تۇركىستان وبلىسىندا ۇلىستىڭ ۇلى كۇنى – ناۋرىز مەيرامى كەڭ كولەمدە تويلانىپ جاتىر. «ناۋرىزناما» ونكۇندىگى اياسىندا ۇيىمداستىرىلعان مەرەكەلىك ءىس-شارالار قالا تۇرعىندارى مەن قوناقتارىنا ەرەكشە كوڭىل-كۇي سىيلاۋدا، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
بۇگىن وبلىس ورتالىعىندا «قوش كەلدىڭ، ءاز ناۋرىز!» مەرەكەلىك ءىس-شارا ءوتتى. سالتاناتتتى جيىنعا تۇركىستان وبلىسىنىڭ اكىمى نۇرالحان كوشەروۆ ارنايى قاتىسىپ، ءوڭىر تۇرعىندارى مەن قوناقتارىن قۇتتىقتادى.
– سىزدەردى ۇلىستىڭ ۇلى كۇنى – ءاز-ناۋرىز مەرەكەسىمەن شىن جۇرەكتەن قۇتتىقتايمىن! ۇلىس وڭ بولسىن! ناۋرىز – مولشىلىق پەن جاڭارۋدىڭ مەيرامى! بابالارىمىز 5 مىڭ جىلدان بەرى ناۋرىزدى جىل باسى رەتىندە اتاپ كەلەدى. ناۋرىز وڭتۇستىكتەن باستالادى. بۇل كۇنى حالقىمىز مول داستارقان باسىندا اق تىلەكتەرىن ايتادى. ناۋرىزدا ەل ايماقتى تازالاپ، بۇلاق كوزىن اشىپ، اعاش وتىرعىزعان.
وسى رەتتە «تازا قازاقستان» باعدارلاماسى ەلدىك داستۇرمەن ۇيلەسىپ تۇر. بارشاڭىزدى تابيعاتتى ايالاپ، اۋلامىزدى، اۋىلدارىمىزدى تازالاپ، كوشەت ەگۋگە شاقىرامىن. ناۋرىزدى تۇركىستاندا قارسى الۋدىڭ ءجونى بولەك. سەبەبى بۇل تاريحي شاھار – ۇلتىمىزدىڭ التىن بەسىگى. تاياۋدا مەملەكەت باسشىسى قاسىم-جومارت كەمەل ۇلى «تۇركىستان قالاسىنىڭ ەرەكشە مارتەبەسى تۋرالى» زاڭعا قول قويدى. ءوڭىردى جان-جاقتى دامىتۋدى تاپسىردى. وبلىستا وسى باعىتتا ءتيىستى جۇمىستار اتقارىلىپ جاتىر. جاڭا مارتەبە قالامىزدىڭ ودان ءارى دامۋىنا تىڭ سەرپىن بەرەدى. ەڭ باستىسى تاريحي ەسكەرتكىشتەردى قورعاۋ كۇشەيتىلەدى.
قوجا احمەت ياساۋي كەسەنەسىن ساقتاپ، ۇرپاقتان-ۇرپاققا جەتكىزۋ – پارىزىمىز. تۇركىستاندى جاڭا مارتەبەسىنە ساي دامىتامىز. بۇگىندە شاھاردا حالىقارالىق تالاپقا ساي ەسكەك ەسۋ كانالى مەن «قولونەرشىلەر قالاشىعىنىڭ» جۇرگىزىلۋدە. بيىل تاپسىرىلادى. زامان تالابىنا ساي يپپودروم سالىنۋدا. تۋريستىك ورتالىققا اينالدىرۋ باعىتىندا جۇمىستار جاندانادى. شاھارداعى يندۋستريالدى ايماقتا زاۋىتتار اشىلۋدا.
تۇركىستان ءوڭىرىنىڭ ەڭبەكقور تۇرعىندارى كوكتەمنىڭ ءار كۇنى جىلعا ازىق ەكەنىن جاقسى بىلەدى. بيىل بەلگىلەنگەن 900 مىڭ گەكتار ەگىس كولەمىنىڭ 700 مىڭ گەكتار جەرى جىرتىلدى. 5 مىڭ گەكتارعا ەرتە پىسەتىن كوكونىستەر ەگىلدى. ءبىز وسى سالادا قايتا تەرەڭ وڭدەۋ، اعىن سۋ تاپشىلىعى جانە كانالداردىڭ توزۋ ماسەلەسىن شەشۋدى قولعا الدىق. ماقتا، جۇگەرى جانە ەت كلاستەرىن دامىتامىز. تۇركى الەمىنىڭ مادەني-رۋحاني ورتالىعى – تۇركىستان وڭىرىندە ناۋرىز جوعارى دەڭگەيدە اتاپ وتىلۋدە. بارشاڭىزدى ناۋرىز مەرەكەسىمەن قۇتتىقتاپ، وتباسىلارىڭىزعا اماندىق پەن بەرەكە تىلەيمىن! – دەدى نۇرالحان كوشەروۆ.
تۇركىستاننىڭ ەڭ كورىكتى ورىندارىنىڭ بىرىنە اينالعان «كەرۋەن ساراي» كەشەنىنە جينالعان ادام قاراسى كوپ. ۇلتتىق ءداستۇر مەن ونەردى قامتىعان مازمۇندى باعدارلامار دايىندالعان. قولونەر شەبەرلەرى مەن سۋرەتشىلەردىڭ كورمەسى ۇيىمداستىرىلىپ، كەلۋشىلەر قازاق حالقىنىڭ باي مادەنيەتىمەن تانىستى. ۇلتتىق تاعامدار كورمەسى ارقىلى ءسالت-داستۇرىمىز دارىپتەلدى. ۇلتتىق سپورت تۇرلەرىنەن جارىستار ءوتىپ، ناۋرىز مەيرامىنىڭ ايشىقتى ءداستۇرى جالعاسىن تاپتى.
كونسەرت بارىسىندا ۇلتتىق اسپاپتاردا ورىندالعان اۋەندەر مەن حالىق بيلەرى، تۇركى حالىقتارىنىڭ مۋزىكالىق ونەرى، قازاقتىڭ «تويباستار»، «ناۋرىز-دۋمان» جانە وزگە دە اندەرى، «جاراپازان» تۇرمىس-سالت جىرى جانە ءداستۇرلى ونەر قويىلىمدارى قامتىلعان. كۇي كۇمبىرلەپ، بيشىلەر بي بيلەدى. ونداعان كيىز ۇيلەر تىگىلىپ وبلىسىمىزبەن قاتار ەلىمىزدىڭ وزگە وڭىرلەرىنەن جانە شەتەلدەن كەلگەن ساياحاتشىلار تۇركىستان تورىندەگى ناۋرىز تويىنا كۋا بولدى.
ايتا كەتەيىك، ۇلىستىڭ ۇلى كۇنىندەگى مازمۇندى ءىس-شارالار قازاق ەسترادا جۇلدىزدارىنىڭ قاتىسۋىمەن «ءان مەن ءانشى تۇركىستان تورىندە» اتتى كونسەرتتىك باعدارلاماسىمەن، «تۇران دالا، ءاز تۇركىستان» اتتى رەسپۋبليكالىق اقىندار ايتىسىمەن جالعاسىن تاۋىپ، «ءشامشى. ۆالس كورولى» سپەكتاكلى ساحنالانادى.
تۇركىستان وبلىسىنىڭ بارلىق اۋدان، قالاسىندا ناۋرىز دۋمانى جوعارى دەڭگەيدە ۇيىمداستىرىلىپ، ەلدىڭ ەڭسەسى كوتەرىلىپ، جۇرتشىلىق جىلدى جاقسى كوڭىل-كۇيمەن قارسى الۋدا.
