اقتٶبە وبلىسىندا ۋچاسكەلٸك پوليتسەي قارت انانى بالالارىمەن قاۋىشتىردى, دەپ حابارلايدى Dalanews.kz.
اقتٶبە وبلىسى قارعالى اۋدانىنىڭ قوسەستەك اۋىلىندا قىزمەت ەتەتٸن ۋچاسكەلٸك پوليتسييا ينسپەكتورى ايبولات بەكنييازدىڭ ادالدىعى مەن قايىرىمدىلىعىن جەرگٸلٸكتٸ حالىق جاقسى بٸلەدٸ.
اۋىلداعى ەربٸر تۇرعىندى بٸلەتٸن پوليتسييا مايورىن اۋىلعا كٶشٸپ كەلگەن سىرقات قارييانىڭ جاعدايى قاتتى الاڭداتقان. 72 جاستاعى ليۋدميلا سكريپنيكتٸڭ ەشبٸر جاقىنى, ٶزٸمەن بٸرگە ەشبٸر قۇجاتتارى بولماعان. قۇجاتتارىن قانداي جاعدايدا جوعالتقانىن دا قارييا ەسٸنە تٷسٸرە الماعان. ۋچاسكەلٸك پوليتسييا ينسپەكتورى ايبولات بەكنيياز قارت ەيەلدٸڭ قۇجاتتارىن رەسٸمدەۋگە كٶمەكتەسۋ ٷشٸن جان-جاققا سۇراۋلار جٸبەرە باستاعان.
العاشىندا ەشبٸر نەتيجەلەر بەرمەگەنٸمەن, كەيٸن مۇراعاتتان 30 جىلدان استام ۋاقىت بۇرىنعى قۇجاتتى تاپقان.
قۇجاتتا ليۋدميلا سكريپنيكتٸڭ 3 بالاسى (1 ۇل, 2 قىز) بار بولعانىن بٸلٸپ, قاتتى قۋانعان پوليتسەي تىنباي ٸزدەنۋ ارقىلى ولاردىڭ بٸرٸن ٸزدەپ تاۋىپ, حابارلاسقان.
"تەلەفون تۇتقاسىن كٶتەرگەن ەيەل ادامنان “ليۋدميلا سكريپنيكتٸ تانيسىز با” دەپ سۇراعانىمدا ول قاتتى تولقىپ كەتتٸ. ول ٶزٸنٸڭ كٶپ جىل بۇرىن جوعالتقان اناسى ەكەنٸن ايتتى. مەن-جايدى تٷسٸندٸرٸپ بەردٸم. ول قارييانىڭ 3 بالاسى دا امان-ساۋ, ٶز وتباسىلارىمەن پاۆلودار قالاسىندا تۇرىپ جاتقانىن, اناسىن كٶپ جىلدان بەرٸ ٸزدەپ جٷرگەنٸن ايتتى. قىزى اناسىمەن دەرەۋ سٶيلەستٸرۋدٸ ٶتٸندٸ", - دەيدٸ ايبولات بەكنيياز.
قاتتى قۋانعان پوليتسەي قارييانىڭ ٷيٸنە بارىپ, سىرقات كەيۋانانى جٷرەك تەبٸرەنتەرلٸك حابارعا الدىن الا دايىنداپ, بەينەبايلانىس ارقىلى بالالارىمەن سٶيلەستٸرگەن. پەرزەنتتەرٸ پوليتسەيدەن قۇجاتسىز اناسىن قاستارىنا ەكەلۋگە كٶمەكتەسۋدٸ سۇراعان. بالالارىنا جٷرەگٸ الىپ ۇشسا دا, الىس جولعا دەنساۋلىعىنىڭ جارامايتىنىنا الاڭداعان ۋچاسكەلٸك پوليتسييا ينسپەكتورى ايبولات بەكنيياز اۋىل دەرٸگەرٸمەن بٸرگە قارييانى بٸر ايداي ەمدەگەن. سەۋٸر ايىندا پوليتسەي دەنساۋلىعى رەتتەلگەن ليۋدميلا سكريپنيكتٸ تاكسيگە وتىرعىزىپ, پاۆلودارعا قاراي جٶنەلتكەن. بٷگٸندە بالالارىمەن بٸر داستارحان باسىندا قاۋىشىپ, نەمەرەلەر ورتاسىندا مەرە-سەرە بولعان قارييا ايبولاتقا العىسىن جاۋدىرۋدا.
"مەنٸڭ قايعىما بەيجاي قاراماي, كٶمەك قولىن سوزعان جالعىز ادام – ايبولات بولدى. سوڭىنا دەيٸن بٸرگە بولىپ, بالالارىمدى تاۋىپ بەرگەن ايبولاتقا العىسىم شەكسٸز. وسىنداي مەيٸرٸمدٸ جاندار كٶبەيە بەرسە ەكەن", - دەيدٸ قارييا.
بالالارى دا اناسىمەن قاۋىشتىرعان, كەڭ جٷرەكتٸ ۋچاسكەلٸك ينسپەكتورعا قايتا-قايتا قوڭىراۋ شالىپ, قوناق بولۋعا شاقىرىپ جاتىر. انىقتالعانداي, وسىدان وتىز جىل بۇرىن ليۋدميلا سكريپنيكتٸڭ باسىنا اۋىر ٸس تٷسٸپ, بالالارىنان اجىراعان. ٷش بالاسى الىس تۋىستارىنىڭ ٷيٸندە تەربيەلەنگەن. كەيٸن سىرقاتتانعان اناسى باسقا ەلدە ٶمٸر سٷرٸپ, پەرزەنتتەرٸن ەسٸنە تٷسٸرە الماعاندىقتان, ٸزدەپ تابا الماعان.
"جالعىزباستى قارييانىڭ وتباسى تابىلعانىنا ٶزٸم دە قاتتى قۋاندىم. تاعدىر تالقىسىنا تٷسٸپ, تالاي قيىندىق كٶرسە دە سىنباعان, بٷگٸندە اياقتارىنا نىق تۇرىپ, بٸر-بٸر وتباسى بولىپ وتىرعان قايسار, مەيٸرٸمدٸ بالالارىن كٶرٸپ قاتتى ريزا بولدىم", - دەيدٸ قوسەستەك اۋىلىنىڭ ۋچاسكەلٸك ينسپەكتورى ايبولات مۇراتۇلى.
