Prezident Qasym-Jomart Toqaev Briýsselde Eýropalyq keńes prezidenti Antoniý Koshta jáne Eýropalyq komissiia prezidenti Ýrsýla fon der Liaienmen kelissózder ótkizdi, dep habarlaidy dalanews.kz.
Memleket basshysy Qazaqstan men Eýroodaq arasyndaǵy qarym-qatynas strategiialyq sipatqa ie bolǵanyn atap ótti.
«Senim men ózara qurmetke negizdelgen qarym-qatynasymyz shynaiy strategiialyq sipatqa ie boldy. Men Briýsselge ózara múddege sai barlyq baǵyttaǵy yntymaqtastyqty tereńdetý maqsatymen keldim. Jańa ǵana qol qoiylǵan mańyzdy kelisimder men memorandýmdar seriktestikti odan ári nyǵaitýǵa beiildi ekenimizdiń aiqyn dáleli. Búgingi kelissózderdiń qorytyndysy qazaq-eýropalyq yntymaqtastyqtyń jańa paraǵyn ashady dep senemin», – dedi Qasym-Jomart Toqaev.
Prezident Eýroodaq Qazaqstannyń eń iri saýda jáne investitsiialyq seriktesi ekenin aityp, kólik-logistika, Transkaspii dálizi, energetika, tsifrlandyrý, aýyl sharýashylyǵy, klimat jáne sý qaýipsizdigi salalaryndaǵy ózara is-qimylǵa erekshe toqtaldy.
Sondai-aq Memleket basshysy Erasmus+ jáne Horizon Europe baǵdarlamalary aiasyndaǵy yntymaqtastyqtyń mańyzyn atap ótti.
Óz kezeginde Eýropalyq keńes prezidenti Antoniý Koshta Qazaqstannyń Ortalyq Aziiadaǵy kólik bailanysyn qamtamasyz etýdegi róline joǵary baǵa berdi.
«Qazaqstan kólik bailanysyn qamtamasyz etýdegi negizgi býyn bolyp tabylady. Transkaspii halyqaralyq kólik baǵyty osy saladaǵy tabysty yntymaqtastyqtyń jarqyn mysaly. Qazirgi jańa jaǵdaida tsifrlyq tehnologiialardyń mańyzy arta tústi. Sondyqtan bilimge, ǵylymi zertteýler men innovatsiialarǵa investitsiia salý asa mańyzdy. Biz Ortalyq Aziia elderimen yntymaqtastyqty jalǵastyrýǵa shynaiy niettimiz», – dedi Antoniý Koshta.
Eýrokomissiia tóraǵasy Ýrsýla fon der Liaien sońǵy on jylda Qazaqstan men Eýroodaq arasyndaǵy saýda kólemi aitarlyqtai óskenin aityp, taraptar arasyndaǵy viza rejimin jeńildetý jónindegi kelissózderdiń aiaqtalýǵa jaqyn qalǵanyn málimdedi.
«Bul ózdiginen kóp nárseni ańǵartady. Sonymen qatar ártúrli salada áleýetimizdi odan ári arttyrýǵa múmkindik bar. Biz saýda bailanystaryn, sonyń ishinde aýyl sharýashylyǵy salasynda ártaraptandyrýǵa múddelimiz. Sondai-aq saýda men investitsiiaǵa jańa serpin berý úshin aradaǵy kedergilerdi joiý máselesin talqylaýymyz qajet. Taǵy bir mańyzdy jait – biz viza rejimin jeńildetý jáne readmissiia týraly kelisimder boiynsha belsendi jumys júrgizip jatyrmyz. Bul baǵyttaǵy kelissózder is júzinde aiaqtaldy», – dedi Ýrsýla fon der Liaien.
