Almatyda qisaiǵan úidiń turǵyndary jańa páterdi ala almaýda
82 jastaǵy zeinetkerdiń aitýynsha, páter ielerine jeltoqsannyń ortasynda jáne 2017 jyldyń 1 naýryzynda jańa baspana beriletini aitylǵan.
– Keshe, 1 naýryzda qisaiyp qalǵan úidiń mańynda jinalys boldy. Sol jaqqa Alataý aýdanynyń ákimi, onyń orynbasary, «Astana qurylys» firmasynyń prezidenti jáne biz, páter ieleri bardyq. Jańadan salynǵan úi jeke dep, sondyqtan eski úige aiyrbastap bere almaityndaryn aitty. Al biz qisaiyp qalǵan úiimizdi memlekettik baǵdarlamamen alǵanbyz. Qurylys kompaniiasyndaǵylar qazir biz turyp jatqan úidiń naýryz aiynyń jalǵa alý qunyn tólep qoiǵanyn aitty. Biraq jiynda aýdan ákimi kompaniia prezidentine eki apta ýaqyt berdi. Kompaniia basshysy osy merzim ishinde qansha turǵynnyń qisaiǵan úide qalatynyn jáne qansha turǵynnyń jańa úige kóshetinin anyqtaýy qajet, – dedi Kúlásh Abylaeva.
Abylaeva páterin memlekettik baǵdarlama arqyly 14 jyl boiy kezekte turǵannan keiin alǵanyn aitty. 2015 jyldyń qyrkúieginde olar Alǵabas yqshamaýdanyndaǵy páterge kóship kelgen, al toǵyz aidan keiin úi qisaiyp, olar kóship ketýge májbúr bolǵan.
Bastapqyda olarǵa arnalyp salynatyn jańa úige alty ai ishinde kóshirýge ýáde berilgen eken. «Alaida sol kúnnen beri 10 ai ótti. Áli kúnge deiin kóship bara almai otyrmyz, óte qiyn. Dala kezip júrmiz. Kózim nashar kóredi, 4 sáýirde ota jasatamyn. Qozǵalýym qiyn, nemeremmen jáne kenje qyzymmen birge turyp jatyrmyn. Úide bes balasy bar», – dedi egde jastaǵy áiel.
Alataý aýdanynyń ákimi osy jaǵdaiǵa bailanysty pikir bildirdi. Baǵdat Manzorovtyń aitýynsha, Alǵabastaǵy kópqabatty úidiń turǵyndaryna jańa úi salynyp qoiǵan jáne paidalanýǵa berilgen. Alaida sol úige turǵyndardy kóshirý zań turǵysynda múmkin bolmai otyr.
– Biz qazir qurylys kompaniiasymen jumys istep jatyrmyz, olar adamdardy jańa úige tezirek kóshirýi kerek. Keibir turǵyndar qisaiyp qalǵan úige kóship barǵysy keledi. Ol tolyqtai jóndeldi, seismikalyq jaǵynan jaramdy degen qujat ta bar. Munda másele mynada – eger osy qisaiyp qalǵan úi apat jaǵdaiynda bolsa, turǵyndary sol jaqtaǵy basqa úige esh qiyndyqsyz kóship bara alar edi. Biraq qisaiǵan úi apat jaǵdaiynda emes bolǵandyqtan, turǵyndar páterin tek sottyń sheshimimen almastyra alady. Biz, ákimdik páterlerin óz betimizben aýystyryp bere almaimyz. Qisaiyp qalǵan úi memlekettiń múlki, al jańa salynǵan úi «Astana qurylys» degen jeke kompaniianyń úii. Osyndai qiyndyqtar paida boldy. Keibir turǵyndar eski úide qala bergisi keledi, keibiri kóshkisi keledi. Qazir naqty sanyn anyqtap jatyrmyz, – dedi Manzorov.
