Onyń aitýynsha, búgingi tańda óńirde úsh aýysymdaǵy jáne apattyq jaǵdaidaǵy mektepter máselesi tolyqtai sheshimin tapqan. Biyl 129 mektepke jóndeý jumystaryn júrgizý, al 2023 jylǵa deiin 5,5 myń orynǵa arnalǵan 7 mektep salý josparlanǵan.
Oblystaǵy barlyq orta bilim ordalary IT synyptarmen jabdyqtalǵan. Balalar Python tilindegi baǵdalamalaýlar, Arduino Uno platformasy engen, aqparattyq tehnologiialar boiynsha jańa tereńdetilgen baǵdarlamalardy oqýda. Jańa bilim berý baǵdarlamasyn engizý úshin 544 pedagog qaita oqytyldy. Bul óz kezeginde jemisin berip, bilim sapasy jaratylystaný pánderi boiynsha 44-ten 66 paiyzǵa kóterildi.
Kóptildilik baǵdarlamasyna frantsýz jáne nemis tilderi engizildi. Oblystyq bilim basqarmasy aldaǵy úsh jylda 4 myń pedagogtyń biliktiligin kóterýdi josparlap otyr. Til mamandaryn qaita oqytý sheteldik mamandardy shaqyrý arqyly júzege asyrylmaq.
Erekshe qajettiligi bar balalardy oqytý úshin biyl 900 pedagogke arnap kýrstyq jumystar júrgizilip, 19 ǵimarat olarǵa sai sáikestendiriledi, 395 mektepke qajetti qurylǵy alynady.
Tehnikalyq jáne kásibi bilim berýde de ońdy ózgerister oryn aldy. Kóp ýaqyt boiy bul sala qaraýsyz qalyp kelgen edi.
Endi kásibi jáne tehnikalyq bilim berý salasy tolyqtai jańǵyrtylýda. Atap aitsaq, jańa quzyret ortalyqtary ashylyp, kolledjder jańa qurylǵylarmen jabdyqtalýda, WorldSkills standarttary engizilýde.
Jalpylai aitqanda, tek qana qurylǵylarmen jabdyqtaýǵa 3 mlrd. teńge qarjy jumsalady. Úsh kolledjdiń bazasynda KazMinerals kompaniiasymen birlese otyryp taý-ken salasy mamandaryn daiarlaityn quzyret ortalyqtary ashyldy.
Biyldan bastap 2022 jyl aralyǵynda KazMinerals kompaniiasynyń Resei Federatsiiasynyń Chýkotka avtonomiialyq okrýgindegi «Baimskoe» ken ornynda jumys isteitin 4 myń mamandy oqytý kózdelip otyr.
Atalmysh jumystardyń jaqsy nátijeleri qazirdiń ózinde kórinip jatyr. Atap aitsaq, kolledj oqýshylary WorldSkills boiynsha ulttyq chempionatta ǵana emes, sondai-aq halyqaralyq chempionatta da eki jyl qatarynan júldeger atanýda.
Joǵary bilim berý salasynda da birqatar jumystar atqarylýda. «Bilikti maman» jobasy boiynsha ýniversitetterge maman daiarlaýǵa bilim granttary bólinýde. Úsh jyl ishinde myń grant bólinse, onyń 400 ótken jyly bólingen bolatyn. Bes jyl ishinde barlyǵy 5 mlrd. teńge turatyn 1846 biýdjettik oryn qarastyrylady. Osylaisha, joǵary bilimniń qoljetimdiligi
2016 jylmen salystyrǵanda 48 paiyzdan 64 paiyzǵa kóterilip, sheteldik oqý oryndaryna ketýshiler sany úsh esege qysqardy.
Tuńǵysh Prezident Nursultan Nazarbaevtyń «Bes áleýmettik bastama» jobasyn iske asyrý aiasynda joǵary oqý oryndary men kolledj stýdentterine arnap 4048 oryndyq 10 jataqhana salý kózdelgen. Qazirdiń ózinde Semeidegi meditsinalyq jáne elektrotehnikalyq kolledjderde 700 oryndyq eki jataqhana qoldanysqa berilgen. Qalǵan beseýiniń, sonyń ishinde ekeýi memlekettik-jekemenshik áriptestik aiasynda salynatyn jataqhanalardyń qurylysy biyl bastalady.
