Memleket basshysy Qasym-Jomart Toqaev ǵalymdardy marapattaý rásiminde sóz sóiledi, dep habarlaidy Dalanews.kz.
Prezidenttiń aitýynsha, Ata zańymyzdyń preambýlasynda alǵash ret mádeniet, bilim berý, ǵylym jáne innovatsiia qundylyqtary naqty baǵdar retinde belgilengen.
"Ózderińizge málim, Qazaqstanda 15 naýryzda tarihi máni zor referendým ótti. Azamattardyń basym bóliginiń qoldaýymen memleketimizdiń irgesin nyǵaitatyn, eldi barlyq salada, sonyń ishinde ǵylymda ornyqty damý traektoriiasyna shyǵaratyn jańa Konstitýtsiia qabyldandy. Ata zańymyzdyń preambýlasynda alǵash ret mádeniet, bilim berý, ǵylym jáne innovatsiia qundylyqtary naqty baǵdar retinde belgilendi. Iaǵni osy salalardy jan-jaqty qoldaýǵa strategiialyq mańyz berildi. Eń bastysy, bul baǵyttardy damytý memlekettiń konstitýtsiialyq mindetine ainaldy. Oraily sátti paidalana otyryp, Konstitýtsiiany ázirleýge jáne qabyldaýǵa aitarlyqtai úles qosqan barsha ǵylymi-akademiialyq qaýymdastyqqa rizashylyǵymdy bildiremin. Ótpeli erejelerge sai jańa Ata zań 2026 jyldyń 1 shildesinen bastap kúshine enedi. Sol ýaqytqa deiin negizgi zańdardyń barlyǵy Konstitýtsiia normalaryna sáikestendirilýge tiis. Bul baǵytta Parlament aýqymdy zań shyǵarý jumysyna kiristi. Depýtattar zań jobalaryn muqiiat ári jedel qarastyrady dep senemin", - dedi Memleket basshysy.
Quryltai sailaýy tamyzda ótedi.
"Memleket basshysy retinde elimiz úshin eleýli oqiǵalar týraly aldyn ala aqparat berý óte mańyzdy dep sanaimyn. Konstitýtsiia kúshine engen sátten bastap bir palataly Quryltai sailaýyn ótkizý jónindegi jarlyqqa qol qoiamyn. Sailaý biyl tamyzda ótedi. Muny ádeii erte aityp otyrmyn. Óitkeni partiialardyń josparlaryn aiqyndap, sailaý naýqanyna daiyndyq júrgizýine jetkilikti ýaqyty bolýy kerek. Osylaisha, partiialardyń sailaýshylarmen tiisti jumys júrgizýine bes aiǵa jýyq ýaqyt beriledi. Quryltai sailaýy Qazaqstannyń búkil saiasi júiesin jappai "qaita qurýǵa" jol ashady. Bul rette biz júzege asyryp jatqan saiasi jáne ekonomikalyq reformalar qoǵamdyq sananyń oń sipatta ózgerýine áser etýge tiis. Men munyń mańyzy jóninde birneshe ret aittym", - dedi Qasym-Jomart Toqaev.
