19 litrlik aýyz sýdan abai bolyńyz
Qysy-jazy saýdasy saiabyrsymaityn sýǵa toly 19 litrlik bóshkeler jarnamasyna qarasaq óte sapaly ári paidaly. Mamandar osy sýdy saraptamadan ótkizip, tekserip kórdi.
«Adamǵa kerekti iondar – natrii, kalii, magnii, kaltsii kationdary sý quramynda bar. Biraq mólsheri tómen», – deidi sarapshy maman.
Saraptama qorytyndysy jarnamaǵa qarama-qarsy shyqty. Paidasynan zardaby zildei eken. Sebebi sýdy súzgiden ótkizgende quramydaǵy aǵzaǵa qajetti himiialyq elementter joiylyp ketedi de, óli sýǵa ainalay.
«Kation, anion elementteri adamǵa qajet. Onyń jetispeýshiliginen adamnyń baýyr, búirek músheleri dertke shaldyǵýy múmkin. Balalardyń kórý qabileti de tómendeidi. Tisteri usaqtalyp túse bastaidy», – dedi maman.
Taǵy bir qyzyǵy qutydaǵy bulaqtyń emes, kádimgi krannyń sýy. Tek onyń túsin móldiretip qoiǵany úshin siz ben biz qaltamyzdan tekke qarjy shyǵaryp otyrmyz. Aitalyq, krandaǵy 5 litr sýǵa 24 teńge tólesek, sol mólsherdegi bótelkedegi sýǵa 131 teńge sanap beremiz. Onyń ústine quramyndaǵy mikroelementterdiń barlyǵy joiylyp ketken.
Zerthanada 8 sý óndirýshiniń ónimine saraptama jasaldy. Qorytyndysy qýantpaidy. Osy sebepti qutydaǵy sýdy satyp almas buryn zerthana taldamasyn talap etý qajet deidi mamandar.
Astanadaǵy 19 litrli sý óndirip jatqan mekemelerdiń birqataryna baryp sapa sertifikatyn suradyq. Bir de bireýi taýyp bere almady. Alaida, osy sýlardyń sapasyn baqylap, qadaǵalaityn mekeme mamandary alańsyz. Tutynýshylardyń quqyǵyn qorǵaý departamenti «sýdyń quramynda qaýipti eshnárse joq» dep jaibaraqat otyr.
«23 tirkelgen mekemeniń úsheýi tekserildi. Quramy talaptarǵa sai. Qalǵanynyń merzimi kelgen joq», – deidi Astana qalasy tutynýshylar quqyǵyn qorǵaý basqarmasynyń bas memlekettik sanitarlyq dárigeri Gúlbaný Izdáýletova.
Eki memlekettik mekemeniń bailamy taǵy eki túrli. Tekserý qorytyndylary da bólek. Tek, sanepidimiolog mamandar sý óndirýshi mekemelerdiń sanitarlyq tazalyǵy nashar ekendigin aitty. Olarǵa jaza aiyppulmen shektelgen.
Derekkózi: stan.kz
