Retrofestıval ulttyq reńk qajet
Darıǵa Nursultanqyzynyń qanshalyqty daryndy ánshi bolǵanyna baǵa bere almaımyn. Biraq mass-medıa salasynda bilikti uıymdastyrýshy bolǵany sózsiz. Ánshilikke qatysty aıtarymyz. Ol elimizdegi iri telearna «Habar» agenttigine jetekshilik jasaǵan soń, aınalasyndaǵylardyń yqpalymen sahnaǵa shyqqan bolýy kerek. Eger ol ánshiliktiń sońyna tússe, búgingideı halyqtyń yqylasyna bólenbes edi.
Darıǵa Nazarbaevanyń ónerde júrip tyndyrǵan mańyzdy sharýasy retinde jyl saıyn ótip turatyn «Almaty – meniń alǵashqy mahabbatym» retrofestıvalin ataýǵa bolady.
Bir áttegen-aıy atalmysh án baıqaýynda orys pen sheteldiń ánderiniń desi basym túsip jatady. Aldaǵy ýaqytta Darıǵa Nursultanqyzy osy baıqaýǵa ulttyq reńk berse oryndy bolar edi. Sonymen qatar shetelden án shaqyrtýǵa shekteý salýdyń da máni zor. Óıtkeni, atalmysh án baıqaýy men Darıǵanyń esimi udaıy qatar atalady. Osy bir bolmashy dúnıeler bolashaqta Darıǵanyń saıası karerasyn kóleńke túsirýi múmkin.
Eger bizdiń aıtqan usynystarymyz nazarǵa alynsa, vıse-premer burynǵydan beter halyqtyń súıispenshiligine bóleneri haq. Baıqaýdy durys baǵytqa baǵyttaıtyn bolsa, Darıǵa hanymnyń ataq-abyroıyn asyrýǵa septigin tıgizetini sózsiz.
Aqparat salasynyń biligiri
Qazirgi saıasatta aqparat salasynda Darıǵa Nursultanqyzyndaı zor tájirıbe jınaǵan saıasatker kemde-kem. Ol negizin qalaǵan «Habar» telearnasy búginde memlekettik saıasatty nasıhattaıtyn negizgi buqaralyq aqparat quralyna aınalyp otyr. Eger de Darıǵa Nazarbaeva mass-medıa salasyna qyzyǵýshylyq tanytpaǵanda Qazaqstannyń aqparattyq keńistigi qazirgi deńgeıge kóteriler ma edi? Bir ǵana «Habar» arnasynyń negizinde biraz radıostansalar men basylymdar paıda bolǵanyn bilemiz. Búginde olar elimizdiń aqparattyq qaýipsizdigin qamtamasyz etýge óz úlesin qosyp keledi.
Memleket basshysynyń qyzy aqparat maıdanynda júrip Qazaqstandaǵy saıası plúralızmniń ornaýyna da bir kisideı úles qosqanyn aıtýǵa tıispiz.
Darıǵanyń úlken saıasattaǵy eki jobasy
Keıipkerimiz aqparat salasyn basqaryp, saıası jaǵdaılardan tys qaldy dep aıta almaımyz. Ol BAQ salasyn tizgindegende aýyz toltyryp aıtatyn eki saıası máni zor isti qolǵa aldy. Birinshisi, «Asar» partıasyn qurdy. Darıǵa Nazarbaevanyń elimizdiń saıası ómirine belsene arlasýy osy kezeńde bastaldy dep aıtqan jón shyǵar. Kezinde «Asar» partıasy mańyna kóptegen jastardy toptastyryp, el Prezıdenti Nursultan Nazarbaevtyń saıasatyna qoldaý bildirgenin bilemiz.
Keıinnen elimizdegi saıası partıalardyń basym bóligi Nursultan Nazarbaevtyń júrgizip otyrǵan saıasatyn qoldaǵandyqtan, olardyń bári qazirgi «Nur Otan» partıasynyń qanatynyń astyna ótti. Sol kezde Darıǵa Nursultanqyzy quba jolda bura tartpaı, óziniń elimizdegi saıası aýyzbirlikti jaqtaýshylardyń biri ekenin naqty ispen dáleldep, saıası partıalardyń birigýin quptady.
Osy bir kezeńde keıbireýler Memleket basshysynyń qyzy óziniń saıası ambısıasyn qoǵamdyq-saıası ortaǵa ashyp kórsetetin kez keldi dep joramal jasaǵan edi. Biraq jaǵdaı olardyń kútkenindeı bolǵan joq. Qaıta ol eldegi saıası qyzýdy basyp, qazaq qoǵamynda saıası turaqtylyqtyń asa qajet ekenin túsinip, mańyzdy sheshim qabyldady.
Darıǵa Nursultanqyzynyń aýyz toltyryp aıtatyn ekinshi bir saıası sharasy «Eýrazıalyq medıa forýmdy» uıymdastyrýyn atap aıtýǵa bolady. Bul shara Qazaqstandy aıdaı álemge tanytqan mańyzy zor halyqaralyq jıyndardyń biri bolǵany daýsyz.
İs-sharanyń halyqaralyq saıasattaǵy bedelin arttyrýǵa Memleket basshysy Nursultan Nazarbaevtyń ózi kelip qatysýy da onyń abyroıyn asyra tústi. Árıne, «Eýrazıalyq medıa forým» barysynda naqty saıası sheshimder qabyldanbasa da, halyqaralyq saıasatta talqylanbaı qordalanyp qalǵan mańyzdy máseleler jýrnalıser men belgili saıasatkerlerdiń keńinen talqylap, ózekti máselelerdiń kóbesi sókkenine kýá boldyq. Osylaısha forým jýrnalıser, sarapshylar jáne saıasatkerlerdiń qatysýymen ótetin Eýrazıa keńistigindegi mańyzdy basqosýǵa aınalǵany belgili.
Medıa forýmnyń minbesinde Taıaý Shyǵys, Iraktaǵy saıası jaǵdaılar jáne Aýǵanstandaǵy qaýipsizdik máselesi keńinen sóz bolǵany esimizde. Osy is-sharadan keıin Qazaqstan EYQU-ǵa tóraǵalyq qyzmetin sátti atqaryp, birqatar halyqaralyq uıymdardyń jıyndaryn Astana tórinde ótkizýge múmkindik aldy.
Májilistegi kezeń
Ardaǵy biraz úzilisten keıin Darıǵa Nazarbaeva óziniń saıası mansabyn Májiliste jalǵastyrdy. Ol Májilis Tóraǵasynyń orynbasary qyzmetine deıin kóterildi.
Ótken shaqyrylymda zań shyǵarýshy organda óktemsigen Úkimet múshelerin tezge salyp, ornyna qoıatyn depýtattar óte az edi. Óz kezeginde Darıǵa Nursultanqyzy Májilistegi jıyndardyń shıraq ótýine birshama úles qosqanyn bilemiz.
Ol Májilis minbesin ónimdi paıdalanyp, halyqtyń kókeıinde júrgen ózekti máselelerdi Úkimet múshelerine tótesinen qoıý ildi. Darıǵa Nazarbaeva depýtattyq mandatqa ıe bolǵaly beri áleýmettik-ekonomıkalyq máni zor talaı máselelerdi kóterdi.
Aıtalyq, «Jumyspen qamtý – 2020» baǵdarlamasy boıynsha memlekettiń qyrýar qarjysy tekke shashylýyna tosqaýyl qoıdy. Kezinde Densaýlyq saqtaý mınıstrli bolǵan Salıdat Qaıyrbekova Májilis depýtaty tarapynan synǵa ushyrap jylarman kúıge túskeni de esimizde.
Budan basqa Darıǵa Nursultanqyzy reformadan kóz ashpaǵan bilim salasyn da synǵa alyp, seresip turǵan seńge qozǵaý saldy. Belsendi depýtat Májilis minbesinen halyqtyń aryz-armanyn aıtýdaı-aq aıtty.
Búginde ol ózi kótergen áleýmettik máselelerdi tolyq sheshetin múmkindikke ıe bolyp otyr. Onyń kez kelgen áleýmettik máseleniń kóterip, onyń oń baǵytta sheshýge yqpal etetin áleýeti tolyq jetedi. Sondyqtan Darıǵaǵa halyqtyń artyp otyrǵan senimi zor.
Nurlan JUMAHAN
