Túrkistan oblysynda Ulystyń uly kúni – Naýryz meiramy keń kólemde toilanyp jatyr. «Naýryznama» onkúndigi aiasynda uiymdastyrylǵan merekelik is-sharalar qala turǵyndary men qonaqtaryna erekshe kóńil-kúi syilaýda, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Búgin oblys ortalyǵynda «Qosh keldiń, áz Naýryz!» merekelik is-shara ótti. Saltanattty jiynǵa Túrkistan oblysynyń ákimi Nuralhan Kósherov arnaiy qatysyp, óńir turǵyndary men qonaqtaryn quttyqtady.
– Sizderdi Ulystyń uly kúni – Áz-Naýryz merekesimen shyn júrekten quttyqtaimyn! Ulys oń bolsyn! Naýryz – molshylyq pen jańarýdyń meiramy! Babalarymyz 5 myń jyldan beri Naýryzdy jyl basy retinde atap keledi. Naýryz Ońtústikten bastalady. Bul kúni halqymyz mol dastarqan basynda aq tilekterin aitady. Naýryzda el aimaqty tazalap, bulaq kózin ashyp, aǵash otyrǵyzǵan.
Osy rette «Taza Qazaqstan» baǵdarlamasy eldik dástúrmen úilesip tur. Barshańyzdy tabiǵatty aialap, aýlamyzdy, aýyldarymyzdy tazalap, kóshet egýge shaqyramyn. Naýryzdy Túrkistanda qarsy alýdyń jóni bólek. Sebebi bul tarihi shahar – ultymyzdyń altyn besigi. Taiaýda Memleket basshysy Qasym-Jomart Kemeluly «Túrkistan qalasynyń erekshe mártebesi týraly» zańǵa qol qoidy. Óńirdi jan-jaqty damytýdy tapsyrdy. Oblysta osy baǵytta tiisti jumystar atqarylyp jatyr. Jańa mártebe qalamyzdyń odan ári damýyna tyń serpin beredi. Eń bastysy tarihi eskertkishterdi qorǵaý kúsheitiledi.
Qoja Ahmet Iasaýi kesenesin saqtap, urpaqtan-urpaqqa jetkizý – paryzymyz. Túrkistandy jańa mártebesine sai damytamyz. Búginde shaharda halyqaralyq talapqa sai eskek esý kanaly men «Qolónershiler qalashyǵynyń» júrgizilýde. Biyl tapsyrylady. Zaman talabyna sai ippodrom salynýda. Týristik ortalyqqa ainaldyrý baǵytynda jumystar jandanady. Shahardaǵy indýstrialdy aimaqta zaýyttar ashylýda.
Túrkistan óńiriniń eńbekqor turǵyndary kóktemniń ár kúni jylǵa azyq ekenin jaqsy biledi. Biyl belgilengen 900 myń gektar egis kóleminiń 700 myń gektar jeri jyrtyldy. 5 myń gektarǵa erte pisetin kókónister egildi. Biz osy salada qaita tereń óńdeý, aǵyn sý tapshylyǵy jáne kanaldardyń tozý máselesin sheshýdi qolǵa aldyq. Maqta, júgeri jáne et klasterin damytamyz. Túrki áleminiń mádeni-rýhani ortalyǵy – Túrkistan óńirinde Naýryz joǵary deńgeide atap ótilýde. Barshańyzdy Naýryz merekesimen quttyqtap, otbasylaryńyzǵa amandyq pen bereke tileimin! – dedi Nuralhan Kósherov.
Túrkistannyń eń kórikti oryndarynyń birine ainalǵan «Kerýen sarai» keshenine jinalǵan adam qarasy kóp. Ulttyq dástúr men ónerdi qamtyǵan mazmundy baǵdarlamar daiyndalǵan. Qolóner sheberleri men sýretshilerdiń kórmesi uiymdastyrylyp, kelýshiler qazaq halqynyń bai mádenietimen tanysty. Ulttyq taǵamdar kórmesi arqyly salt-dástúrimiz dáripteldi. Ulttyq sport túrlerinen jarystar ótip, Naýryz meiramynyń aishyqty dástúri jalǵasyn tapty.
Kontsert barysynda ulttyq aspaptarda oryndalǵan áýender men halyq bileri, túrki halyqtarynyń mýzykalyq óneri, qazaqtyń «Toibastar», «Naýryz-Dýman» jáne ózge de ánderi, «Jarapazan» turmys-salt jyry jáne dástúrli óner qoiylymdary qamtylǵan. Kúi kúmbirlep, bishiler bi biledi. Ondaǵan kiiz úiler tigilip oblysymyzben qatar elimizdiń ózge óńirlerinen jáne shetelden kelgen saiahatshylar Túrkistan tórindegi Naýryz toiyna kýá boldy.
Aita keteiik, Ulystyń uly kúnindegi mazmundy is-sharalar qazaq estrada juldyzdarynyń qatysýymen «Án men ánshi Túrkistan tórinde» atty kontserttik baǵdarlamasymen, «Turan dala, áz Túrkistan» atty respýblikalyq aqyndar aitysymen jalǵasyn taýyp, «Shámshi. Vals koroli» spektakli sahnalanady.
Túrkistan oblysynyń barlyq aýdan, qalasynda Naýryz dýmany joǵary deńgeide uiymdastyrylyp, eldiń eńsesi kóterilip, jurtshylyq jyldy jaqsy kóńil-kúimen qarsy alýda.
