازاقستان حالقىنا جولداۋىنىڭ ءمانى دە ماڭىزى دا ايرىقشا ەكەنىن ايتتى.
– مەملەكەت باسشىسىنىڭ جولداۋىندا ايقىندالعان رەفورمالاردى جۇزەگە اسىرۋ كەزەڭىندە ب ا ق سالاسىنىڭ جاۋاپكەرشىلىگى، الەۋمەتتىك، كاسىبي الەۋەتى وتە زور بولماق. جاڭا قازاقستاندى قۇرۋ جولىندا ەلىمىزدىڭ باستى ارناسى بەل شەشىپ كىرىسىپ، يدەولوگيالىق تۇرعىدا جۇمىس ىستەيدى. پرەزيدەنتتىڭ باستامالارىن ءبىزدىڭ ارنالارىمىز الداعى ۋاقىتتا دا حالىققا كەڭىنەن ناسيحاتتاپ، جەتكىزۋگە قاشاندا دايىن، – دەدى.
سونداي-اق، كەڭەستە «mecenat.kz» جوباسىنىڭ ازىرلەۋشىلەرى قازاق قالامگەرلەرىنىڭ شىعارمالارىنا ارنايى بايگە جاريالايتىنى ايتىلدى. ولار جۇزدەن جۇيرىك شىققان جازۋشىنىڭ شىعارمالارىن جەكە كىتاپ ەتىپ جاريالاپ، جەڭىمپاز شىعارمانىڭ اۆتورىنا ءومىرىنىڭ سوڭىنا دەيىن اي سايىن 500 دوللار كولەمىندە سىياقى بەرۋگە نيەتتى. جوبانى ازىرلەۋشى توپتىڭ مۇشەسى، تەلەجۋرناليست ايگەرىم اعىلتايەۆا ۇلتتىق ادەبيەتتىڭ دامۋىنا ودان ءارى ۇلەس قوسۋ، ادەبيەتتە جاڭا ەسىمدەردى تانىتۋ، ۇزدىك رومانداردى وقىرمانعا ۇسىنىپ، رومان جازۋدى ىلگەرىلەتۋ ماقساتىندا قولعا الىنعان جوباعا Freedom Holding Gorp. ينۆەستيسيالىق توبىنىڭ نەگىزىن قالاۋشى، بەلگىلى قارجىگەر تيمۋر تۋرلوۆ قارجىلاي قولداۋ كورسەتەتىنىن جەتكىزدى.
