جيىندا سەرىك شاپكەنوۆ الدىمەن تۇرعىنداردى قاسيەتتى رامازان ايىمەن قۇتتىقتادى. كەيىن مەملەكەت باسشىسىنىڭ «جاڭا قازاقستان: جاڭارۋ مەن جاڭعىرۋ جولى» اتتى قازاقستان حالقىنا جولداۋىندا ايتىلعان مىندەتتەرگە توقتالدى. جينالعانداردى وڭىردە اتقارىلعان جۇمىستار مەن الداعى جوسپار بارىسىنان حاباردار ەتتى.
– مەملەكەت باسشىسىنىڭ تاپسىرماسىنا سايكەس ءوڭىرىمىزدىڭ الەۋمەتتىك ەكونوميكالىق دامۋىن قامتاماسىز ەتۋ ماقساتىندا ەڭ ماڭىزدى، ءتۇيىندى ماسەلەلەرىن شەشۋگە جانە ءوڭىردى ودان ءارى دامىتۋعا باعىتتالعان كەشەندى دامۋ جوسپارى بەكىتىلدى. ونىڭ اياسىندا 15 باعىت بويىنشا 187 ءىس-شارا جۇزەگە اسىرىلادى، – دەدى سەرىك شاپكەنوۆ.
وبلىس اكىمى باياندامادان سوڭ جينالعانداردىڭ سۇراقتارىنا جاۋاپ بەردى. جەرگىلىكتى تۇرعىنداردىڭ ۇسىنىس-پىكىرلەرىن تىڭدادى.
– مىنا اۋىلدا دەنە شىنىقتىرۋ ساۋىقتىرۋ كەشەنى سالىنىپ جاتىر. سىرتى ادەمى جاقسى. قۇرىلىس باستالعانىنا 2 جىلعا جۋىقتادى. ونىڭ اشىلۋىن نەمەرەلەرىم اسىعا كۇتىپ ءجۇر. كۇن سايىن قاشان بارامىز دەپ سۇرايدى. سول كەشەندى اشىپ بەرسەڭىز، – دەدى جاقسىلىق ازىربايەۆ.
2 جارىم ساعاتقا سوزىلعان جيىندا 20-عا جۋىق سۇراق قويىلدى. تۇرعىندار الەۋمەتتىك سالا، زەينەتاقى، اۋىلىشىلىك جولدارعا اسفالت سالۋ، ماحامبەت وتەمىس ۇلى اتىنداعى ادەبي-مەموريالدىق مۋزەيىن جاڭارتۋ جۇمىستارى جايىندا ماسەلەلەردى كوتەردى. نەگىزىنەن جارسۋاتتىقتاردى تاس جولداردى تەز توزدىراتىن كوپ توننالىق جۇك كولىكتەرى الاڭداتىپ وتىر.
وبلىس اكىمىنىڭ اۋىل تۇرعىندارىمەن كەزدەسۋى يندەر اۋدانىنىڭ Facebook، Instagram جەلىسىندەگى رەسمي پاراقشالارىنان تىكەلەي ەفيردە كورسەتىلدى. جيىنعا كەلە الماعاندار وبلىس اكىمىنە الەۋمەتتىك جەلىلەردە ساۋال جولداۋعا مۇمكىندىك الدى.
ايماق باسشىسى قويىلعان ءار سۇراققا تولىق جاۋاپ بەرىپ، كوتەرىلگەن ماسەلەلەر باسىمدىقتارىنا قاراي جۇيەلى تۇردە شەشىلەتىنىن جەتكىزدى.
– تۋعان ولكەدە جۇمىس ىستەۋ مەن ءۇشىن مارتەبە. ءبىلىمىمدى، جيعان تاجىريبەمدى ءوڭىردى كوركەيتۋگە، دامىتۋعا جۇمسايمىن. وعان ءوزىمنىڭ ۋادەمدى بەرەمىن. سىزدەرمەن بايلانىستى ارتتىرىپ، ۇسىنىس-پىكىرلەرىڭىزدى تىڭداۋ ءۇشىن الەۋمەتتىك جەلىلەردە پاراقشامدى اشتىم. نەگىزگى جوسپارىم بارلىق سالادا تۇرالاپ قالعان ماسەلەلەر بويىنشا ءتىزىم جاساقتاپ، ونى قالاي، قاشان شەشەمىز سول باعىتتا جۇمىستانامىز. حالىق يگىلىگىنە باعىتتالعان نىساندار ۋاقىتىندا ساپالى جاعدايدا پايدالانۋعا بەرىلۋى كەرەك. وسى باعىتتا ارىپتەستەرمەن جۇمىس اتقارامىز، – دەدى وبلىس اكىمى.
كەزدەسۋدەن سوڭ ءوڭىر باسشىسى قۇرىلىسى جىلدارعا سوزىلعان جاڭادان اشىلۋى كەرەك دەنە شىنىقتىرۋ ساۋىقتىرۋ كەشەنىنە ارنايى باردى. ماسەلەمەن جەكە تانىستى. قۇرىلىسقا جاۋاپتى مەردىگەر مەكەمە وكىلدەرىنە ءبىر ايدا قۇرىلىس جۇمىستارىن ءبىتىرۋدى مىندەتتەدى.
جۇمىس ساپارى بارىسىندا سەرىك شاپكەنوۆ جارسۋات اۋىلىندا تۇراتىن ازاماتتاردى جەكە قابىلدادى. وبلىس اكىمى كەي سۇراقتار بويىنشا جاۋاپتى تۇلعالارعا ناقتى تاپسىرمالار بەردى.
