Astranomiialyq ólshemdegi aiyppul
Ústimizdegi jyly mamyr aiynda Astana qalasy kásipkerler palatasynyń kásipkerlerdiń quqyqyn qorǵaý keńesi elordadaǵy monopolistterdiń shamadan tys aiyppuldary kásipkerliktiń damýyna kedergi keltirip otyrǵany talqylady.
Anyǵaraq aitsaq, «Astana sý arnasy» mekemesi «Marden» biznes ortalyǵyna qyzmet kórsetip júrgen kompaniiaǵa sýdy 37 kún plombasyz paidalanǵany úshin 28,4 million teńge kóleminde aiyppul salǵanyn estigende shalqamyzda túse jazdadyq.
Al qyzmet kórsetýshi shaǵyn biznes nysany ai saiyn sýdy paidalanǵany úshin «Astana sý arnasy» mekemesine 200 myń teńge tólep kelgen. Al sý eseptegish qurylǵydaǵy plomba bolmaǵany (abaisyzda túsip qalǵan bolýy kerek) úshin jergilikti monopolist esh oilanbastan (obal, saýapty eskermei) ondaǵan adamǵa jumys berip, memleketke ýaqytynda salyq tólep otyrǵan kásipkerge 28 mln. teńge aiyppul salǵanyn qalai túsinýge bolady?
Biznes ortalyqqa qyzmet kórsetýshi kompaniiaǵa bolmashy qatelik úshin 28 mln. teńge aiyppul salaý aqylǵa simaityn-aq jait. Kerek deseńiz, qarapaiym qyzmet kórsetýshi kásipkerdiń jyldyq tabysynyń ózi 28 mln. teńge bolmaýy múmkin ǵoi. Osy jaǵyn «Astana sý arnasy» mekemesiniń basshylary oilady ma eken?
Bul oqiǵadan jergilikti monopolist kompaniianyń elimizde biznestiń damýyna qanshalyqty "múddeli" ekenin baiqaýǵa bolady. Olar biznestiń damytýdyń ornyna, biznesti tunshyqtyratyn zańdarmen jumys istep kelgen.
Ai saiyn sý úshin 200 myń teńge tóleitin kásipkerge bolmashy másele úshin 28 mln. aiyppul salaý shaǵyn jáne orta biznes ókilderin qoldaý emes, olardy qolmen býyndyryp óltirgenmen birdei ǵoi.
Jemqorlyqqa bastaityn aiyppuldar
Elimizdiń ortalyǵy, biznes qoldaý sharalary joǵary deńgeide damyǵan Astandaǵy kásipkerler dál osyndai soraqy jaǵdaimen betpe-bet kelip jatsa, alys aýdandardaǵy kásipkerlerdiń qandai kúide jumys istep jatqanyn kóz aldyńyzǵa elestetýdiń ózi qiyn.
Búginde elimizde bizneske salynatyn aiyppuldardyń kólemin qaita qaraý kerek.
Eger jaǵdai osylai kete beretin bolsa, bir ǵana aiyppuldy ózi jyldar boiy eńbektengen kásipkerdiń eńbegin bir kúnde esh, tuzyn sor qylatyny sózsiz. Sondyqtan aiyppuldardyń kólemin meilinshe tómendetý qajet.
Kásipker milliondaǵan aiyppuldy tólei almaǵan soń, bul máseleni jemqorlyq jolymen sheshýden basqa amaly qalmaityny anyq. Osylaisha shamadan tys aiyppuldar monopolistter men qadaǵalaýshy organdardy kásipkerden aqsha bopsalaý úshin qajet bolyp turǵanyn baiqaýǵa bolady.
Miilondaǵan aiyppuldy tólegenshe, biznesińidi bankrot qylyp, 28 mln. teńgeni basqa biznesti damytýǵa jumsaǵan jaqsy ǵoi. Sondyqtan mundai qomaqty aiyppuldardy jemqorlyqtyń qanat jaiýyna qolaily jaǵdai týǵyzýshy faktor dep ataǵannan basqa amalymyz joq.
Alpaýytty nesine aiaimyz?
Otandyq kásipkerge aiyppuldy ókirtip turyp salýǵa shebermiz. Al elimizde munai óndirip, qazba bailyqtaryn súlikshe soryp, qorshaǵan ortaǵa orasan zor zalal keltirip jatqan alpaýyttarǵa aiyppul salǵanda tym jumsaqpyz.
Eger bizdiń qadǵalaýshy jáne jergilikti bilik oryndary myqty bolsa, aldymen azýyn sol alpaýyttarǵa kórsetpei me?
Qazirgi tańda qorshaǵan ortany lastap, ekologiialyq zań talaptaryn óreskel buzǵan kompaniialarǵa kelgen bizdiń zańymyz da, sheneýnigimizde ii qanǵan bylǵaryda bylq-sylq ete qalady. Jer qoinaýyn paidalanýshy iri kompaniialar ekologiialyq máselelerge qyrýar qarjy bólip, Qazaqstannyń zań talaptaryn oryndaǵansha, sol zańda kórsetilgen aiyppuldy tólep, jumysyn ary qarai jalǵastyrǵandy jón sanaidy. Muny endi bes jasar bala da biletin jait qoi.
Eger alpaýyt kompaniialar qorshaǵan ortaǵa zalal keltirse, olardy tizgindeitin zańymyz bar. Tipti, bul zańyńyz damyǵan Batys elderindegi zańdardan kem túspeitine bás tigem. Tek bir "áttegenaiy" sol zańdarda kórsetilgen aiyppul mólsherleri óte tómen. Sondyqtan iri kompaniialar ekologiialyq talaptardy buzǵanda aiyppul tólep qutylyp keledi.
Budan neni ańǵaramyz? Birinshiden, bizdiń shendilerdiń investorlardyń aldynda tym jaltaq ekenin, bolmasa, olarǵa qandaida bir jolmen "kiriptar" bolyp qalǵanyn paiymdaýǵa bolady. Shendiler alpaýyt kompaniialardan táýelsiz bolsa, olarǵa munshalyqty jumsaqtyq tanytpas edi ǵoi.
Eger otandyq jáne sheteldik iri kompaniialardy erkine jiberip, al shaǵyn jáne orta biznes ókilderine aiamai aiyppul salýdy toqtatpasaq, bizdiń ekonomikamyz qurdymǵa ketetini anyq. Sondyqtan bul máseleni qazirden bastan sheshý kerek.
Nurlan JUMAHAN
