Óskemende aiaq kiim dúkeniniń ashylýy kezinde kelýshiler arasynda qysym oryn aldy, dep habarlaidy Dala News.
Oqiǵa kýágerleriniń málimetinshe, ashylý saltanaty aiasynda kontsert uiymdastyrylyp, kelýshilerge palaý, maqta kámpiti jáne 100 jup tegin aiaq kiim usynylǵan.
Alaida shara sońyna qarai adamdar sany kúrt kóbeiip, tegin taratý aimaǵynda adamdar bir-birin iterip, asyǵyp, nátijesinde qysym bolǵany aityldy. Jaǵdaidyń saldarynan jaraqat alý qaýpi týyndaǵan.
Jeli qoldanýshylary bul jaǵdaidy aktsiia formatynyń ózimen bailanystyrady. Olardyń pikirinshe, tegin taǵam men shekteýli syilyqtar joǵary suranys týǵyzyp, adamdar arasynda ajiotaj qalyptastyrǵan.
Mundai jaǵdailar buǵan deiin de tirkelgen. Máselen, 2022 jyly Qyzylordada qala kúni kezinde tegin palaý taratý qysym men tóbeleske ulasqan. 2023 jyly Naýryz merekesi kezinde de birneshe qalada tegin taǵam úshin kezekte qysym bolǵany aityldy.
Sondai-aq 2025 jyly Aqtaýda balalardy qorǵaý kúnine orai balmuzdaq taratý kezinde balalar kópshiliktiń ishinde joǵalyp ketken jaǵdailar tirkelgen. Al Atyraýda qaiyrymdylyq aktsiiasy barysynda alma jinaý kezinde aǵashtar búlingen.
Sarapshylardyń pikirinshe, tegin taratý aktsiialary durys uiymdastyrylmaǵan jaǵdaida qaýip týdyrýy múmkin. Osyǵan bailanysty uiymdastyrýshylarǵa adamdar aǵynyn baqylaý, taratý júiesin retteý jáne qaýipsizdik sharalaryn kúsheitý qajettigi aityldy.
