Qazaqstannyń burynǵy bas kólik prokýrory Maqsat Dúısenov Germanıadan ekstradısıalanady. Bul týraly Bas prokýrordyń orynbasary Ǵalymjan Qoıgeldıev málimdedi, dep habarlaıdy Dalanews.kz.
Onyń aıtýynsha, Dúısenovke halyqaralyq izdeý 29 tamyzda jarıalanǵan. Al qyrkúıek aıynda ony Germanıanyń quqyq qorǵaý organdary Interpol jelisi boıynsha ustaǵan.
Ǵalymjan Qoıgeldıev burynǵy prokýror saıası baspana surady degen aqparatty joqqa shyǵardy.
"Ekstradısıalaý prosesi qazirdiń ózinde bastalyp ketti. Germanıa tarapynan bas tartý týraly resmı jaýap túsken joq", – dedi ol.
Eske salaıyq, buǵan deıin Bas prokýratýranyń quqyqtyq statısıka jáne arnaıy esepke alý portalynda eks-bas kólik prokýroryna izdeý jarıalanǵan edi. Portal dereginshe, izdestirý isi Almaty qalasy Almaly aýdandyq polısıa basqarmasynyń bastamasymen tirkelgen.
