Jiynda Serik Shápkenov aldymen turǵyndardy qasietti Ramazan aiymen quttyqtady. Keiin Memleket basshysynyń «Jańa Qazaqstan: jańarý men jańǵyrý joly» atty Qazaqstan halqyna Joldaýynda aitylǵan mindetterge toqtaldy. Jinalǵandardy óńirde atqarylǵan jumystar men aldaǵy jospar barysynan habardar etti.
Oblys ákimi baiandamadan soń jinalǵandardyń suraqtaryna jaýap berdi. Jergilikti turǵyndardyń usynys-pikirlerin tyńdady.
– Myna aýylda dene shynyqtyrý saýyqtyrý kesheni salynyp jatyr. Syrty ádemi jaqsy. Qurylys bastalǵanyna 2 jylǵa jýyqtady. Onyń ashylýyn nemerelerim asyǵa kútip júr. Kún saiyn qashan baramyz dep suraidy. Sol keshendi ashyp berseńiz, – dedi Jaqsylyq Ázirbaev.
2 jarym saǵatqa sozylǵan jiynda 20-ǵa jýyq suraq qoiyldy. Turǵyndar áleýmettik sala, zeinetaqy, aýylishilik joldarǵa asfalt salý, Mahambet Ótemisuly atyndaǵy ádebi-memorialdyq mýzeiin jańartý jumystary jaiynda máselelerdi kóterdi. Negizinen jarsýattyqtardy tas joldardy tez tozdyratyn kóp tonnalyq júk kólikteri alańdatyp otyr.
Oblys ákiminiń aýyl turǵyndarymen kezdesýi Inder aýdanynyń Facebook, Instagram jelisindegi resmi paraqshalarynan tikelei efirde kórsetildi. Jiynǵa kele almaǵandar oblys ákimine áleýmettik jelilerde saýal joldaýǵa múmkindik aldy.
Aimaq basshysy qoiylǵan ár suraqqa tolyq jaýap berip, kóterilgen máseleler basymdyqtaryna qarai júieli túrde sheshiletinin jetkizdi.
– Týǵan ólkede jumys isteý men úshin mártebe. Bilimimdi, jiǵan tájiribemdi óńirdi kórkeitýge, damytýǵa jumsaimyn. Oǵan ózimniń ýádemdi beremin. Sizdermen bailanysty arttyryp, usynys-pikirlerińizdi tyńdaý úshin áleýmettik jelilerde paraqshamdy ashtym. Negizgi josparym barlyq salada turalap qalǵan máseleler boiynsha tizim jasaqtap, ony qalai, qashan sheshemiz sol baǵytta jumystanamyz. Halyq igiligine baǵyttalǵan nysandar ýaqytynda sapaly jaǵdaida paidalanýǵa berilýi kerek. Osy baǵytta áriptestermen jumys atqaramyz, – dedi oblys ákimi.
Kezdesýden soń óńir basshysy qurylysy jyldarǵa sozylǵan jańadan ashylýy kerek dene shynyqtyrý saýyqtyrý keshenine arnaiy bardy. Máselemen jeke tanysty. Qurylysqa jaýapty merdiger mekeme ókilderine bir aida qurylys jumystaryn bitirýdi mindettedi.
Jumys sapary barysynda Serik Shápkenov Jarsýat aýylynda turatyn azamattardy jeke qabyldady. Oblys ákimi kei suraqtar boiynsha jaýapty tulǵalarǵa naqty tapsyrmalar berdi.
