QMDB-nyń Tóraǵasy, Bas Múfti
Erjan Malǵajyulyna
Semei qalasyndaǵy bir munaraly
«Aǵash» meshitiniń jamaǵattary atynan
Ashyq hat
Qurmetti, Erjan qajy Malǵajyuly haziret! Ótken jyly jer daýyna qatysty Úkimet otyrysynda aitylǵan Elbasynyń joǵarydaǵy sózi árqaisymyzdyń jadymyzda bolar. Halyqtyń birligimen yntymaǵyna syzat túsiretin kez-kelgen asyǵys sheshimge jol berýge bolmaityndyǵyn qadap turyp eskertken Kóshbasshy sol joly jer satýǵa qatysty zańdy keri qaitartqanyn da Siz jaqsy bilesiz. Muny aityp otyrǵan sebebimiz, jergilikti jerdiń ókili Maqsat qajy Altybaidyń usynysymen, joǵarǵy dini bilimi joq Dáýlet Maqajanovty meshitimizge bas imam etip taǵaiyndaǵan buiryǵyńyz asyǵys jasalynǵan qadam dep bilemiz. Sondyqtan da ol bizdiń narazylyǵymyzdy týdyrýda.
Qurmetti, Erjan qajy Malǵajyuly! Siz bir munaraly aǵash meshitiniń bas imamy Zaralhan qajyny jaqsy bilesiz. Ol kisiniń asyl dinimizge sińirgen uzaq jylǵy eńbegi men el aldyndaǵy abyroi bedelin Sizge aityp túsindirý artyq bolar. «Arazdasyp aǵaiyn keter edi, Bir qariia bolmasa bir aýylda» dep aqiyq aqynymyz Muqaǵali Maqataev jyrlaǵandai birjarym ǵasyrdan astam tarihy bar kóneniń kózindei bolǵan meshitimizdiń ishine kirseń ótkennen syr shertetin sol baiaǵy keskin kelbetin búgingi kúnge deiin saqtap kelýi, namazhan jamaǵattarymyzdyń jat aǵymdardyń jeteginde ketip qalmai, ózimizdiń hanafi mázhabymyzdy berik ustanýy, senimine selkeý túsirmei bekem bolýy osy Zaralhan qariianyń úlgi-ónegesi dep berik aita alamyz. Ony múfti haziret ózińiz de joqqa shyǵara qoimassyz.
Qurmetti, bas múfti haziret! Eli syilaityn, elin syilaityn jáne de «imamnyń tulǵalyq kelbeti qandai bolý kerek?», degende «mine» dep maqtanysh sezimmen kórsete alatyn Zaralhan qajydan basqa imam dál qazirgi
ýaqytta bizge kerek emes. Allanyń sheshiminen basqa sheshimniń bári ózgeredi. Sondyqtan da ókil imamnyń aǵattyqqa boi aldyryp, kóptiń pikirimen sanaspai jasaǵan usynysy boiynsha shyǵarǵan buiryǵyńyzdy ózgertip, Zaralhan qajyny meshitimizde imamdyq qyzmette qaldyrýyńyzdy suraimyz.
Ókil imam Maqsat qajy Altybaiǵa keler bolsaq, ol kisi men ózime unaǵan adammen ǵana jumys isteimin, dep ór minez tanytyp kóptiń pikirimen sanaspaýynda. Bul degenińiz kóptiń tileýiniń ústinde júrgen imamnyń basty kemshiligi dep bilemiz. Allanyń bir esimi – Halyq. Sondyqtan da bizdiń dana babalarymyz: «halyq Alladan bir saty tómen tur» dep aityp ketken bolatyn. Taǵy da: «Ulyq bolsań kishik bol», deidi bizdiń qazaq. Olai bolsa, laiyq bolsań alaqanyna salyp aialap ósiretin de, olai bolmaǵan jaǵdaida kúl etip óshiretin de halyq ekenin qai kezde de umytpaǵanymyz abzal. Al, Qazaqstan musylmandary dini basqarmasynyń imamdar forýmynda qabyldanǵan: «Imamnyń tulǵalyq kelbeti» táliminde imamnyń boiynda bolýy kerek qasietter taiǵa tańba basqandai etilip ashyq aitylǵan. Biz joǵaryda sóz etip otyrǵan kishipeiildilik týrasynda bylai delingen: «Kishipeiildilik (sypaiylyq, qarapaiymdylyq) – pendege Rabbysy tarapynan beriletin erekshe minez-qulyq. Kishipeiildilik – paiǵambarlar men kúlli muqarrabinder, áýlielerden miras bolǵan kórkem qasiet. Kishipeiil adam – jer betinde Rabbysynan qorqyp, odan uialyp, árdaiym ózin kórip tur degen oimen ulyqqa da, kishikke de birdei qarym-qatynas jasaityn jan. Alla Taǵala bylai deidi: «Rahmannyń quldary jer betinde kishipeiildilikpen júredi…». (Fýrqan súresi, 63-aiat). Bul aiattyń astarynda múminderge tán kishipeiildilik jatyr. Paiǵambarymyz (Oǵan Allanyń salaýaty men sálemi bolsyn) bir hadisinde: «Kim kishipeiildilik kórsetse, Alla onyń mártebesin ósiredi. Al, kimde-kim kókirek qaqsa, Alla Taǵala ony murnymen jer súzdiredi», – degen. (Imam Ahmad ibn Hanbal, Mýsnad). Al, órkókirektik – qurdymǵa alyp baratyn dert. Laǵynet atqyr shaitannyń Allanyń rahmetinen airylyp, qýylýyna sebep bolǵan da osy tákápparlyq, ór kókirektik. Alla Taǵala Quranda bylai deidi: «Jer júzinde dandaisyp júrme. Óitkeni, sen jerdi áste jara almaisyń da boi jaǵynan da taýlarǵa jete almaisyń». (Isra súresi, 37-aiat).
Paiǵambarymyz (Oǵan Allanyń salaýaty men sálemi bolsyn): «Kimniń júreginde shań tozańyndai tákapparlyq bolsa jánnatqa kirmeidi», – degen. (Mýslim, Termizi.)».
Al, basshylyqqa umtylyp, imam bolǵysy kelip júrgen Dáýlet Maqajanovqa keler bolsaq, eń áýeli dini bilimin jetildirsin, odan keiin aýyl bola ma, aýdan bola ma, qala bola ma sol jerlerdegi meshitterdiń bireýinen bastasyn. Oǵan bizdiń eshqandai qarsylyǵymyz joq. Óitkeni, ardaqty
Paiǵambarymyz (m.s.ǵ.) óziniń bir hadisinde: «Bilimdi talap etý – ár musylmanǵa paryz», – degen.
Qurmetti bas múfti, Erjan qajy Malǵajyuly haziret! Ózińizge ashyq hat arqyly bolǵan jaǵdaidy baiandai otyryp, Zaralhan qajyny meshitimizde imam etip qaldyrý jóninde oń sheshim qabyldap, kóptiń narazylyǵyna jol bermeidi degen úmittemiz.
Ashyq hatqa qol qoiýshylar (barlyǵy 280 adam, tizim jalǵasýda)…
