«Barys Arena» sport kesheninde ótken boks keshinen keiin volonterler men jankúierler azamattyq jaýapkershiliktiń joǵary deńgeiin úlgi etti. Olar súiikti sportshylaryn qoldap qoimai, tribýnalardaǵy qoqysty jinap, arenany taza qaldyrý mindetin de qolǵa aldy, dep habarlaidy ákimdiktiń resmi saity.
Mundai igi bastamalar Astanada barǵan saiyn tanymal bola túsýde. Elorda turǵyndary men qonaqtary «Taza Qazaqstan» aýqymdy ekoaktsiiasyn belsendi túrde qoldaidy. Elordada jankúierlerdiń jańa mádenieti, sol siiaqty súiikti sportshylardyń qoldaýy tazalyqpen jáne tártippen úilesip jatady.
«Keremet keshten keiin emotsiiamyz tasyp turǵan shaqqa qaramastan keleńsiz jaǵdaidy nazardan tys qaldyra almadyq. Osyndai igi iske óz úlesimdi qosqanymdy maqtan tutamyn jáne bul is jankúierler mádenietin nyǵaitady dep senemin. Tazalyq pen tártip tek sportqa ǵana emes, qalamyzǵa jáne bir-birimizge degen qurmet», - dep atap ótti jankúierlerdiń biri.
Eske salaiyq, elordada boks keshi ótti. Onyń basty jekpe-jeginde WBO jáne IBF tujyrymdary boiynsha orta salmaqtaǵy álem chempiony ataǵy úshin qazaqstandyq Jánibek Álimhanuly men frantsýz Anaýel Ngamissengýe kúsh synasty. Sonymen qatar, boks keshinde qazaqtyń belgili boksshylary Sultan Zaýyrbek, Batyr Júkembaev, Mahmud Sabyrhan, Tórehan Sabyrhan, Aqniet Álimbai jáne Balaýsa Muzdiman sharshy alańǵa shyqty.
