شىعىس قازاقستان وبلىسىندا جاڭا اۋەجايلار سالىنىپ جاتىر. بريفينگتە وبلىس اكىمى نۇرىمبەت ساقتاعانوۆ جۋرناليستەردىڭ سۇراقتارىنا جاۋاپ بەرىپ، جوبالاردى جۇزەگە اسىرۋ مەرزىمى، ينفراقۇرىلىمدى دايىنداۋ كەزەڭى جانە قازىرگى جۇمىستاردىڭ جاعدايىن ناقتىلادى، دەپ حابارلايدى Dalanews.kz.

بريفينگ بارىسىندا نۇرىمبەت ساقتاعانوۆ زايسانداعى اۋەجاي قۇرىلىسى 66 پايىزعا اياقتالعانىن اتاپ ءوتتى.

«قاتونقاراعايدا 55 پايىزعا دايىن. ۇشۋ-قونۋ جولاعى مەن رۋلەجدىك جولدار قۇرىلدى. ءقازىر پەرروندار مەن اۋەجاي ۆوكزالدارى سالىنىپ جاتىر. جىل سوڭىنا دەيىن بۇل قۇرىلىس جۇمىستارى اياقتالادى. سونىمەن قاتار، ءتيىستى جابدىقتاردى ساتىپ الۋ جانە ورناتۋ جۇمىستارى جۇرگىزىلۋدە. كەلەسى تۋريستىك ماۋسىمنىڭ باسىندا العاشقى ۇشاقتار وسى اۋەجايلاردا قابىلداناتىنىنا سەنەمىن»، – دەدى ول.

بۇرىن حابارلانعانداي، قاتونقاراعاي كۋرورتتىق ايماعىنداعى اۋەجاي بەلقاراعاي اۋىلىنا جاقىن جەردە 266 گەكتار اۋماقتا سالىنا باستاعان. قۇرىلىس اياسىندا ۇزىندىعى 2200 مەتر بولاتىن ۇشۋ-قونۋ جولاعى قاراستىرىلعان. كولىك مينيسترلىگى باسپا ءسوز قىزمەتىنىڭ مالىمەتىنشە، اۋەجاي ساعاتىنا 150 جولاۋشىعا دەيىن قابىلداۋعا قاۋقارلى.

بۇعان دەيىن بۇرىنعى كولىك ءمينيسترى مارات قارابايەۆ مۇنداعى اۋەجايدان قازاقستان بويىنشا رەيستەردى (استانا، الماتى، وسكەمەن) جانە شەتەلگە – قىتايعا (التاي، قاناس) جانە موڭعولياعا (بايان- ولگەي) باعىتتاۋ جوسپارلانىپ وتىرعانىن حابارلاعان ەدى.

زايسان كۋرورتتىق ايماعىنداعى اۋەجاي قۇرىلىسى 2025 جىلعى ناۋرىز ايىنىڭ سوڭىندا باستالعانى حابارلانعان بولاتىن. اۋەجاي ساتپاي اۋىلى ماڭىنداعى بۇرىنعى اسكەري اەرودروم ورنىنا سالىنىپ جاتىر، زايساننان شامامەن 25 شاقىرىم قاشىقتىقتا ورنالاسقان. ول ءۇشىن ايماقتا كليماتتىق جاعدايلاردى جانە كولىك قولجەتىمدىلىگىن ەسكەرە وتىرىپ، شامامەن، 184 گەكتار جەر بولىنگەن.

ۇشۋ-قونۋ جولاعىنىڭ ۇزىندىعى 2200 مەتر بولادى. اۋەجاي Bombardier Q400 جانە ATR-72 سياقتى ۇشاقتاردى قابىلداي الادى.