Túrkistan oblysy búginde elimizdiń agroónerkásip salasyndaǵy jetekshi óńirleriniń biri sanalady. Sońǵy jyldary bul aimaqta aýyl sharýashylyǵyna innovatsiialyq tásilder engizý qarqyn aldy. Ásirese maqta sharýashylyǵyn jańǵyrtý baǵytynda naqty nátijeler baiqalýda, dep habarlaidy Dalanews.kz
Biyl óńir diqandary shamamen 142 myń gektar alqaptan 420 myń tonnadan astam shitti maqta jinady, bul jalpy egis kóleminiń 98 paiyzyn quraidy. Ortasha ónimdilik gektaryna 25 tsentnerge jýyq boldy. Bul kórsetkish sońǵy jyldardaǵy eń joǵary ónimdiliktiń biri bolyp otyr.
Sý únemdeý – tabysty agrobiznestiń kepili
Maqta egistikteriniń 50 myń gektarynda tamshylatyp sýarý júiesi ornatylǵan. Sý resýrstaryn tiimdi paidalanýǵa baǵyttalǵan bul tásil ónim kólemin ulǵaityp, jerdiń qunarlylyǵyn saqtaýǵa múmkindik berip otyr.
Tamshylatyp sýarý — bul sý men tyńaitqyshtardy ár ósimdiktiń túp aimaǵyna dál qajetti mólsherde jáne ýaqtyly jetkizetin sýarý ádisi. Bastapqyda bul tásil jylyjai sharýashylyǵynda keńinen qoldanylǵan, al búginde ashyq jerlerde — kókónis, jemis, júzim ósirýde jáne landshaftyq bezendirýde de keńinen paidalanylady.
Tamshylatyp sýarý basqa sýarý tásilderimen salystyrǵanda investitsiianyń qaitarymyn edáýir arttyrady. Bul ádiste ylǵaldy paidalaný tiimdiligi 95%-dan asady. Al betki sýarý kezinde bul kórsetkish shamamen 50%, jańbyrlatyp sýarýda 65% shamasynda bolady.
Memlekettik qoldaý jáne sharýalarǵa jeńildikter
Maqta salasyna memleket tarapynan keshendi qoldaý kórsetilip keledi. Sharýalarǵa tuqym, tyńaitqysh pen sýarý shyǵyndary boiynsha sýbsidiialar beriledi. Eń qyzyǵy – maqta tuqymdary elimizde 100 paiyz sýbsidiialanatyn jalǵyz daqyl sanalady. Budan bólek, ekinshi reprodýktsiialy tuqymdarǵa da qoldaý qarastyrylǵan.
Aýyl eńbekkerleri jeńildetilgen nesie men arzandatylǵan dizel otynyn «Keń dala 2» jáne «Jeńildetilgen lizing» baǵdarlamalary arqyly ala alady.
Maqta ósirý – tek aýyl sharýashylyǵy ǵana emes, ol jer men eńbektiń úilesimdi qarym-qatynasynyń kórinisi. Qazirgi tańda jerdi utymdy paidalaný men ekologiialyq tepe-teńdikti saqtaý basty basymdyqqa ainalyp otyr.
Maqta óndirisiniń zamanaýi tehnologiialarmen ushtasýy aýyl ekonomikasyn damytyp qana qoimai, eldiń eksporttyq áleýetin arttyrýda. Bul – agroónerkásip kesheniniń tiimdi basqarylýy men jer qatynastarynyń durys jolǵa qoiylýynyń naqty nátijesi.
