Jábirlenýshiniń densaýlyǵyna aýyr zıan keltirip, aıaǵynan aıyrylýyna sebep bolǵan júrgizýshi 15 mln teńgeden astam ótemaqy tóleýi tıis, dep habarlaıdy Dalanews.kz 

Bul aqparat Aqmola oblystyq sotynyń resmı paraqshasynda jazyldy. Ereımentaý aýdandyq sotynda adamnyń densaýlyǵyna aýyr zıan keltirýge ákep soqqan jol qozǵalysy erejelerin buzý deregi boıynsha qylmystyq is qaraldy.

2025 jyldyń shilde aıynda júrgizýshi jolaýshylardy Ekibastuzdan Astana qalasyna apara jatyp jolda aldyńǵy avtokólikpen soqtyǵysyp qalǵan.

Jol apaty saldarynan artqy jaqta otyrǵan, qaýipsizdik beldigin taqpaǵan jolaýshy aýyr jaraqat aldy: onyń oń aıaǵy ampýtasıalandy, sonymen qatar, mıyna qatty zaqym kelgen.

Sot anyqtaǵandaı, aıyptalýshy avtokólikti sharshaǵan kúıde basqarǵan, jyldamdyqty asyrǵan, alda kele jatqan kólikpen ara qashyqtyqty saqtamaǵan jáne qaýipsizdik beldigin taqpaǵan kúıi jolaýshylardy tasymaldaǵan.

Júrgizýshi kinásin moıyndap, jasaǵan áreketine ókingenin bildirdi. Zardap shekken jolaýshy aıyptalýshyny bas bostandyǵynan aıyrmaýdy, tek qozǵalys erkindigin shekteý jazasyn qoldanýdy surady.

Er adamnyń kinási oqıǵa ornyn, avtokólikti tekserý, fotosýretter men jol apaty shemasy, saraptama qorytyndylary jáne is materıaldarynyń basqa derekteri arqyly rastaldy.

Jazany taǵaıyndaý kezinde sot aıyptalýshynyń oń sıpattamasyn, buryn sottalmaǵanyn, zardap shegýshiniń pikirin, sondaı-aq, kinásin moıyndaýy men ókinýin eskerdi.

Sot úkimimen er adamǵa bir jylǵa qozǵalys erkindigin shekteý jazasy taǵaıyndalyp, probasıalyq baqylaý ornatyldy. Sondaı-aq, ol bir jylǵa kólik basqarý quqyǵynan aıyryldy.

Zardap shekken jolaýshynyń paıdasyna materıaldyq shyǵyn, moraldyq zıan jáne sottaǵy ókildik qyzmet úshin ketken shyǵyndar ótelip, jalpy somasy 15 mıllıon teńgeden asty. Sot sheshimi áli zańdy kúshine engen joq.