«Túngi 11-lerde aýqattanǵymyz kelip qonaqúidiń dámhanasyna bas suqtyq. Jabylyp qalypty. Tek 22.00-ge deiin isteimiz deidi. Talap sondai.
Shaǵyn jáne orta biznestiń jumysyn baqandai bir saǵatqa qysqartqannyń kesirinen (23:00-den 22:00-ge deiin) Almaty biýdjeti ai saiyn 7-8 mlrd salyqtan qaǵylyp otyr.
– deidi kásipker.
Boqaevtyń atap ótkenindei Almaty biýdjetiniń 64 paiyzy shaǵyn-orta biznestiń salyǵynan quralady. Bul, negizinen, saýda-sattyq, oiyn-saýyq jáne qyzmet kórsetý salasy. Bir jylda shaǵyn-orta biznes qala biýdjetine 1,8 trln teńgeden bastap salyq tóleidi eken.
"Muny aldymen 365 kúnge, artynsha 12 saǵattyq jumys kúnine bólińiz. Shamalap alǵanda, Almaty biýdjetine keshki ýaqyttyń bir saǵatynda 250 mln teńge salyq túsýi tiis. Bul soma aiyna 7-8 mlrd teńgeni quraidy.
Munyń esep-qisabyn biz emes, Ulttyq ekonomika ministri men Almaty ákimi jasaýǵa tiisti edi.
Memkiris departamenti men Kásipkerlik basqarmasy shaǵyn jáne orta bizneske shyn jany ashysa qalanyń bas sanitary Bekshin aldaryna shaqyryp, kommertsiialyq nysandardyń jumys ýaqyty nelikten shektelip otyrǵanyn negizdep berýdi talap etýi qajet.
Eger ótken jolǵydai "nakonets-to" dep dóidalaǵa laǵyp ketse, Saǵyntaev sózbuidaǵa salmai Bekshindi ornynan alýy tiis! Bekshin bul qaladan qarasyn batyrsyn", – deidi Boqaev.
Kásipkerdiń pikirinshe biznestiń tynysyn taryltyp, qaladaǵy kommertsiialyq belsendilikti jasandy jolmen býyndyrýǵa bolmaidy. Dál qazir buǵan asa bir qajettilik joq.
Bekshinniń kesirinen ShOB bankrot bolady. Boqaevtyń aitýynsha Bekshinniń karantindi shekteýge qatysty sheshimderi saýatsyz.
"Almatydaǵy aýzy-murnynan shyqqan avtobýstardy qarańyz. Halyqtyń nópirin kórseńiz, shoshisyz. Qisynsyz emes pe? Qoǵamdyq kólikke halyqty lyq toltyryp alasyzdar da, qaýipsizdikti qamtamasyz ete alatyn kommertsiialyq nysandardy jaýyp tastaisyzdar. Osy aqylǵa siia ma?
Koronavirýsqa qatysty málimet taratatyn saitty súzip shyqtym. "Indet túngi saǵat 22:00-den kóshe kezedi" degen tujyrymdy kezdestirmedim.
Saiyp kelgende, munyń bárin Saǵyntaev pen Bekshin bylyqtyryp otyr. Olar qabyldaǵan sheshimniń negizi joq, áiteýir "tise terekke, timese butaqqa" degenniń keri", – deidi.
Boqaevtyń aitýynsha jumystan qaitqan jurt aǵaiyn-týys, jora-joldasymen kezdesýdi keshki jeti men túngi onnyń aralyǵynda josparlaýǵa májbúr. Sodan bolar álgi ýaqytta dámhanalarda adam ainalar oryn joq. Eldiń bári osy ýaqytqa úlgerýge tyrysady. Al mundai jaǵdaida indet aýa jaiylyp, adamnan adamǵa juǵýy múmkin.
"Almaty ákimi men qalanyń bas sanitary osyny eskerdi ma? Bilik barlyq biznes nysandardyń jumys ýaqytyn uzartýy qajet. Bular ǵana emes, qoǵamdyq kólik qozǵalysy, halyqqa qyzmet kórsetý ortalyqtary, áleýmettik mańyzy bar nysandarǵa túngi ýaqytta jumys isteýge múmkindik berý kerek. Sóitip jumys-sharýasyn sheshkisi keletin halyqtyń nópirin azaitýǵa bolady. Biraq buǵan qulaq túrer bilik bar ma?
Kerisinshe, sailaýdyń qarsańynda karantindi kúsheite túsýi ǵajap emes, sóitip jeke kásipkerlerdiń túbine jetip tynbaq", – deidi Boqaev.
Ázirlegen, Dýman BYQAI
