جامبىل وبلىسىندا كۇشتىك قۇرىلىم قىزمەتكەرلەرى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەركەن كەلەسوۆءتى جۇمىس ورنىندا ۇستادى، دەپ حابارلايدى Dalanews.kz.
Ulysmedia.kz دەرەككوزدەرىنىڭ مالىمەتىنشە، شەنەۋنىك تىكەلەي كابينەتىندە قولعا تۇسكەن. قازىرگى ۋاقىتتا ونىڭ كابينەتى جابىق، ال تەلەفونىنا جاۋاپ بەرمەيدى.
ەركەن كەلەسوۆ تاراز قالاسىنىڭ تۋماسى. ءبىلىمى بويىنشا بۋحگالتەر، شىمكەنتتەگى كاسىپتىك ۋچيليششەنى جانە دۋلاتي اتىنداعى تاراز مەملەكەتتىك ۋنيۆەرسيتەتىن ءتامامداعان. ەڭبەك جولىن سالىق سالاسىندا باستاپ، اعا ينسپەكتور قىزمەتىن اتقارعان. كەيىن وڭىردەگى سالىق ورگاندارىندا باسشىلىق لاۋازىمداردى يەلەنىپ، تاراز قالاسى مەن بايزاق اۋدانىندا باسقارمالارعا جەتەكشىلىك ەتكەن.
2016–2022 جىلدارى جامبىل اۋدانىندا جۇمىسپەن قامتۋ جانە الەۋمەتتىك باعدارلامالار ءبولىمىن باسقاردى. 2022 جىلى وبلىستىق الەۋمەتتىك باعدارلامالار باسقارماسىنىڭ باسشىسى بولىپ تاعايىندالدى.
2023 جىلى قىسقا ۋاقىت مەملەكەتتىك ساتىپ الۋ باسقارماسىنا اۋىسىپ، كەيىن قايتادان الەۋمەتتىك سالاعا ورالعان. سول جىلدىڭ جەلتوقسانىنان باستاپ قايتادان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىن باسقارعان.
ماتەريال جاريالانعان ساتتە قۇقىق قورعاۋ ورگاندارى مەن اكىمدىك تاراپىنان رەسمي تۇسىنىكتەمە بەرىلگەن جوق.
