Bul úshin qoǵam da, jeke adam da bir kisidei jumylyp, kúsh-jigerlerin biriktirýleri qajet. Maqsat - tán men rýhty saýyqtyrý.
BUU-nyń "turaqty damý maqsattary"kontseptsiiasynyń 3 maqsatynda densaýlyqty kútý kerektigi aitylady.Demek,barsha adamzattyń deniniń saýlyǵy basty bailyǵy.
Memleket basshysy Qasym-Jomart Toqaev ótken jylǵy Joldaýynda densaýlyq saqtaý júiesiniń tiimdiligin arttyrýǵa erekshe nazar aýdardy.Bul rette Prezident tapsyrmasyn oryndaý maqsatynda Qazaqstan Úkimetiniń 2021 jylǵy 12 qazandaǵy qaýlysymen «Deni saý ult» árbir azamat úshin sapaly jáne qoljetimdi densaýlyq saqtaý ulttyq jobasy bekitilip, júzege asyrylýda. Jobanyń maqsaty – árbir azamat úshin sapaly jáne qoljetimdi densaýlyq saqtaýdy qamtamasyz etý, ol 2025 jylǵa deiin eseptelgen jáne tórt túrli baǵytta júzege asyrylady:
Birinshi baǵyt – meditsinalyq kómektiń qoljetimdiligi men sapasyn arttyrý.
Ekinshi baǵyt – epidemiialyq boljaý men den qoiýdyń zamanaýi júiesin qalyptastyrý.
Úshinshi baǵyt – otandyq farmatsevtika salasynyń damýyna yqpal etý.
Tórtinshi baǵyt – salaýatty ómir saltyn ustanatyn halyqtyń úlesin arttyrýǵa jáne buqaralyq sportty damytýǵa baǵyttalǵan is-sharalar. Prezident bolashaqqa baǵyttalǵan baiypty baǵdarlar men mindetterdi saralaý barysynda densaýlyq saqtaý salasyna da airyqsha nazar aýdarý qajettigin basa aitty.
Elimizdiń basty qundylyǵy – adam. Bul – aiqyn nárse. Ult saýlyǵy jaqsy bolsa ǵana, qoǵam ornyqty damidy. Densaýlyq saqtaý salasynda biraz reforma júrgizildi.
«Aýyryp em izdegenshe, aýyrmaityn jol izde» demekshi, túrli syrqattyń aldyn erterek alǵan abzal. Ol ekonomikalyq jaǵynan da memleketke arzan túsedi. Aýrýdyń órship ketpeýin tuzaqtaityn sharalardy der mezgilinde júrgizý tiimdiligin ákeleri sózsiz. Barynsha tazalyq saqtaý qajet. Salamatty ómir saltyn ustanyp, salaýatty júrgenge ne jetsin. Aǵzanyń qorǵanysh qabiletin tabiǵi jolmen shyńdaý – ult densaýlyǵynyń basty kepili. Árine, durys tamaqtaný men dárýmenderdi utymdy paidalaný da aǵzanyń syr bermeýine yqpal etedi. Kez kelgen eldiń eń basty bailyǵy – ult saýlyǵy bolyp tabylatyndyǵy sózsiz.
Mine, sondyqtan da bul iske barynsha jaýapkershilikpen qaraǵanymyz abzal. Densaýlyq – tek jeke bastyń ǵana emes, ultymyzdyń da uly igiligi. Dúniejúziniń órkenietti elderiniń barlyǵynda derlik halyq densaýlyǵy, ásirese jastardyń densaýlyǵy basty ulttyq qundylyq jáne memlekettik saiasattyń basym baǵdary bolyp tabylatyny belgili.
Bizdiń baqytymyzdyń onnan toǵyzy densaýlyǵymyzǵa bailanysty. Árbir adam salaýatty ómir saltyn saqtap, óz densaýlyǵyna saqtyqpen qarasa jarqyn ómirge jol ashylady.
Qalymbek Baqytjan
ál-Farabi atyndaǵy QazUÝ-dyń zań fakýlteti keden qarjy jáne ekologiialyq quqyq kafedrasynyń qaýymdasqan professory,z.ǵ.k.
