Kókshetaý qalasynda júktiliktiń 34-aptasynda júrgen áielge qańǵybas itter shabýyl jasady, dep habarlaidy Dalanews.kz.
Qaladaǵy kópbeiindi oblystyq aýrýhananyń málimetinshe, qazir oǵan qutyrýǵa qarsy vaktsina salynyp, dárigerler ana men uryqtyń jaǵdaiyn baqylaýǵa alǵan.
Oqiǵa 16 sáýirde saǵat 12:30 shamasynda bolǵan. Kókshetaý qalasyndaǵy kópbeiindi oblystyq aýrýhananyń qabyldaý bólimine H. esimdi áiel oń jaq baltyryndaǵy tistelgen jara jáne aýyrsyný shaǵymymen júgingen.
Naýqastyń aitýynsha, jaraqat aýrýhanaǵa kelgenge deiin shamamen 30 minýt buryn qańǵybas itter tobynyń shabýyly saldarynan alynǵan.
Dárigerlik tekserý barysynda oń jaq baltyrdyń ortańǵy úshten bir bóliginiń artqy betinde uzyndyǵy 5 santimetrge deiin jetetin tistelgen jaralar anyqtalǵan. Oǵan “oń jaq baltyrdyń tistelgen jaralary” diagnozy qoiyldy, - delingen aqparatta.
Meditsina qyzmetkerleri naýqasqa shuǵyl túrde alǵashqy hirýrgiialyq óńdeý júrgizip, jaraǵa maily tańǵysh salǵan.
Sonymen qatar, aldyn alý maqsatynda áielge qutyrýǵa qarsy antirabiialyq «Rabivaks» vaktsinasy, sirespege qarsy sarysý jáne sirespe men difteriiaǵa qarsy ADS-M vaktsinasy engizilgen.
Dárigerlerdiń aitýynsha, júktilikti eskere otyryp, negizgi mindet – onyń ári qaraiǵy aǵymyn turaqty baqylaý. Bul baqylaý áieldiń dispanserlik esepte turǵan meditsinalyq uiymy arqyly júrgiziledi.
Qazirgi tańda áiel men qursaqtaǵy balanyń jaǵdaiy kúsheitilgen meditsinalyq baqylaýda.
Buǵan deiin Aqmola oblysynyń Qosshy qalasynda da it áieldi talap tastaǵan bolatyn.
Odan bólek, aqpan aiynda Almaty oblysynda on shaqty it áielge tap bergen.
Eske sala keteiik, buǵan deiin sońǵy bir jyldyń ishinde 41 366 adamdy it qapqanyn jazdyq. Onyń ishinde 23 134 adam buralqy itterdiń shabýylynan zardap shekken.
Búginde Májiliste buralqy itterge qatysty zań jobasy talqylanyp jatyr. Zań jobasyn tanystyrǵan depýtat Edil Jańbyrshin Qazaqstanda buralqy itterdi keminde 5 kún ustaý usyndy.
Sondai-aq depýtattar qańǵybas janýarlardy aýlaý men sterilizatsiialaýǵa bólingen biýdjet qarajatynyń jumsalýyna kúmán keltirip, quzyrly organdardan jekemenshik panalardyń qyzmetin tekserýdi talap etti.
