Taldyqorǵanda «Atajurt» qozǵalysyna qatysy bar 19 belsendige qatysty sot úkimi shyqty, dep habarlaıdy Dala News.
Málimetterge sáıkes, sot barlyq aıyptalýshylardy kináli dep tanyp, olardyń bir bóligine 5 jylǵa bas bostandyǵynan aıyrý jazasyn taǵaıyndaǵan. Qalǵandary shartty jaza alǵany aıtyldy.
Sot prosesi jabyq rejımde ótken. Buǵan deıin memlekettik aıyptaýshy 19 aıyptalýshynyń barlyǵyna naqty jáne shartty merzimder suraǵan.
İs Jetisý oblysy Taldyqorǵan qalalyq sotynda qaralǵan.
Belsendilerge qatysty qylmystyq is 2025 jyldyń qarasha aıynda Almaty oblysynda ótken aksıadan keıin qozǵalǵan. Onda qatysýshylar Qytaı týyn jáne Qytaı tóraǵasy Sı Szınpınniń portretin órtegen.
Aksıa Qytaıda ustalǵan Qazaqstan azamaty, etnıkalyq qazaq Alımnur Turǵanbaıdy bosatýdy talap etý maqsatynda uıymdastyrylǵany aıtylǵan. Ol 2025 jyldyń shildesinen beri Qytaıda qamaýda otyr.
Quqyq qorǵaý uıymdarynyń málimetinshe, aksıaǵa qatysýshylar Qytaıdyń musylmandarǵa qatysty saıasatyna qarsylyq bildirgen.
Alǵashynda belsendiler «usaq buzaqylyq» baby boıynsha ákimshilik jaýapkershilikke tartylyp, aıyppul nemese 15 táýlikke deıin qamaýǵa alynǵan. Keıinnen olardyń ústinen «alaýyzdyq qozdyrý» baby boıynsha qylmystyq is qozǵalǵan.
Sonymen qatar Qytaıdyń Almatydaǵy bas konsýldyǵy Qazaqstannyń Syrtqy ister mınıstrligine dıplomatıalyq nota joldap, atalǵan oqıǵaǵa qatysty alańdaýshylyq bildirgeni habarlanǵan.
