Shyǵys Qazaqstan oblysynda jańa áýejailar salynyp jatyr. Brifingte oblys ákimi Nurymbet Saqtaǵanov jýrnalisterdiń suraqtaryna jaýap berip, jobalardy júzege asyrý merzimi, infraqurylymdy daiyndaý kezeńi jáne qazirgi jumystardyń jaǵdaiyn naqtylady, dep habarlaidy Dalanews.kz.
Brifing barysynda Nurymbet Saqtaǵanov Zaisandaǵy áýejai qurylysy 66 paiyzǵa aiaqtalǵanyn atap ótti.
«Qatonqaraǵaida 55 paiyzǵa daiyn. Ushý-qoný jolaǵy men rýlejdik joldar quryldy. Qazir perrondar men áýejai vokzaldary salynyp jatyr. Jyl sońyna deiin bul qurylys jumystary aiaqtalady. Sonymen qatar, tiisti jabdyqtardy satyp alý jáne ornatý jumystary júrgizilýde. Kelesi týristik maýsymnyń basynda alǵashqy ushaqtar osy áýejailarda qabyldanatynyna senemin», – dedi ol.
Buryn habarlanǵandai, Qatonqaraǵai kýrorttyq aimaǵyndaǵy áýejai Belqaraǵai aýylyna jaqyn jerde 266 gektar aýmaqta salyna bastaǵan. Qurylys aiasynda uzyndyǵy 2200 metr bolatyn ushý-qoný jolaǵy qarastyrylǵan. Kólik ministrligi baspasóz qyzmetiniń málimetinshe, áýejai saǵatyna 150 jolaýshyǵa deiin qabyldaýǵa qaýqarly.
Buǵan deiin burynǵy kólik ministri Marat Qarabaev mundaǵy áýejaidan Qazaqstan boiynsha reisterdi (Astana, Almaty, Óskemen) jáne shetelge – Qytaiǵa (Altai, Qanas) jáne Mońǵoliiaǵa (Baian- Ólgei) baǵyttaý josparlanyp otyrǵanyn habarlaǵan edi.
Zaisan kýrorttyq aimaǵyndaǵy áýejai qurylysy 2025 jylǵy naýryz aiynyń sońynda bastalǵany habarlanǵan bolatyn. Áýejai Satpai aýyly mańyndaǵy burynǵy áskeri aerodrom ornyna salynyp jatyr, Zaisannan shamamen 25 shaqyrym qashyqtyqta ornalasqan. Ol úshin aimaqta klimattyq jaǵdailardy jáne kólik qoljetimdiligin eskere otyryp, shamamen, 184 gektar jer bólingen.
Ushý-qoný jolaǵynyń uzyndyǵy 2200 metr bolady. Áýejai Bombardier Q400 jáne ATR-72 siiaqty ushaqtardy qabyldai alady.
