Aqtóbe oblysynda ýchaskelik politsei qart anany balalarymen qaýyshtyrdy, dep habarlaidy Dalanews.kz.
Aqtóbe oblysy Qarǵaly aýdanynyń Qosestek aýylynda qyzmet etetin ýchaskelik politsiia inspektory Aibolat Bekniiazdyń adaldyǵy men qaiyrymdylyǵyn jergilikti halyq jaqsy biledi.
Aýyldaǵy árbir turǵyndy biletin politsiia maioryn aýylǵa kóship kelgen syrqat qariianyń jaǵdaiy qatty alańdatqan. 72 jastaǵy Liýdmila Skripniktiń eshbir jaqyny, ózimen birge eshbir qujattary bolmaǵan. Qujattaryn qandai jaǵdaida joǵaltqanyn da qariia esine túsire almaǵan. Ýchaskelik politsiia inspektory Aibolat Bekniiaz qart áieldiń qujattaryn rásimdeýge kómektesý úshin jan-jaqqa suraýlar jibere bastaǵan.
Alǵashynda eshbir nátijeler bermegenimen, keiin muraǵattan 30 jyldan astam ýaqyt burynǵy qujatty tapqan.
Qujatta Liýdmila Skripniktiń 3 balasy (1 ul, 2 qyz) bar bolǵanyn bilip, qatty qýanǵan politsei tynbai izdený arqyly olardyń birin izdep taýyp, habarlasqan.
"Telefon tutqasyn kótergen áiel adamnan “Liýdmila Skripnikti tanisyz ba” dep suraǵanymda ol qatty tolqyp ketti. Ol óziniń kóp jyl buryn joǵaltqan anasy ekenin aitty. Mán-jaidy túsindirip berdim. Ol qariianyń 3 balasy da aman-saý, óz otbasylarymen Pavlodar qalasynda turyp jatqanyn, anasyn kóp jyldan beri izdep júrgenin aitty. Qyzy anasymen dereý sóilestirýdi ótindi", - deidi Aibolat Bekniiaz.
Qatty qýanǵan politsei qariianyń úiine baryp, syrqat keiýanany júrek tebirenterlik habarǵa aldyn ala daiyndap, beinebailanys arqyly balalarymen sóilestirgen. Perzentteri politseiden qujatsyz anasyn qastaryna ákelýge kómektesýdi suraǵan. Balalaryna júregi alyp ushsa da, alys jolǵa densaýlyǵynyń jaramaitynyna alańdaǵan ýchaskelik politsiia inspektory Aibolat Bekniiaz aýyl dárigerimen birge qariiany bir aidai emdegen. Sáýir aiynda politsei densaýlyǵy rettelgen Liýdmila Skripnikti taksige otyrǵyzyp, Pavlodarǵa qarai jóneltken. Búginde balalarymen bir dastarhan basynda qaýyshyp, nemereler ortasynda máre-sáre bolǵan qariia Aibolatqa alǵysyn jaýdyrýda.
"Meniń qaiǵyma beijai qaramai, kómek qolyn sozǵan jalǵyz adam – Aibolat boldy. Sońyna deiin birge bolyp, balalarymdy taýyp bergen Aibolatqa alǵysym sheksiz. Osyndai meiirimdi jandar kóbeie berse eken", - deidi qariia.
Balalary da anasymen qaýyshtyrǵan, keń júrekti ýchaskelik inspektorǵa qaita-qaita qońyraý shalyp, qonaq bolýǵa shaqyryp jatyr. Anyqtalǵandai, osydan otyz jyl buryn Liýdmila Skripniktiń basyna aýyr is túsip, balalarynan ajyraǵan. Úsh balasy alys týystarynyń úiinde tárbielengen. Keiin syrqattanǵan anasy basqa elde ómir súrip, perzentterin esine túsire almaǵandyqtan, izdep taba almaǵan.
"Jalǵyzbasty qariianyń otbasy tabylǵanyna ózim de qatty qýandym. Taǵdyr talqysyna túsip, talai qiyndyq kórse de synbaǵan, búginde aiaqtaryna nyq turyp, bir-bir otbasy bolyp otyrǵan qaisar, meiirimdi balalaryn kórip qatty riza boldym", - deidi Qosestek aýylynyń ýchaskelik inspektory Aibolat Muratuly.
