جەتىسۋ وبلىسىندا ناۋرىزعا ارنالعان مەرەكەلىك شارالاردا بيىل مەرەيتويى اتالىپ وتىلەتىن تاريحي تۇلعالاردىڭ ەڭبەگى كەڭىنەن دارىپتەلدى. اتاپ ايتقاندا، تالدىقورعانداعى «جاستار» ساياباعىندا 190 جىلدىقتارىنا وراي «باقتىباي جولبارىس ۇلى اۋىلى» جانە «شوقان ءۋاليحانوۆ اۋىلى»، 180 جىلدىعىنا وراي «اباي قۇنانباي ۇلى اۋىلى»، 120 جىلدىعىنا وراي «قانابەك بايسەيىتوۆ اۋىلى»، 95 جىلدىعىنا وراي «ءانۋار ءالىمجانوۆ اۋىلى»، 80 جىلدىقتارىنا وراي «جۇماتاي جاقىپبايەۆ اۋىلى» جانە «قۇمان تاستانبەكوۆ اۋىلى» تىگىلىپ، مۇندا كورنەكتى تۇلعالاردىڭ ءومىرى مەن ەلگە سىڭىرگەن ەڭبەگىنە ارنالعان كورمەلەر ۇيىمداستىرىلىپ، تەاترلاندىرىلعان كورىنىستەر قويىلدى. سول سياقتى قازاقستان حالقى اسسامبلەياسىنىڭ 30 جىلدىعىنا وراي «دوستىق اۋىلى» كيىز ۇيىندە ۇلت پەن ۇلىستار دوستىعى پاش ەتىلدى، – دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
«ءاز ناۋرىز – ۇلىستىڭ ۇلى كۇنى» دەگەن تاقىرىپتا وتكىزىلگەن تالدىقورعانداعى بۇل مەرەكەلىك شاراعا وبلىس اكىمى بەيبىت يسابايەۆ قاتىستى.
ساياباق ساحناسىنداعى سالتاناتتى شارا ناۋرىز مەيرامىنىڭ ءمانىن اشاتىن تەاترلاندىرىلعان كورىنىسپەن باستالدى. جەتىسۋلىقتاردى وسى كۇنى مەرەكەمەن وبلىس اكىمى بەيبىت يسابايەۆ قۇتتىقتاپ، ناۋرىزناما ونكۇندىگىن وتكىزۋدىڭ ءمان-ماڭىزىنا توقتالدى. بۋرابايدا وتكەن IV ۇلتتىق قۇرىلتايدا مەملەكەت باسشىسى اتاپ كورسەتكەندەي، ورتاق يدەولوگيالىق ماقساتتار ناۋرىزدىڭ فيلوسوفياسىمەن ۇندەسىپ جاتقانىن جەتكىزدى. سول سياقتى «تازا قازاقستان» ەكولوگيالىق باعدارلاماسىنىڭ جاستاردى قورشاعان ورتاعا دەگەن قامقورلىققا، ەڭبەك قۇندىلىعىن دارىپتەۋگە ۇيرەتەتىن رولىنە توقتالدى.
– ناۋرىز مەرەكەسى – بىزگە مىڭجىلدىقتاردان ميراس بولعان حالقىمىزدىڭ ايرىقشا مۇرالارىنىڭ ءبىرى. ناۋرىزدى مەرەكەلەۋ اياسىندا وبلىسىمىزدىڭ تۇكپىر-تۇكپىرىندە 230-دان استام سان ءتۇرلى ءىس-شارا وتكىزىلۋدە. ناۋرىز كۇندەرى 5 مىڭعا جۋىق اعاش وتىرعىزدىق. كومەككە مۇقتاج جاندارعا قايىرىمدىلىق اكسيالارى ۇيىمداستىرىلدى. مۇنداي شارالار جىل بويى ۇزدىكسىز جالعاسىپ كەلەدى. بۇل – ءبىزدىڭ جەتىسۋ حالقىنىڭ ىنتىماعىنىڭ ايقىن كورىنىسى، – دەدى بەيبىت يسابايەۆ.
وسى كۇنى ۇلتتىق سپورت تۇرلەرىنەن جارىستار وتكىزىلدى، سونداي-اق تالدىقورعاندىق جاس سپورتشىلارعا فۋتبول دوپتارى تاراتىلدى. سول سياقتى «تالدىقورعان بارىسى» فيناليستەرىنىڭ بەلدەسۋى جانە جەڭىمپازداردى ماراپاتتاۋ ءراسىمى ءوتتى.
بۇگىن فۋتبول دوبىنا يە بولعانداردىڭ ىشىنە م.لومونوسوۆ اتىنداعى № 5 مەكتەپ-ليسەيدىڭ 5 «ءا» سىنىپ وقۋشىسى مۇرات باعداۋلەتتە بار.
– ءبىز وتباسىمىزبەن سپورتتى جاقسى كورەمىز. اعام بوكسپەن، ءىنىم كاراتەمەن اينالىسادى. ال مەنىڭ «بولاشاق» مامانداندىرىلعان سپورت مەكتەبىندە فۋتبولعا قاتىسىپ جۇرگەنىمە ءبىر جىل بولدى. جازدا جارىسقا بارامىز دەپ دايىندالىپ جاتىرمىز. بۇگىن فۋبتول دوپتارىن تاراتتى. بۇل ءبىز ءۇشىن مەرەكەگە ەرەكشە سىيلىق بولدى. بولاشاقتا ەلىمىزدىڭ ۇلتتىق قۇراماسىندا ويناعىم كەلەدى، – دەدى جاس سپورتشى.
قازاق حالقىنىڭ جانە وبلىستا تۇراتىن باسقا دا ۇلت پەن ۇلىستاردىڭ ەتنو-مادەني كورمەسى، «شەبەرلەر اۋىلىندا» قالا كاسىپورىندارىنىڭ قاتىسۋىمەن «قازاقستاندا جاسالعان» كورمە-جارمەڭكەسى ۇيىمداستىرىلدى.
جالپى بۇگىنگى ناۋرىز مەرەكەسىنىڭ ۇيىمداستىرىلۋى جايلى وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى قۋانىش سۇلەيمەنوۆ قىسقاشا ايتىپ بەردى:
– ناۋرىز مەرەكەسى ناۋرىزناما تۇجىرىمداماسىنا ساي كەڭ كولەمدە ۇيىمداستىرىلىپ وتىر. ءىس-شارالاردا ۇلىستىڭ ۇلى كۇنىنىڭ فيلوسوفياسىنداعى قۇندىلىقتاردىڭ ءبارى قامتىلدى. بۇگىن وبلىس ورتالىعىندا مەرەكەگە وراي 21 كيىز ءۇي تىگىلدى. سونىڭ ىشىندە بيىل مەرەيتويى اتاپ وتىلەتىن جەتىسۋدا تۋعان كورنەكتى تۇلعالاردىڭ اتىمەن اتالعان اۋىلدار دا بار. وسى قايراتكەرلەردىڭ حالىق ونەرى مەن مادەنيەتىنە سىڭىرگەن ەڭبەكتەرىن بارىنشا ناسيحاتتاپ، كوپشىلىككە تانىتۋدى ماقسات تۇتتىق. وسىلايشا ناۋرىز مەرەكەسى مەرەيتويلىق جىلدى باستاپ بەردى دەۋگە بولادى. مۇنداي يگى ىستەر جالپىۇلتتىق سانانى قالىپتاستىرۋعا، مادەني-تاريحي مۇرالارىمىزدى ساقتاۋعا ىقپال ەتەدى دەپ ويلايمىن، – دەدى ول.
مەرەكەلىك شارانى تاماشالاۋعا كەلگەن قالا تۇرعىندارى دا وي ءبولىستى:
– بۇگىن كىشى بالام مەن نەمەرەمدى ناۋرىز مەرەكەسىنە ارنايى الىپ شىقتىم. ناۋرىز تويىنىڭ حالىق اراسىندا قالاي تويلاناتىنىن كىشكەنتايىنان كورىپ وسسە، ەسىندە جاتتالىپ قالادى عوي. سوندىقتان وسىنداي كوپشىلىك ورتانى كورسەتىپ، حالىقتىڭ ءسالت-داستۇرىن شامامىز كەلگەنشە ۇيدە دە ۇعىندىرىپ وتىرۋعا تىرىسامىز. بۇگىن مەرەكە بار سان-سالتاناتىمەن كەرەمەت ءوتىپ جاتىر. كيىز ۇيلەردى ارالاپ كوردىك. ۇلتتىق بۇيىمدار، ۇلتتىق تاعامدار كورمەلەرىن تاماشالادىق. كوپ كوجەدەن ءدام تاتتىق. كوڭىل كۇيىمىز كەرەمەت. بارشا جەتىسۋلىقتاردى ناۋرىز مەرەكەسىمەن قۇتتىقتايمىن، ۇلىس وڭ بولسىن، – دەدى تالدىقورعاندىق ءاليا وڭعاروۆا.
ايمەرەي حايرۋللا، №28 ءىت مەكتەپ-ليسەيىنىڭ 4 سىنىپ وقۋشىسى:
– جاسىم 9-دا. وقۋ وزاتىمىن. بۇگىن ناۋرىزعا قازاقشا كويلەگىمدى كيىپ، اشەكەيلەرىمدى تاعىپ، اجەممەن بىرگە كەلدىم. ءاربىر كيىز ءۇيدىڭ الدىندا اجەلەر شاشۋ شاشىپ، بالالار شاشۋ تەردىك. كورمەلەردەن قولدان جاسالعان ادەمى زاتتاردى كوردىك. كونسەرت تاماشالادىق. ناۋرىز مەرەكەسى ماعان قاتتى ۇنايدى، – دەدى ول.
مەرەكەلىك شارا جەرگىلىكتى ونەر ۇجىمدارىنىڭ «ناۋرىز شاشۋ» كونسەرتتىك باعدارلامامەن تۇيىندەلدى.
جالپى ناۋرىزعا ارنالعان بۇقارالىق شارالار ءوڭىردىڭ بارلىق اۋدان-قالالارىندا كەڭىنەن اتاپ ءوتىلدى. ماسەلەن، الاكول اۋدانىندا 8-10 جاس ارالىعىنداعى بالالار اراسىندا 13 كەلى سالماقتى كوتەرۋ سايىسى ءوتىپ، جەڭىمپازعا قوزى سىيعا تارتىلدى. ال سارقان اۋدانىندا ۇلتتىق داستۇرلەر مەن قۇندىلىقتاردى دارىپتەۋ ماقساتىندا 13-18 جاس ارالىعىنداعى ءجاسوسپىرىم قىزدارعا ارنالعان «حانشايىم – 2025» بايقاۋى ۇيىمداستىرىلدى.
اتاپ وتسەك، بۇگىن ناۋرىز مەرەكەسىنىڭ شارالارى اياقتالعان سوڭ قالا تازالىعىن ساقتاۋعا ۇلەس قوسۋ ءۇشىن «جاستار» ساياباعىنا وبلىستىق مادەنيەت سالاسىنىڭ قىزمەتكەرلەرى تازالىق جۇمىستارىن جۇرگىزدى. تازالىق شاراسىنا 200-دەي ادام قاتىستى.
