– Elbasymyzdyń «Bolashaqqa baǵdar: rýhanı jańǵyrý» maqalasynda Qazaqstannyń kıeli jerleriniń kartasyn ázirleý tapsyrylǵan bolatyn. Atalǵan joba aıasynda óńirimizdegi birqatar qasıetti jerlerdi jańǵyrtý, qaıta qalpyna keltirý sharalary qolǵa alyndy. Solardyń biri – «Domalaq ana» kesenesi búgin qaıta jańǵyryp, kelýshilerge jańa qonaq úı keshenin usynyp otyr. Jalpy qazaq halqy úshin Domalaq ananyń orny bólek. Endeshe, jańa keshen, keseneniń jańǵyrýy qutty bolsyn! – dedi Janseıit Qanseıituly.
Ana rýhyn qurmetteıtin janashyr azamattardyń demeýshiligimen boı kótergen keshende zıarat etýshilerge barlyq jaǵdaı jasalǵan. Onda qonaqtarǵa arnalǵan jatyn bólmeler, ashana, kıiz úı pishindes oryndyqtar men ózge de turmystyq ǵımarattar bar. Qonaq úıdi aralap kórgen óńir basshysy aldaǵy ýaqytta «Domalaq ana» kesenesine zıarat etýshilerdiń qatary arta túsetinine senim bildirdi.
Aıta keteıik, Qazaqstannyń kıeli jerleriniń kartasy jobasy aıasynda OQO-da 104 kıeli orynnyń tizimi jasaqtalǵan bolatyn. Onyń 17-i respýblıkalyq mańyzy bar tizimge engizilgen. «Domalaq ana» kesenesi solardyń biri jáne biregeıi sanalady. Kesene Qarataýdyń kúngeı betinde, Balabógen ózeniniń ańǵarynda ornalasqan. Domalaq ana, ıaǵnı Nurıla Álı Symanqyzy – halqymyzdyń abyz analarynyń biri sanalady. 1456 jyly Domalaq ananyń nemeresi Dýlat Buharadan Abdýlla Sheri esimdi ustany aldyrtyp, alǵash ret kesene turǵyzǵan. Odan keıin kesene birneshe ret buzylyp, qaıta jóndeýden ótti. Búginde eńsesi bıik záýlim ǵımarat kúnnen kúnge kórkeıip keledi. Jańadan paıdalanýǵa berilgen «Qonaq úı kesheni» bolashaqta osynda keletin týrıser sanynyń artýyna erekshe serpin bermek.
Budan bólek, óńirimizde týrızm salasyn damytý maqsatynda tarıhı oryndardy qalpyna keltirý úshin arnaıy baǵdarlama daıyndalyp, kezeń-kezeńimen iske asyrylyp keledi. Mysaly, aldaǵy ýaqytta Qazyǵurt, Ordabasy taýlaryn jáne ortaǵasyrlyq Otyrar, Saýran, Saıram, Sıdaq, Mártóbe qalashyqtary men Jýantóbe, Qaraspan, Kúltóbe sıaqty ejelgi eldi mekenderdi qalpyna keltirý jumystary bastalmaq. Sonymen qatar, bolashaqta Saıram aýdanyndaǵy «Hanqorǵan» arheologıalyq qalashyǵy ashyq aspan astyndaǵy mýzeıge aınalatyn bolady.
OQO ákimdiginiń baspasóz qyzmeti
