Almaty qalasyndaǵy Ǵ.Músirepov atyndaǵy №86 mektep-gimnaziiasy oqý kezinde mektep ishinde aǵymdaǵy jóndeý jumystaryn júrgizýdi josparlap otyr. 11 qarasha kúni jariialanǵan lottyń quny 22,3 mln teńgeni quraidy. Alaida memlekettik satyp alý portalynda jariialanǵan konkýrs birneshe zań talaptarynyń tikelei buzylǵanyn kórsetedi. Dalanews.kz redaktsiiasy qujattarǵa sholý jasaý barysynda úsh birdei zańsyzdyqty anyqtady.
Sanitarlyq talaptardyń tikelei buzylýy
Birinshiden, mektep ákimshiligi jóndeý jumystaryn oqý protsesi kezinde bastamaq. Bul – sanitarlyq talaptarǵa qaishy. Qazaqstan Respýblikasy Densaýlyq saqtaý ministriniń 2021 jylǵy №KR DSM–76 buiryǵymen bekitilgen sanitarlyq erejelerdiń 57-tarmaǵynda: “Obektiler jumys istep turǵan kezde avariialyq jaǵdailardy joiýdan basqa, aǵymdaǵy nemese kúrdeli jóndeý jumystaryn júrgizýge jol berilmeidi” dep naqty kórsetilgen. Iaǵni oqý jyly kezinde jóndeý jasaýǵa tyiym salynǵan. Bul norma balalardyń qaýipsizdigi men oqý ortasynyń sanitarlyq jaǵdaiyn saqtaý maqsatynda engizilgen. Soǵan qaramastan mektep jóndeýdi dál oqý kezeńinde josparlap otyr.
Múmkindigi shekteýli jandardyń uiymdaryna basymdyq berilmegen
Ekinshiden, memlekettik satyp alý áleýmettik osal toptarǵa qatysty zań talaptaryn saqtamaǵan. “Memlekettik satyp alý týraly” zańnyń 27-babyna sáikes, belgili bir jumys túrleri, onyń ishinde jóndeý jumystary men jihaz daiyndaý – múmkindigi shekteýli jandardyń qoǵamdyq birlestikteri nemese solar qurǵan kásiporyndar arasynda ǵana oinatylýy tiis. Bul uiymdar úshin atalǵan jumys 100% kólemde arnaiy tártippen satyp alynýy qajet. Alaida №86 mektep jariialaǵan konkýrsta mundai basymdyq qarastyrylmaǵan, iaǵni zańmen belgilengen áleýmettik kvota eskerilmegen.
Jumys pen taýar bir lotta kórsetilgen
Úshinshiden, mektep jariialaǵan lotta “jumys” pen “taýar” bir lotqa biriktirilgen. Tehnikalyq erekshelikte jóndeý jumystary ǵana emes, sonymen qatar shkaftar, jihazdar daiyndaý jáne ornatý da engizilgen. Memlekettik satyp alý zańnamasy jumys pen taýardy bir lotta biriktirýge tyiym salady. Jihaz – taýar, al jóndeý – jumys. Ekeýi birge kórsetilgen jaǵdaida konkýrs ádil ótpeidi.
Qorytyndylai kele, №86 mektep-gimnaziiasy jariialaǵan jóndeý konkýrsy oqý jyly kezindegi qaýipsizdik talaptaryn, múmkindigi shekteýli jandar uiymdaryna beriletin zańdy artyqshylyqty jáne memlekettik satyp alýdyń bazalyq qaǵidattaryn óreskel buzǵan.
Osy máselege bailanysty Dalanews.kz redaktsiiasy Almaty qalasy ákimdigine resmi suraý joldady.
