Qonaev – Almaty oblysynyń ákimshilik ortalyǵynda Naýryz meiramy keń aýqymda toilandy. Ortalyq alańda 25 kiiz úi tigildi, olardyń árqaisysynda qazaq halqynyń dástúrleri kórsetildi. Merekege kelgen qonaqtarǵa ulttyq salt-dástúrler tanystyrylyp, naýryz-kóje men baýyrsaq usynyldy, – dep habarlaidy Dalanews.kz Almaty oblysy ákiminiń baspasóz qyzmetine silteme jasap.
Almaty oblysynyń ákimi Marat Sultanǵaziev merekelik sharalarǵa qatysyp, qala turǵyndary men qonaqtaryn Naýryzben quttyqtady. Ol bul meiramnyń birlik pen jańarý simvoly ekenin atap ótti:
– Bul mereke bizdi biriktiredi. Dástúrlerimizdi urpaqtan-urpaqqa jetkizý – bizdiń mindetimiz. Sebebi dál osy qundylyqtar halqymyzdy myqty ári birtutas etedi, – dedi Marat Sultanǵaziev.
Merekege Vengriia, Qytai, Qyrǵyzstan, Litva, Túrkiia jáne AQSh-tyń bas konsýldary men attasheleri, sondai-aq Mońǵoliia men Úndistannyń konsýldary qatysty. BUU agenttikteri men missiialarynyń ókilderi, belgili mádeniet qairatkerleri de sharada boi kórsetti.
Qonaev kóshesiniń boiynda qolóner sheberleriniń jármeńkeleri men saýda qatarlary uiymdastyryldy. Qalalyq saiabaqta ulttyq sport túrlerinen jarystar ótti. Al ortalyq alań merekeniń basty ordasyna ainaldy – úlken sahnada qazaqstandyq estrada juldyzdary men jergilikti ónerpazdar óner kórsetti.
Kórermenderdi erekshe tańǵaldyrǵan sát – Qazaqstannyń halyq ártisi, kompozitor jáne dirijer Nurǵisa Tilendievtiń 100 jyldyǵyna arnalǵan Talǵar aýdany boiynsha bilim bólimine qarasty orta mektep oqýshylarynyń qatysýymen, Respýblikalyq “Kúi kúmbiri” chellendjinde 200 jýyq oqýshy “Ata tolǵaýy” kúiin oryndady.
21 naýryz keshinde alańda tanymal ánshilerdiń qatysýymen merekelik kontsert ótti.
Merekelik sharalar búkil oblysty qamtydy – barlyq aýdan men aýyldyq okrýgterde ulttyq sport túrlerinen jarystar jáne mádeni baǵdarlamalar uiymdastyryldy. Sonymen qatar, Naýryz meiramy óńirdiń barlyq aýdandyq jáne qalalyq ortalyqtarynda 22 kúni jalǵasyn taýyp keńinen atalyp ótildi.
