Tekseris qorytyndysy boıynsha, ushaqtardyń qozǵaltqyshynan maı aqqany, áınekterdiń qatparlanýy, konstrýksıany qorǵaý úshin skoch qoldanylǵany jáne shınalardyń tozǵany anyqtalǵan.
Áýe kemelerin teksergennen keıingi brıtanıalyq ınspektorlardyń shyǵarǵan qorytyndylary men sýretterin Qazaqstannyń avıasıalyq ákimshiliginiń ushý qaýipsizdigi departamentiniń basshysy Lında Orledı brıfıńte tanystyrdy.
– Ushaqtyń aldyńǵy jaǵy zaqymdanǵan. Másele onyń artynda radardyń turǵanynda. Áýe kemesiniń bortynda ornatylǵan radardyń durys jumys isteýi úshin jaǵdaıdyń jasalýy óte mańyzdy, – dep túsindirdi ol. – Eki qozǵaltqyshta da ıdentıfıkasıalyq taqtaıshalar joq. Bul óte mańyzdy eskertý. Olar mindetti túrde bolýy kerek. Bek Air ushaqtarynyń 50 paıyzynda eki qozǵaltqyshta da ıdentıfıkasıalyq taqtaıshalar bolmaǵan. Bul óte qaýipti belgi, – dedi Orledı.
«Munda maıdyń aqqany kórinedi. Men, ushqysh retinde, óz áýe kememde mundaıdy kórgim kelmeıdi. Sondaı-aq, tehnıkalyq qyzmet kórsetý jónindegi ınjener ondaıdy baıqasa, keıin qaı kúni, qansha suıyqtyq joǵalǵanyn qadaǵalaý mańyzdy. Biz maıdyń aqqany tirkelgen birde-bir tizilimdi taba almadyq. Inspektorlar árbir Bek Air ushaǵynyń astynan osyndaı kemshilikter tapty», – dedi Orledı.
Sondaı-aq, fúzelájda da maıdyń izderi bar. «Barlyq ushaqqa metal skoch jabystyrylǵan. Áýe kemesinde skoch qoldanýǵa bolady, biraq bul arnaıy skoch bolýy tıis jáne ony paıdalaný deregi jazbasha bekitilýi tıis. Ol boıynsha eshqandaı qujat tabylǵan joq» dep atap ótti Orledı.
– Ushqyshtar kabınasy kóp qabatty áınekpen qorǵalýy tıis. Munda pılottar kabınasynyń sol terezeniń áınegi qatparlanyp ketkenin kóresiz, – dedi Orledı.
Mamannyń aıtýynsha, Bek Air ushaqtarynyń júk salatyn jerindegi panelderde órtke qarsy taspalary joq nemese nashar jaǵdaıda. Sondaı-aq, shınalar tozǵanyn anyqtapty. Onyń aıtýynsha, avıakompanıanyń barlyq borttarynda júk bóliginiń eden panelderi tesik bolǵan.
