الماتىداعى ەكونوميكالىق تەرگەۋ دەپارتامەنتى كوميسسيالىق دۇكەندەر، اۆتوكولىك جالداۋ قىزمەتتەرى جانە ونلاين پلاتفورمالار ارقىلى جۇمىس ىستەگەن جاسىرىن ميكرونەسيەلىك جۇيەنى انىقتادى، دەپ حابارلايدى Dalanews.kz.

مەكەمەنىڭ مالىمەتى بويىنشا، قالادا 14 زاڭدى جانە ءبىر جەكە تۇلعاعا قاتىستى قىلمىستىق ءىس تىركەلىپ، ازاماتتارعا كەلتىرىلگەن شىعىن تولىق وتەلگەن.

دەپارتامەنت باسشىسىنىڭ ورىنباسارى سابىرعالي بالعالييەۆتىڭ ايتۋىنشا، قىلمىستى تالداۋ بارىسىندا كەيبىر كومپانيانىڭ كليەنتتەرمەن «تاۋار ساتىپ الۋ» شارتىن جاساسىپ، ءىس جۇزىندە ولاردى كەپىل رەتىندە پايدالانعانى، مۇلىكتى قايتا-قايتا ساتىپ جىبەرىپ، جاسىرىن ۇستەماقى العانى انىقتالعان.

تەرگەۋ اياسىندا التى ميكروقارجىلىق ۇيىمعا، ونىڭ ىشىندە Creditum جانە Sofi Finance ۇيىمدارىنا قاتىستى ءىس سوتقا جولداندى. قارىز الۋشىلار كەپىلدىك شارت تۇرىندە راسىمدەلگەن ميكروقارىزدار ءۇشىن العان سومادان 3-5 ەسە كوپ تولەۋگە ءماجبۇر بولعانى ءىس بارىسىندا بەلگىلى بولدى، — دەدى سابىرعالي بالعالييەۆ وڭىرلىك كوممۋنيكاسيالار قىزمەتىندە وتكەن بريفينگتە.

سونىمەن قاتار، 7PAYda.kz سايتى ارقىلى 7 مىڭنان استام ادامعا 10 ملرد. تەڭگەدەن اساتىن زاڭسىز قارىز بەرگەن Aiken Tech ءجشس-نىڭ قىزمەتى توقتاتىلدى. سونىمەن بىرگە، Comfort Time ءجشس-نىڭ جالعان زەينەتاقى اۋدارىمىن پايدالانىپ، 400 ملن تەڭگەدەن اساتىن 140 قايتارىمسىز كرەديت الۋعا مۇمكىندىك بەرگەن سحەما انىقتالدى.