– Ónerli otbasynda týylypsyń, qarshadaıyńnan ánshi bolýdy armandadyń ba?
– Ónerli otbasynda týylǵanyma, osyndaı ata-anam bolǵanyna ózimdi erekshe baqytty sezinemin. Ata-anam óner adamdary bolmaǵanda, qansha qulshynǵanymmen, ánshi bolýym ekitalaı edi.
– Senińshe qalaı jaqsy ánshi bolýǵa bolady?
– Menińshe, mýzykalyq jaǵynan tabysqa jetý úshin kásibı qabilet basym bolý kerek. Eń mańyzdysy, ándi júrekpen aıta bilýiń kerek. Men Maıkl Djeksonnyń, Djekı Channyń, Lýchano Pavarottıdiń jankúıerimin. Olardyń barlyǵy tabandy mańdaı terdiń arqasynda tabysqa jetken. Bárinen de mańyzdysy, olardyń bári álemdik deńgeıdegi juldyzdar bolsa da, erekshe kishipeıil, baýyrmal jandar. Sondyqtan men olardy úlgi tutamyn.
– Óner jolyńda saǵan erekshe yqpal etken adam boldy ma, sol týraly aıtyp berseń?
– Maǵan erekshe áser etken adam, árıne, meniń ata-anam. Sol kisilerdiń arqasynda osy kúnge jettim. Ustazdaryma da erekshe alǵys aıtamyn. Olar árqashanda maǵan qolushyn berip, meni qoldap keledi. Ári meniń kásibı deńgeıimniń ósýine maǵan mol bilim berdi.
– Qazaq, orys, ıtalán, frnsýz tilderinde, tipti qytaı tilinde án aıtyp álemdi tańǵaldyrdyń. Osy tilderdi qalaı úırendiń?
– Men kóp izdenemin. Operalyq baǵytta án aıtatyn bolǵandyqtan, álemniń ártúrli tilderinde áıgili operalardy oryndap kórdim. Árıne, qulshyna úırený kerek. Aldymen osy elderdiń mýzykasy men áýenin unatý kerek. Sosyn án mátinin úırenesiń. Osy ánderdi tipti tolyq túsine alasyń. Ustazdarymnyń kómegimen osy tilderdi úırenýge tyrysyp, sheteldik operalardy naqyshyna keltirip oryndadym. Sol arqyly nemis, ýkraın, fransýz, ıtalán, aǵylshyn, túrik tilderin úırendim. Qazir qytaı tilin úırenip júrmin.
– Qytaıda ótip jatqan «Singer» án baıqaýyna qalaı keldiń? Basqa halyqaralyq baıqaýlarǵa qaraǵanda qandaı ereksheligin baıqadyń?
– Baıqaýdyń bas rejıseri, tálimger Hýn Tao burynǵy meniń halyqaralyq baıqaýlarda óner kórsetkenimdi baıqap, meni osynda shaqyrdy. «Singer» baıqaýy – naǵyz ánshiler baq synaıtyn óner dodasy. Ýaqyty men aınalymy da erekshe uzaq. Ol seniń sahnadaǵy sátińdi ǵana emes, ánshiniń baıqaýǵa daıyndalý barysyn, sondaı-aq, sahnadan tys turmys-tirshiligin de kórsetedi. Kórermenderge ánshiniń ónerimen birge ómirin de tolyq tanystyrady. Men burynǵy qatysqan baıqaýlardan «Singer» jobasynyń eń úlken ereksheligi –bunda menen jasy úlken, ataǵy áıgili, tabysqa jetken ánshilermen birge baq synaýǵa týra keldi.
– «Singer» baıqaýynda ózińnen qandaı nátıje kútesiń?
– Bul suraq men úshin aýyr. Baıqaýdyń nátıjesinen buryn, eń bastysy, kórermenderdiń qoldaýyna ıe bolsam deımin. Barynsha jaqsy óner kórsetip, budan da bıik belesterge umtylyp, jankúıerlerimniń kóńilinen shyǵamyn dep oılaımyn. Sahnadaǵy áreketime keıde ózim de tánti bolatyn kezim bolady.
– Seniń ónerińnen Qazaqstan men Qytaıdyń mýzykalyq úndestigin baıqaǵandaı boldyq. Munyń syry nede dep oılaısyń?
– Eki el mýzykasynyń keıbir tustary sabaqtasyp jatady. Ózindik erekshelikteri de az emes. Qazaqstan men Qytaıdyń ánshilik óneri joǵary deńgeıde damyǵan dep aıtýǵa bolady. Qytaılyq kórermenderdiń ystyq yqylasyn kórgende beıne týǵan jerdegi dostarymnyń ystyq qushaǵyna bólengendeı sezindim. Qytaılyq ánshilerdiń Qazaqstanǵa kelip, óner kórsetýin qoldaımyn. Bizdiń elimizde olardy erekshe qyzý qarsy alady dep senemin.
– Qytaılyq ánshilerden kimdi unatasyń? Onyń ónerin qalaı baǵalaısyń?
– Meniń jaqsy kóretin ánshilerim kóp. Qytaılyq ánshilermen kóp kezdesýlerde boldym. Barlyǵy óte qarapaıym, ashyq-jarqyn, ınabatty adamdar eken. Men tálimger Han Hýndy, Lın Jyshýan tálimgerdi óte jaqsy kóremin. «Singer» baǵdarlamasy arqyly Lın Jyshýan tálimgermen tanystym. Alǵash kezikkenimizde ol kisi maǵan sondaı jaqyn sezildi. Óte kishipeıil, jyly júzdi adam.
– Qytaı men Qazaqstan – dostyq qarym-qatynastaǵy kórshi elder. Bıyl Qytaıdyń Qazaqstandaǵy týrızm jyly. Qazaqstanǵa barǵysy keletin qytaılyqtarǵa óz elińdi qalaı tanystyrar ediń?
– Bıyl maýsym aıynda Qazaqstanda EKSPO-2017 halyqaralyq kórmesi bastalady. EKSPO kórmesi tuńǵysh ret Ortalyq Azıa elinde ótkiziledi. Barlyqtaryńyzdy Qazaqstanǵa kelip, EKSPO kórmesin tamashalaýǵa, qazaqtyń ásem tabıǵatyn kórýge, dámdi taǵamdarynan aýyz tıýge shaqyramyn. Bári sátimen bolsa, men atalmysh kórmede án aıtatyn bolamyn.
– Sóz sońynda jankúıerlerińe qandaı tilek joldaısyń?
– Armandaryńyzdyń oryndalýyn, ómir joldaryńyzdaǵy kózdegen maqsattaryńyzǵa qol jetkizýlerińizdi tileımin. Armannyń barlyǵy oryndalady. Óıtkeni, sizder meniń armanymnyń oryndalýyna qoldaý kórsettińizder. Sizderdiń ár kúnińiz kóńildi, tatý-tátti, meıirimdi de syılastyqqa tolý bolýyn tileımin.
Rızabek Núsipbekuly
