Astanada 21 jastaǵy jigit nemere aǵasyn azaptap óltirip, taǵy úsh jaqynyn pyshaqtap, aýyr jaraqat saldy. Qalalyq densaýlyq saqtaý basqarmasy zardap shekkenderdiń qazirgi jaǵdaıy týraly aıtty, dep habarlaıdy Dalanews.kz.
Zardap shekkender №1 Kópbeıindi qalalyq aýrýhanada jatyr.
“1964 jylǵy áıeldiń kóptegen tilingen-kesilgen jaraqaty bar, sol jaq qabyrǵasy synǵan. Aýrýhanaǵa aýyr hálde tústi, birden ota jasaldy. Qazir ıntensıvti terapıa palatasynda jatyr. 1974 jylǵy áıeldiń de kóptegen tilingen-kesilgen jaraqaty bar, bas jaraqaty, oń jaq qabyrǵasy synǵan. Jalpy jaǵdaıy ortasha, turaqty. Al 18 jastaǵy qyz da hırýrgıa bólimshesine jatqyzyldy. Jaǵdaıy turaqty, ortasha”, - dedi basqarmanyń baspasóz qyzmeti Azattyq rýhy portalyna.
Eske salaıyq, Astanada tún jarymynda oryn alǵan qaıǵyly oqıǵa elorda turǵyndaryn dúr silkindirgen edi.
Aldyn ala málimet boıynsha, janjalǵa kompúterlik oıyn sebep bolǵan.
Qaıǵyly jaǵdaı elordadaǵy Mustafın kóshesindegi páterde oryn alǵan. Úıde apaly-sińili áıelder birge turǵan. Ekeýiniń balalary jáne aǵalarynyń 21 jasar uly Janǵalı Jumataev ta sol úıdi panalaǵan.
Janǵalı esh jerde jumys istemegen, kúnuzaqqa smartfonǵa telmirip, atyshýly Standoff 2 degen oıyndy oınaýmen ýaqyt ótkizgen. Bul oıyn shynaıy urys alańyna uqsas, negizinen jaýdyń kózin joıý, granata laqtyrý, pyshaqpen shabýyl jasaý sekildi qantógiske toly, qatygez áreketterdi beıneleıdi.
Tergeýshilerdiń boljamyna saı, qandy oqıǵa oryn alǵan túnde Janǵalı tas qarańǵyda, tún ortasyna deıin smartfonmen atys-shabys oıynyn oınap otyrǵan.
Shamamen, saǵat tili túngi úshterden aýǵanda, tátesi odan "telefonyńdy óshirip, uıyqtasańshy" dep ótinish jasaıdy. Úı-ishindegilerdi smartfonnyń jaryǵy men dybysy mazalap, tynyǵýǵa múmkindik bermegen. Alaıda Jumataev ápkesiniń eskertýin elemeı, oıyndy ári qaraı da jalǵastyra beredi. Keıin tátesi qaıta aınalyp kelip, telefondy sóndirýdi buıyrǵan kezde arada aıǵaı-shý shyqqan.
Barlyǵy ornyna jaıǵasyp, qalyń uıqyǵa ketken ýaqytta Janǵalı asúıden "sýyq qarý" alyp, ózinen jeti jas úlken nemere aǵasyna (tátesiniń ulyna) pyshaq jumsaıdy. Aldyn ala málimet boıynsha, marqumǵa jıyrma jerden pyshaq jaraqaty tıgen. Jedel járdem oqıǵa ornyna jetip úlgergenshe, 28 jastaǵy azamat jan tapsyrǵan.
Qylmysker jan daýsy shyqqan jas balanyń daýysynan shoshyp oıanyp, óre túregelgen úıdegilerge de pyshaq ala júgirgen. Qandyqoldyń tyrnaǵyna ilikken úı ıeleri, ápkeli-sińlili áıelder men nemere sińlisi bas,keýde jáne arqa tusynan aýyr jaraqat alǵan. Qazirgi tańda úsheýi de aýrýhanada em qabyldap jatyr. Dárigerler olardyń ómirine qaýip tóndirgen jaralardyń aýyrlyǵyn atap ótýde, alaıda bar kúshterin salyp, em-dom jasap jatqandaryn málimdedi. Marqum 28 jastaǵy azamat jedel járdem jetkenshe qan kóp joǵaltqan.
Kúdikti Janǵalı Jumataev oqıǵa ornynda ustalyp, ýaqytsha ustaý ızolátoryna qamaldy. Tergeý amaldary bastalyp, oǵan «Adam óltirý» jáne «Adam óltirýge oqtalý» baptary boıynsha aıyp taǵylǵany habarlandy.
Quqyq qorǵaý organdary men psıhologtar oıynǵa shekten tys berilip ketýdiń, ásirese áli buǵanasy bekip úlgermegen jasóspirimder men jastarǵa qaýipti ekenin jıi eskertedi. Qazirgi tańda tergeý jalǵasýda, sarapshylar qandy shabýylǵa naqty ne túrtki bolǵanyn anyqtap, isti sotqa joldaıtyny kútilip otyr.
