Qazaqstannyń Atom energiiasy jónindegi agenttigi 2027 jyly basshylyqty kólikpen qamtamasyz etýge 60,5 mln teńge jumsaýdy josparlap otyr. Memlekettik satyp alý aiasynda vedomstvo júrgizýshileri bar biznes nemese ókildik sanatyndaǵy alty sedan jaldamaq. Áleýetti jetkizýshiler ótinimderin 20 qarashaǵa deiin bere alady, dep habarlaidy dalanews.kz.
Tehnikalyq erekshelikke sáikes, agenttikke usynylatyn alty kóliktiń shyǵarylǵan jyly 2017 jyldan erte bolmaýy kerek. Barlyǵy avtomatty berilis qorabymen jáne tórt esigimen jabdyqtalýy tiis.
Alaida kólikterge qoiylatyn talaptar birdei emes. Bir sedannyń memlekettik nómirinde KZ áriptik indeksi bolýy jáne qozǵaltqysh kólemi keminde úsh litr bolýy qajet. Qalǵan bes kólikke QR, UD jáne IB indeksteri qarastyrylǵan, al qozǵaltqysh kólemi tórt litrden aspaýy tiis.
Memlekettik nysandarǵa kedergisiz kirý
Agenttik kólikterdiń memlekettik ǵimarattarǵa erkin kirip-shyǵýyna da erekshe talap qoiǵan. Avtomobilder Aqorda, Úkimet úii, Parlament, ministrlikter men basqa da memlekettik mekemelerdiń ortalyq kireberisterine kedergisiz jaqyndai alýy kerek.
Budan bólek, jetkizýshi Astana áýejaiynyń jolaýshylar terminalynyń birinshi jelisine, sondai-aq ulttyq kompaniialar men holdingterdiń ǵimarattaryna kirý múmkindigin qamtamasyz etýge mindetti.
Tehnikalyq qujatta jetkizýshi kelisimshartqa qol qoiylǵannan keiin bes jumys kúni ishinde atalǵan aýmaqtarǵa turaqty ári kedergisiz kirý múmkindigin rastaityn kepildik hat usynýy kerektigi kórsetilgen.
Kólikter táýlik boiy qyzmet kórsetedi
Agenttik kólik qyzmetin táýlik boiy, sonyń ishinde demalys jáne mereke kúnderi paidalanýdy josparlap otyr. Qajet bolǵan jaǵdaida avtomobilder Qazaqstannyń óńirlerine issaparǵa shyǵýy tiis. Mundai saparǵa daiyndalý úshin jetkizýshige bir táýlik beriledi.
Kólikterdiń tehnikalyq jáne syrtqy jaǵdaiyna da talap qoiylǵan. Kýzovynda kózge kórinetin aqaýlar bolmaýy, al salonynda temeki tútininiń, janarmaidyń nemese basqa da jaǵymsyz iisterdiń bolmaýy qajet. Júrgizýshiler iskerlik kiim úlgisin saqtaýy tiis.
Avtomobil buzylǵan nemese jol-kólik oqiǵasyna ushyraǵan jaǵdaida jetkizýshi dál sondai kólik nemese biznes-klastan tómen emes balama usynýǵa mindetti.
60,5 mln teńgege qandai shyǵyndar kiredi?
Memlekettik satyp alýdyń bastapqy quny QQS-syz 60 mln 548 myń 275 teńge 86 tiyndy quraidy. Qyzmetter 2027 jyldyń 1 qańtarynan 31 jeltoqsanyna deiin kórsetilýi kerek.
Alaida bul somanyń barlyǵy jetkizýshige avtomatty túrde tólenbeidi. Qujatqa sáikes, esep aiyrysý naqty kórsetilgen qyzmet kólemine, iaǵni qyzmet usynylǵan kúnder sanyna qarai júrgiziledi.
Bólingen qarajatqa janarmai, tehnikalyq qyzmet kórsetý, jóndeý, qosalqy bólshekter, saqtandyrý jáne júrgizýshilerdiń jalaqysy kiredi. Sondai-aq jetkizýshi olardyń ústeme jumysyn, issaparlaryn jáne mereke kúnderindegi eńbegin tóleýi tiis.
Agenttik avtomobilderdiń júrisin jol paraqtary arqyly kún saiyn baqylaýdy kózdep otyr. Eger kólik belgilengen júris limitine jetse, jetkizýshi aidyń sońyna deiin ony usynýdy ýaqytsha toqtata alady.