Úkimettik komissiia Ulytaý oblysynda ornalasqan "Qazaqmys korporatsiiasy" JShS-nyń "Jomart" shahtasyndaǵy apattyń sebepterin zerttep, tergeý júrgizdi. Tergeý nátijeleri týraly málimetti premer-ministr Oljas Bektenov depýtattarǵa bergen jaýabynda baiandady, dep habarlaidy Dalanews.kz.
Apattyń jan-jaqty ári sapaly zerttelýi úshin komissiia quramynda ártúrli baǵyttar boiynsha segiz qosalqy top qurylyp, ǵylymi-zertteý institýttarynyń, zerthanalardyń jáne mamandandyrylǵan uiymdardyń sarapshylary tartylǵan.
Apattyń negizgi sebebi qandai?
Tergeý qorytyndysy boiynsha, apatqa shahtadaǵy taý-ken qazbalarynda metannyń aýa qospasynyń tutanýy sebep bolǵan. Bul jarylystan qorǵalmaǵan elektr jabdyǵyn qoldanýdyń saldarynan oryn alǵan.
Sonymen qatar premer-ministr qosymsha birqatar qaýip faktorlaryn atady:
• Metannyń qaýipti deńgeide jinalýy. Bul ken ornynyń tektonikalyq buzylysyna bailanysty, jaryqtar arqyly gazdyń kenet bólinýine ákelgen.
• Jeldetý júiesiniń tiimsizdigi.
• Metan quramyna ýaqtyly gazdyq baqylaý júrgizilmeýi.
• Qaýipsizdik sharalaryna jaýapty laýazymdy tulǵalardyń tiisti baqylaýdy qamtamasyz etpeýi.
Komissiia jumys berýshini 100% kináli dep tanydy. Osyǵan bailanysty ishki ister organdary qylmystyq is qozǵap, tergeý jumystaryn jalǵastyryp jatyr.
"Qazaqmys" shahtasynda qansha kenshi qaza tapty?
Eske salaiyq, buǵan deiin Ulytaý oblysynda shahta opyrylyp, jeti qyzmetker qaza tapqanyn habarlaǵan edik.
Jańaarqa aýdanyndaǵy "Qazaqmys" korporatsiiasyna qarasty "Jomart" kenishindegi shahtada taý-ken massasy opyryldy. Búgin qutqarýshylar jeti jumysshynyń denesin tapty.
Kabelder úzilýine bailanysty jumysshylarmen bailanys ta úzildi. Avariialyq-qutqarý jumystaryna Ulytaý jáne Qaraǵandy oblystarynyń TJD kúshteri men quraldary, apattar meditsinasy ortalyǵynyń qyzmetkerleri jáne TJM psihologtary jumyldyryldy.
Premer-ministr Oljas Bektenovtiń tapsyrmasy boiynsha Ulytaý oblysy Jańaarqa aýdanyndaǵy shahtadaǵy jaǵdaidyń sebepterin tergeý jáne zardap shekkenderge kómektesý jónindegi arnaiy komissiia quryldy. Komissiiany premer-ministrdiń orynbasary Qanat Bozymbaev basqardy.
Bul derekke qatysty Politsiia departamenti málimdeme jasady.
Atalǵan fakti boiynsha QR QK-niń 277-babynyń 3-bóligi «Taý-ken nemese qurylys jumystaryn júrgizý kezinde qaýipsizdik erejelerin buzý» boiynsha is qozǵaldy. Oqiǵa ornynda Ulytaý oblysynyń politsiia departamentiniń jedel-tergeý toptary jumys istep jatyr. Qazirgi ýaqytta barlyq qajetti tergeý amaldary júrgizilip jatyr.
"Jomart" kenishi - Jezqazǵan qalasynan ońtústik-shyǵysqa qarai 130 shaqyrym jerde ornalasqan. Onda mys sýlfidi óndiriledi. "Qazaqmys" korporatsiiasynyń iri aktsioneri - Kazakhmys Copper.
Keiinirek "Qazaqmys" Ulytaý oblysyndaǵy apatty qaza tapqan kenshilerdiń tizimin jariialady.
Qaza bolǵan kenshilerdiń tizimi:
- Aqshalov Qairat Amanbekuly, 1975 jyly týǵan, nasos mashinisi;
- Jakýbaev Ardaq Boranbaiuly, 1998 jyly týǵan, jerasty taý-ken sheberi;
- Jumadullaev Baqytbek Nyshanuly, 1975 jyly týǵan, jerasty kenshisi:
- Kenjebekov Orynbek Ámirhanuly, 1991 jyly týǵan, tieý-jetkizý mashinasynyń mashinisi;
- Moldabekov Ǵalymjan Esenbekuly, 1978 jyly týǵan, burǵylaýshynyń kómekshisi,
- Nuruldaev Oljas Jaǵalbaiuly, 1979 jyly týǵan, jerasty ýchaskesiniń energetik,
- Rojkov Konstantin Vladimirovich, 1992 jyly týǵan, jerasty taý-ken jabdyqtarynyń elektr slesari.
