Májilis depýtaty Temir Qyryqbaev premer-ministrdiń orynbasary Ermek Kósherbaevqa depýtattyq saýal joldap, bilim berý salasynda kóbine qai óńirlerde jemqorlyq tirkeletinin aitty, – dep habarlaidy Dalanews.kz.
Depýtat resmi derekterdi keltirdi. Sybailas jemqorlyqqa qarsy is-qimyl agenttiginiń málimeti boiynsha 2023 jyldyń basynan beri bilim berý salasynda 303 qylmystyq is tirkelip, jalpy shyǵyn 17,5 mlrd teńgege jetken.
"Kóp qarjy jymqyrý deregi Jetisý, Túrkistan, Qyzylorda, Almaty oblysynda jáne Almaty qalasynda anyqtaldy. Bul aimaqtarda qarjylyq baqylaý álsizdigi baiqalady.
Derekti tereń taldaityn bolsaq, 249 adam jaýapkershilikke tartylǵan. Olardyń arasynda 10 bilim bóliminiń basshysy, 2 kolledj direktory, 28 mektep direktory, 21 balabaqsha basshysy jáne 136 esepshi bar. Pedagogikalyq kadrdy irikteýdiń jańa erejesi engizilgenine qaramastan, burynǵy zańsyzdyqtardy ainalyp ótý jáne jemqorlyq táýekelin týdyrý múmkindigi saqtalyp otyr", - dedi depýtat.
Temir Qyryqbaevtyń aitýynsha, halyq arasynda mektepke jumysqa ornalasý úshin direktorǵa nemese basqarma qyzmetkerine «zańsyz syiaqy» berý qajet degen qaýeset jeldei esip júr.
"Ońtústik óńirde jumyssyzdyq statistikada kórsetilgennen áldeqaida joǵary. Aýyldyq jerlerde mektep, balabaqsha, klýb úiinen basqa jumys kózi tapshy. Sondyqtan muǵalim bolýǵa talpynatyndar tym kóp. Tipti laborant nemese tehnikalyq qyzmetker bolý úshin de zańsyz aqsha berý jaǵdailary kezdesedi. Sonymen qatar, qyzmetkerlerdiń jumystan shyqpaý úshin jalaqysynyń bir bóligin berý faktileri týraly da aitylyp otyr.
Shyntýaitynda, muǵalim – tek bilim berýshi ǵana emes, bolashaq urpaqtyń adamgershilik qundylyǵyn qalyptastyrýshy tulǵa. Al kásibi biliktiligi tómen mamandardyń, tipti zańsyz jolmen jumysqa ornalasqandardyń sabaq berýi bilim júiesindegi adaldyq pen kásibi etikanyń buzylýyna ákeletini anyq", - dedi ol.
Depýtat Úkimetke mynadai sharalardy qabyldaýdy usyndy:
1) «Elektrondyq mektep» syndy elektrondyq júielerdi engizip, bilim berý salasyndaǵy kadrlardy basqarýdyń biryńǵai elektrondyq bazasyn qurýdy tezdetý;
2) Jumysqa ornalasý protsesiniń ashyqtyǵyn qamtamasyz etip, pedagogikalyq kadrlardy irikteýdiń ashyq jáne ádil júiesin qamtamasyz etý;
3) Qoǵamdyq baqylaýdy kúsheitý mańyzdy. Iaǵni ata-analar komiteti jáne basqa qoǵamdyq uiymdardyń bilim berý protsesine jáne qarjylyq qyzmetke qatysýyn keńeitý.
