Jambyl oblysynda kúshtik qurylym qyzmetkerleri jumyspen qamtýdy úılestirý jáne áleýmettik baǵdarlamalar basqarmasynyń basshysy Erken Kelesovti jumys ornynda ustady, dep habarlaıdy Dalanews.kz.
Ulysmedia.kz derekkózderiniń málimetinshe, sheneýnik tikeleı kabınetinde qolǵa túsken. Qazirgi ýaqytta onyń kabıneti jabyq, al telefonyna jaýap bermeıdi.
Erken Kelesov Taraz qalasynyń týmasy. Bilimi boıynsha býhgalter, Shymkenttegi kásiptik ýchılısheni jáne Dýlatı atyndaǵy Taraz memlekettik ýnıversıtetin támamdaǵan. Eńbek jolyn salyq salasynda bastap, aǵa ınspektor qyzmetin atqarǵan. Keıin óńirdegi salyq organdarynda basshylyq laýazymdardy ıelenip, Taraz qalasy men Baızaq aýdanynda basqarmalarǵa jetekshilik etken.
2016–2022 jyldary Jambyl aýdanynda jumyspen qamtý jáne áleýmettik baǵdarlamalar bólimin basqardy. 2022 jyly oblystyq áleýmettik baǵdarlamalar basqarmasynyń basshysy bolyp taǵaıyndaldy.
2023 jyly qysqa ýaqyt memlekettik satyp alý basqarmasyna aýysyp, keıin qaıtadan áleýmettik salaǵa oralǵan. Sol jyldyń jeltoqsanynan bastap qaıtadan oblystyq jumyspen qamtýdy úılestirý jáne áleýmettik baǵdarlamalar basqarmasyn basqarǵan.
Materıal jarıalanǵan sátte quqyq qorǵaý organdary men ákimdik tarapynan resmı túsinikteme berilgen joq.
