Senat kýlýarlarynda Mádeniet jáne aqparat ministri Aida Balaeva elorda politsiiasynyń ekstremizmge qarsy bólimshesine shaqyrylǵan bloger Aida Jeksenovaǵa qoldaý bildirdi, dep habarlaidy Dalanews.kz.
Ministrdiń aitýynsha, vedomstvonyń zańgerleri jaǵdaidy zerttep jatyr. Al ózi blogerdiń áreketinen eshqandai quqyqbuzýshylyq kórip otyrǵan joq ekenin aitty.
Balaeva Jeksenovany uzaq jyldar boiy belsendi azamattyq kózqarasymen tanylǵan bloger retinde biletinin aitty.
"Men ony burynnan baqylap júremin. Ol óte belsendi bloger, azamattyq ustanymy bar adam. Árdaiym óz oiyn ashyq aitady. Keide bilikti synaidy, biraq bul konstrýktivti syn, qalypty jaǵdai. Onyń ústine, onyń qazirgi jaǵdaiyn da eskerdim, júkti ekenin bilemin", - dedi ministr.
Ol sondai-aq Jeksenovany «áiel retinde» qoldaǵanyn aityp, politseilerdiń tekserýi belgili bir azamattyq aryzdan keiin rásimdik túrde bastalǵan bolýy múmkin ekenin atap ótti.
Eske salaiyq, 19 qarashada Astanada bloger Aida Jeksenovany Timatidiń kontsertine boikot týraly jazbasyna bailanysty ekstremizmge qarsy bólimge shaqyrǵan bolatyn.
Munyń sebebi – Qazaqstandaǵy reseilik kontsertterdi uiymdastyrýshy Aleksei Pýchkovtyń aryzy. Aida Jeksenovanyń aitýynsha, ol blogerdiń jazbasyn QK-niń 174-baby – «alaýyzdyq qozdyrý» quramyna jatady dep eseptegen. Alaida blogerdiń sózinshe, onyń jazbasynda ultqa til tigizý de, agressiia da, óshpendilikke shaqyrý da bolmaǵan.
