Búgin Almaty oblysynda tarih betterinde qalatyn erekshe bir shara ótti. Almaty oblysy ákimdiginiń qoldaýymen elimizde tuńǵysh ret álemdi saýsaq ushymen tanityn balalarǵa arnalǵan brail qarpinde “Ainalaiyn” atty áńgimeler jáne óleńder jinaǵy jaryq kórip, onyń tusaýy Qonaev qalasynda kesildi. Joba avtory - “Bilte” qoǵamdyq qorynyń prezidenti, elimizge syily qoǵam qairatkeri, Qazaqstan Respýblikasy Parlamenti Májilisiniń VII shaqyrylymynyń depýtaty, Qazaqstan Jazýshylar jáne Jýrnalister Odaǵynyń múshesi, aqyn - Maqpal Mysa.
Bul joba elimizde alǵash ret júzege asyrylyp, kórý múmkindigi shekteýli balalar úshin qazaq tilinde shyǵarylǵan kitaptardyń negizi desek bolady.
Bul jinaqtarda qazirgi zaman jazýshylarynyń balalar álemine áserli áńgimeleri men ertegileri toptastyrylǵan.
Jinaqqa 22 avtordyń 15 áńgimesi men 15 óleńi enip otyr. Bir aita keterligi - elimizde bul sanattaǵy jandarǵa arnalǵan qazaq tilinde júieli jáne keshendi túrde basylǵan kitap múlde joqtyń qasy.
Kitap balalardyń kórkem oilaý qabiletin shyńdap, bederli qaripti oqý daǵdysyn damytýǵa, rýhani-tanymdyq bilimin arttyrýǵa kómektesedi.
Jinaq 1000 danamen jaryq kórip otyr. Kitaptar elimizdiń bar aimaǵyndaǵy zaǵip balalar mektepterine, arnaiy uiym, kitaphanalarǵa tegin taratylady.
Qolǵa alynǵan bastama Prezidentimiz Qasym-Jomart Toqaevtyń inkliýzivti qoǵam qurý jolyndaǵy mańyzdy qadamdaryna ún qosyp, el úshin mańyzdy ári ózekti máseleni sheshýge baǵyttalyp otyr. Ádebiet pen meiirim bir-birimen ushtasatyn osynaý kitaptyń árbir beti, kórý múmkindigi shekteýli balalar úshin jańa bir álemniń esigin ashyp, olardyń júrekterine jaryq pen úmit sáýlesin seýip, ómirlerin sulýlyqpen bezendirýge arnalǵan naǵyz syilyq ekeni sózsiz.
Qoǵamda ár balanyń teń múmkindikterge qol jetkizýi — barshaǵa ortaq ári mańyzdy ustanym. Osyndai qundylyqty tereń túsine otyryp, mundai kitaptardy júieli túrde shyǵarý — tek ádebiet salasyndaǵy qadam ǵana emes, balalardyń bolashaǵyna degen qamqorlyq pen úmittiń belgisi. Árbir shyǵarylǵan kitap — bul qoljetimdilik pen teńdik jolynda jasalǵan qadam, al onyń mańyzy ýaqyt ótken saiyn arta beretin asyl qazyna.
Kitapqa elimizdiń 22 belgili avtorynyń áńgimeleri men óleńderi engen. Olardyń shyǵarmalary jas oqyrmanǵa tek bilim men tárbie ǵana emes, júrekke jyly úmit pen kúsh-jiger syilaidy.
Bul jobanyń júzege asýy kópshiliktiń qoldaýymen múmkin boldy. Kitaptyń tanystyrylymyna qatysqan Qazaqstan Respýblikasy Senatynyń tóraǵasy Maýlen Ashimbaevtyń atynan Senat depýtaty Amangeldi Tolamisov, Májilis depýtaty Maksim Rojin, Almaty oblystyq máslihatynyń hatshysy Qýat Sultanuly, aqyn Almas Ahmetbekuly, zaǵip jandarǵa arnalǵan respýblikalyq kitaphana direktory Ashat Qusaiynuly, jazýshy Dildár Mamyrbaeva jáne basqa da qurmetti qonaqtar kitaptyń mańyzdylyǵyn atap ótip, joǵary baǵalaryn berip kópshilik aldynda jyp-jyly lebizderin jetkizdi.
Bul kitap, kóz janarynan erte aiyrylǵan balalarǵa arnalǵan, alaida onyń tereń máni tek kórý qabiletinen aiyrylǵandarmen shektelmeidi. Ol jaryq dúnieni kózben kúnde kórip júrgen adamzat balasynyń tabiǵat pen jaratylysqa jáne adamdarǵa degen meiirimi men súiispenshiliginiń kemimimeýin diripteitin sabaq desek, artyq aitpaǵan bolar edik.
Kitaptyń árbir beti balalardy armandaryna umtylyp ushýǵa, ómirdiń barlyq qiyndyqtaryna qaramastan, óz joldaryn tabýǵa shaqyrady. Bul bastama balalarǵa álemniń sulýlyǵyn sezinip, qarańǵylyqtyń ózinde jaryq izdeýge múmkindik beredi. Osylaisha, qarańǵylyqty jaryqqa ainaldyratyn bul týyndy, balalardyń júrekterinen máńgilik oryn alady degen senim mol.
«Ainalaiyn» jinaǵynyń jaryq kórýi — tek ádebiet álemindegi jańalyq emes, ol ár balanyń ómirine qosylǵan jańa jol, jańa múmkindik. Bul jobany qoldaǵan Almaty oblysynyń ákimdigine erekshe alǵysymyzdy bildirip, bizdiń eńbegimizdiń tek basy ǵana ekenin aitamyz. Keleshekte mundai izgilikti ister jalǵasyn taba bermek, - dedi qor prezidenti Maqpal Mysa.
Árbir bala baqytty bolýǵa, óz armandaryna qol jetkizýge tolyq quqyly. Bul baqytqa birge qol ustasyp, jańa álemge qadam basqanda ǵana jetemiz. «Ainalaiyn» kitaby balalardyń júregine úmit pen qýanysh, meiirim men jyly sezim uialatady. Ol árbir balanyń janyn jarqyratyp, ómirdiń san alýan múmkindikterine jol ashady, bolashaǵyna senim uialatyp, batyl qadam jasaýǵa yntalandyrady.
Jaryq pen baqyttyń joly árdaiym sizdermen bolsyn qulynshaqtar!
