Endi memleket jańa jyldan keiin barlyq tetikteri arqyly bólip tóleýmen kúrespek. Úkimettiń oiynsha, bólip tóleýdiń qazaqstandyqtardyń qaryzǵa batýy men infliatsiiadaǵy áseri zor. Sondyqtan bul naryqta óte qatań tártip ornatylatyn bolady, dep habarlaidy Dalanews.kz
«Memleket bul másele týraly negizi kópten beri oilanyp júrgen. Ótken aptada Halyqaralyq valiýta qory elimizdegi arnaiy missiiasyn aiaqtap, óziniń qorytyndy usynystaryn berdi. Halyqaralyq valiýta qory bizde biraz ýaqyt bolyp, elimizdiń ekonomikalyq jaǵdaiyn tekserip, aýdit jasaǵan bolatyn. Qorytyndy esepte bizdegi halyqqa arnalǵan kredittik, qaryz naryǵyn qatańdatý týraly usynystar bar. Halyqaralyq sarapshylar men bizdiń qarjy biliginiń oilary bir jerden shyqqandyqtan, endi eshteńege qaramai halyqqa beriletin qaryz naryǵyn tolyq qysýǵa saiasi sheshim qabyldanyp otyr», - deidi DALA INSIDE derekkózi.
Negizi, bólip tóleýmen kúres biyldan bastalyp ketken. Qazan aiynan bastap Saýda jáne integratsiia ministrligi ázirlegen jańa erejeler kúshine endi. Eger bólip tóleý satýshynyń óz qarajaty esebinen usynylsa, baǵa japsyrmalarynda birden tóleý baǵasy jáne bólip tóleý baǵasy bólek kórsetilýi tiis. Bul satyp alýshyǵa taýardyń naqty qunyn jáne bólip tóleý múmkindigi úshin qansha shyǵyndalatynyn anyq túsinýge múmkindik beredi. Al eger taýarlar banktermen sinhrondalǵan marketpleister arqyly satylsa, onda bólip tóleýdi satýshy emes, bank óziniń qaryz qarajaty esebinen, bank pen satyp alýshy arasyndaǵy nesie sharty negizinde beredi. Osylaisha, jańa erejeler tek satýshynyń ózi usynatyn bólip tóleýlerge qatysty jáne marketpleister arqyly rásimdeletin banktik rassrochkaǵa qoldanylmaidy.
Memleket munymen toqtamady. Endi satýshylar taýardy nemese qyzmetti óz qarajaty esebinen bólip tóleýge usynǵan jaǵdaida, bul aqparatty kredittik biýrolarǵa berýge mindetti bolady. Rassrochka kreditpen teńestiriledi. Kredittik biýroda halyqtyń tek krediti emes, rassrochkasy týraly da aqparat bolady. Demek, bólip tóleýi bar azamattardyń jańa nesie alýy qiyndai túspek.
«2026 jyly kredit te, rassrochka da azaiýy tiis. Úkimet qaryzy bar adamdar sany qysqaryp, importtyq taýardyń satylýy quldyrap, sodan infliatsiianyń tómendeýin kózdep otyr. Bizde import qysqarsa, ol teńge baǵamyna da jaǵymdy bolady», - deidi derekkóz.
Dál qazir shamamen 5 million otandasymyzda rassrochka bar. Kredit naryǵy rasymen qyzyp ketken. 574 myń adamnyń basynda 90 kúnnen astam tólemegen kem degende bir problemalyq krediti bar. Al qansha rassrochkanyń problemalyq ekeni olar buǵan deiin kredittik dosege ilinbegendikten belgisiz bolyp keldi. Endi osynyń barlyǵy tártipke keltirilmek.
