Ál-Farabi atyndaǵy Qazaq ulttyq ýniversitetinde ústelústi sporttyq oiyndary boiynsha ashyq chempionat uiymdastyryldy. Sharada balalar men eresekter, múmkindigi shekteýli jandar, sondai-aq memlekettik qurylymdar men qoǵamdyq uiymdar jáne biznes ókilderi bas qosty, dep habarlaidy Dala News.
Mundai aýqymdy format qoǵamdaǵy ózara túsinistikti nyǵaityp, ortaq qundylyqtar tóńireginde birigýge baǵyttalǵan.
Joba QazUÝ inkliýzivti ǵylymi-tájiribelik ortalyǵy, «Áleýmettik inkliýzivti baǵdarlamalar ortalyǵy» qoǵamdyq qory, Balalaroom klýby jáne DeFactoFm portalymen birlese júzege asyryldy. Jattyqtyrýshy Mihail Teifeldiń aitýynsha, ústelústi oiyndary strategiialyq oilaýdy, zeiin men qimyl úilesimdiligin damytýmen qatar, qatysýshylar arasynda teń qarym-qatynas ornatýǵa septigin tigizedi.
Uiymdastyrýshylar chempionattyń aldaǵy ýaqytta halyqaralyq tájiribe almasý alańyna ainalatynyna senim bildirdi. Sheteldik sarapshylar men seriktesterdi tartý arqyly da jobanyń áleýmettik mańyzy men aýqymyn keńeitý josparlanýda.
Sonymen qatar chempionat aiasynda mektep oqýshylaryn ústelústi oiyndaryna baýlý jáne olardyń tanymdyq daǵdylaryn jetildirý baǵytyndaǵy júieli daiyndyq jumystary júrgizilip keledi. Sabaqtar Almaty qalasyndaǵy BALALAROOM klýbynda ótkiziledi. Jattyǵý úderisi tek sporttyq nátijelerge ǵana emes, sonymen birge áleýmettenýge, komandalyq is-qimyldy nyǵaitýǵa jáne belsendi demalys mádenietin qalyptastyrýǵa negizdelgen.
QazUÝ bazasyndaǵy bul bastama inkliýzivti ortany uzaq merzimdi damytýǵa jáne qoǵamnyń barlyq sanaty úshin salaýatty ómir saltyn ilgeriletýge múmkindik beredi.
