Almatydaǵy ekonomikalyq tergeý departamenti komissiialyq dúkender, avtokólik jaldaý qyzmetteri jáne onlain platformalar arqyly jumys istegen jasyryn mikronesielik júieni anyqtady, dep habarlaidy Dalanews.kz.
Mekemeniń málimeti boiynsha, qalada 14 zańdy jáne bir jeke tulǵaǵa qatysty qylmystyq is tirkelip, azamattarǵa keltirilgen shyǵyn tolyq ótelgen.
Departament basshysynyń orynbasary Sabyrǵali Balǵalievtiń aitýynsha, qylmysty taldaý barysynda keibir kompaniianyń klienttermen «taýar satyp alý» shartyn jasasyp, is júzinde olardy kepil retinde paidalanǵany, múlikti qaita-qaita satyp jiberip, jasyryn ústemaqy alǵany anyqtalǵan.
Tergeý aiasynda alty mikroqarjylyq uiymǵa, onyń ishinde Creditum jáne Sofi Finance uiymdaryna qatysty is sotqa joldandy. Qaryz alýshylar kepildik shart túrinde rásimdelgen mikroqaryzdar úshin alǵan somadan 3-5 ese kóp tóleýge májbúr bolǵany is barysynda belgili boldy, — dedi Sabyrǵali Balǵaliev Óńirlik kommýnikatsiialar qyzmetinde ótken brifingte.
Sonymen qatar, 7PAYda.kz saity arqyly 7 myńnan astam adamǵa 10 mlrd. teńgeden asatyn zańsyz qaryz bergen Aiken Tech JShS-niń qyzmeti toqtatyldy. Sonymen birge, Comfort Time JShS-niń jalǵan zeinetaqy aýdarymyn paidalanyp, 400 mln teńgeden asatyn 140 qaitarymsyz kredit alýǵa múmkindik bergen shema anyqtaldy.
