Jetisý oblysynda Naýryzǵa arnalǵan merekelik sharalarda biyl mereitoiy atalyp ótiletin tarihi tulǵalardyń eńbegi keńinen dáripteldi. Atap aitqanda, Taldyqorǵandaǵy «Jastar» saiabaǵynda 190 jyldyqtaryna orai «Baqtybai Jolbarysuly aýyly» jáne «Shoqan Ýálihanov aýyly», 180 jyldyǵyna orai «Abai Qunanbaiuly aýyly», 120 jyldyǵyna orai «Qanabek Baiseiitov aýyly», 95 jyldyǵyna orai «Ánýar Álimjanov aýyly», 80 jyldyqtaryna orai «Jumatai Jaqypbaev aýyly» jáne «Quman Tastanbekov aýyly» tigilip, munda kórnekti tulǵalardyń ómiri men elge sińirgen eńbegine arnalǵan kórmeler uiymdastyrylyp, teatrlandyrylǵan kórinister qoiyldy. Sol siiaqty Qazaqstan halqy Assambleiasynyń 30 jyldyǵyna orai «Dostyq aýyly» kiiz úiinde ult pen ulystar dostyǵy pash etildi, – dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
«Áz Naýryz – Ulystyń uly kúni» degen taqyrypta ótkizilgen Taldyqorǵandaǵy bul merekelik sharaǵa oblys ákimi Beibit Isabaev qatysty.
Saiabaq sahnasyndaǵy saltanatty shara Naýryz meiramynyń mánin ashatyn teatrlandyrylǵan kórinispen bastaldy. Jetisýlyqtardy osy kúni merekemen oblys ákimi Beibit Isabaev quttyqtap, Naýryznama onkúndigin ótkizýdiń mán-mańyzyna toqtaldy. Býrabaida ótken IV Ulttyq Quryltaida Memleket basshysy atap kórsetkendei, ortaq ideologiialyq maqsattar Naýryzdyń filosofiiasymen úndesip jatqanyn jetkizdi. Sol siiaqty «Taza Qazaqstan» ekologiialyq baǵdarlamasynyń jastardy qorshaǵan ortaǵa degen qamqorlyqqa, eńbek qundylyǵyn dáripteýge úiretetin róline toqtaldy.
– Naýryz merekesi – bizge myńjyldyqtardan miras bolǵan halqymyzdyń airyqsha muralarynyń biri. Naýryzdy merekeleý aiasynda oblysymyzdyń túkpir-túkpirinde 230-dan astam san túrli is-shara ótkizilýde. Naýryz kúnderi 5 myńǵa jýyq aǵash otyrǵyzdyq. Kómekke muqtaj jandarǵa qaiyrymdylyq aktsiialary uiymdastyryldy. Mundai sharalar jyl boiy úzdiksiz jalǵasyp keledi. Bul – bizdiń Jetisý halqynyń yntymaǵynyń aiqyn kórinisi, – dedi Beibit Isabaev.
Osy kúni ulttyq sport túrlerinen jarystar ótkizildi, sondai-aq taldyqorǵandyq jas sportshylarǵa fýtbol doptary taratyldy. Sol siiaqty «Taldyqorǵan barysy» finalisteriniń beldesýi jáne jeńimpazdardy marapattaý rásimi ótti.
Búgin fýtbol dobyna ie bolǵandardyń ishine M.Lomonosov atyndaǵy № 5 mektep-litseidiń 5 «Á» synyp oqýshysy Murat Baǵdáýlette bar.
– Biz otbasymyzben sportty jaqsy kóremiz. Aǵam bokspen, inim karatemen ainalysady. Al meniń «Bolashaq» mamandandyrylǵan sport mektebinde fýtbolǵa qatysyp júrgenime bir jyl boldy. Jazda jarysqa baramyz dep daiyndalyp jatyrmyz. Búgin fýbtol doptaryn taratty. Bul biz úshin merekege erekshe syilyq boldy. Bolashaqta elimizdiń ulttyq quramasynda oinaǵym keledi, – dedi jas sportshy.
Qazaq halqynyń jáne oblysta turatyn basqa da ult pen ulystardyń etno-mádeni kórmesi, «Sheberler aýylynda» qala kásiporyndarynyń qatysýymen «Qazaqstanda jasalǵan» kórme-jármeńkesi uiymdastyryldy.
Jalpy búgingi Naýryz merekesiniń uiymdastyrylýy jaily oblystyq mádeniet, arhivter jáne qujattama basqarmasynyń basshysy Qýanysh Súleimenov qysqasha aityp berdi:
– Naýryz merekesi Naýryznama tujyrymdamasyna sai keń kólemde uiymdastyrylyp otyr. Is-sharalarda Ulystyń uly kúniniń filosofiiasyndaǵy qundylyqtardyń bári qamtyldy. Búgin oblys ortalyǵynda merekege orai 21 kiiz úi tigildi. Sonyń ishinde biyl mereitoiy atap ótiletin Jetisýda týǵan kórnekti tulǵalardyń atymen atalǵan aýyldar da bar. Osy qairatkerlerdiń halyq óneri men mádenietine sińirgen eńbekterin barynsha nasihattap, kópshilikke tanytýdy maqsat tuttyq. Osylaisha Naýryz merekesi mereitoilyq jyldy bastap berdi deýge bolady. Mundai igi ister jalpyulttyq sanany qalyptastyrýǵa, mádeni-tarihi muralarymyzdy saqtaýǵa yqpal etedi dep oilaimyn, – dedi ol.
– Búgin kishi balam men nemeremdi Naýryz merekesine arnaiy alyp shyqtym. Naýryz toiynyń halyq arasynda qalai toilanatynyn kishkentaiynan kórip ósse, esinde jattalyp qalady ǵoi. Sondyqtan osyndai kópshilik ortany kórsetip, halyqtyń salt-dástúrin shamamyz kelgenshe úide de uǵyndyryp otyrýǵa tyrysamyz. Búgin mereke bar sán-saltanatymen keremet ótip jatyr. Kiiz úilerdi aralap kórdik. Ulttyq buiymdar, ulttyq taǵamdar kórmelerin tamashaladyq. Kóp kójeden dám tattyq. Kóńil kúiimiz keremet. Barsha jetisýlyqtardy Naýryz merekesimen quttyqtaimyn, Ulys oń bolsyn, – dedi taldyqorǵandyq Áliia Ońǵarova.
Aimerei Hairýlla, №28 IT mektep-litseiiniń 4 synyp oqýshysy:
– Jasym 9-da. Oqý ozatymyn. Búgin Naýryzǵa qazaqsha kóilegimdi kiip, áshekeilerimdi taǵyp, ájemmen birge keldim. Árbir kiiz úidiń aldynda ájeler shashý shashyp, balalar shashý terdik. Kórmelerden qoldan jasalǵan ádemi zattardy kórdik. Kontsert tamashaladyq. Naýryz merekesi maǵan qatty unaidy, – dedi ol.
Merekelik shara jergilikti óner ujymdarynyń «Naýryz shashý» kontserttik baǵdarlamamen túiindeldi.
Jalpy Naýryzǵa arnalǵan buqaralyq sharalar óńirdiń barlyq aýdan-qalalarynda keńinen atap ótildi. Máselen, Alakól aýdanynda 8-10 jas aralyǵyndaǵy balalar arasynda 13 keli salmaqty kóterý saiysy ótip, jeńimpazǵa qozy syiǵa tartyldy. Al Sarqan aýdanynda ulttyq dástúrler men qundylyqtardy dáripteý maqsatynda 13-18 jas aralyǵyndaǵy jasóspirim qyzdarǵa arnalǵan «Hanshaiym – 2025» baiqaýy uiymdastyryldy.
Atap ótsek, búgin Naýryz merekesiniń sharalary aiaqtalǵan soń qala tazalyǵyn saqtaýǵa ules qosý úshin «Jastar» saiabaǵyna oblystyq mádeniet salasynyń qyzmetkerleri tazalyq jumystaryn júrgizdi. Tazalyq sharasyna 200-dei adam qatysty.
